Kapingamarangi - II John

Chapter 1

1:1  Mai tangada madua-daumaha, ang-gi-di ahina hagaaloho, mo ana dama ala e-aloho huoloo iei au. Hagalee koau-hua, mo digau huogodoo ala e-iloo di tonu e-aloho i-di goe.

1:2  Idimaa, di tonu le e-noho i tadau lodo, gaa-noho-hua beelaa i tadau baahi.

1:3  God Tamana, mo Jesus Christ go Tama, gi-dugu-mai gi gidaadou tumaalia, di aloho, mo-di noho i-di aumaalia. Nia mee aanei gii-noho-hua-beelaa i tadau baahi i-di tonu mo-di aloho.

1:4  Au e-tenetene huoloo i dogu gidee hunu daangada i au dama e-mouli i-di tonu, be-di hai o taganoho o Tamana dela ne-dugu-mai gi gidaadou.

1:5  Gei au e-dangi-adu gi-di-goe, dagu ahina hagaaloho, bolo gidaadou huogodoo gi-hagadau-aaloho. Deenei hagalee taganoho hoou, dela e-hihi-adu ko-au gi-di-goe, deenei la-go taganoho guu-lawa di-kae go gidaadou mai taamada.

1:6  Di aloho dela e-helekai-iei au, e-haga-modongoohia bolo gidaadou gi-hagalongo gi-nia haganoho a God. Taganoho dela gu-longono-goodou mai taamada bolo goodou huogodoo e-hai-loo gi-mouli i-di aloho.

1:7  E-dogologowaahee digau halahalau-dangada gu-modoho i henuailala. Digaula e-haga-de-iloo, bolo Jesus Christ guu-hai-tangada. Tangada beenei la tangada halahalau-dangada, deelaa di hagadaumee o Christ.

1:8  Gii-pula i goodou gi-dee kili gi-daha godou mee ala ne-ngalua ginai, gii-kae godou hui hagatau.

1:9  Tangada dela gu-iloo nia agoago o Christ, gei hagalee hagamau-dangihi ginai, gei God hagalee i dono baahi. Tangada dela ga-hagamau-dangihi gi-nia agoago aanei, gei Tamana mo Tama la-gu-i dono baahi.

1:10  Deelaa-laa, maa tangada ga-hanadu gi goodou, hagalee e-agoago-adu nia agoago aanei, goodou hudee benebene-ina a-mee gi-lodo godou hale, ge hudee helekai labelaa gi mee boloo, “Di aumaalia gii-noho i do baahi.”

1:11  Idimaa, tangada ma-ga-benebene-mai tagadilinga dangada beenei, geia gu-hagabuni ang-gi nia hagadilinga huaidu a-mee ala e-hai.

1:12  Nia helekai e-logowaahee i-golo e-hiihai ginai au belee hagi-adu gi goodou, gei au hagalee hihi nia maa gi-di ink mo nia lau-beebaa, i-di-au e-hagadagadagagee bolo au e-hanadu, ga-helehelekai-laa gidaadou, gei gidaadou ga-tenetene huoloo.

1:13  Nia dama o do duaahina-ahina hagaaloho e-hai di-nadau hagaaloho adu gi-di-goe.