Aleppo - Hosea - 3

3:1  ויאמר יהוה אלי עוד לך אהב אשה אהבת רע ומנאפת  כאהבת יהוה את בני ישראל והם פנים אל אלהים אחרים ואהבי אשישי ענבים

3:2  ואכרה לי בחמשה עשר כסף וחמר שערים ולתך שערים

3:3  ואמר אליה ימים רבים תשבי לי—לא תזני ולא תהיי לאיש וגם אני אליך

3:4  כי ימים רבים ישבו בני ישראל—אין מלך ואין שר ואין זבח ואין מצבה ואין אפוד ותרפים

3:5  אחר ישבו בני ישראל ובקשו את יהוה אלהיהם ואת דויד מלכם ופחדו אל יהוה ואל טובו באחרית הימים  {פ}