Kapingamarangi - Zechariah - 13

13:1  Dimaadua di Gowaa Aamua e-helekai, “I-di madagoaa deelaa ma-ga-dau-mai, di monowai ga-mahuge e-hagamadammaa nia hala mo nia balu daumaha o-nia hagadili o David mo nia daangada o Jerusalem.

13:2  I-di madagoaa deelaa, gei Au ga-daa gi-daha mo tenua nia ingoo o-nia ada god, gei deai tangada ga-langahia nia maa ai. Au ga-hagabagi digau ala e-helekai bolo ginaadou la-nia soukohp, gaa-hai digaula gi-de-hiihai di-daumaha gi-nia ada god.

13:3  Maa dahi dangada gaa-hai hua igolo bolo ia e-helekai hua kokohp, dono damana mo dono dinana donu ga-hagi-anga gi mee bolo mee e-hai-loo gi-daaligi gii-made, idimaa mee guu-hai bolo ia e-helekai nia helekai Dimaadua, gei mee ne-helekai tilikai. Di madagoaa a mee ma-ga-helekai kokohp, dono damana mo dono dinana donu ga-daalo a mee gii-made.

13:4  I-di madagoaa deelaa ma-ga-dau-mai, deai dahi soukohp e-hagapuu gi ana moe, be e-hai ana hangaahai be soukohp be e-gahu eia gi-di gahu soukohp e-halahalau nia daangada ai.

13:5  Malaa, mee ga-helekai, ‘Au hagalee soukohp. Au tangada dogi-mee, nogo dogidogi agu mee i-lodo tenua i-lodo dogu mouli hagatau.’

13:6  Maa dahi dangada ga-heeu gi mee, ‘Do hadahada la ne-lauwa di-aha?’ gei mee ga-helekai, ‘Au ne-lauwa i-di hale dogu ihoo hagaaloho.’ ”

13:7  Dimaadua di Gowaa Aamua e-helekai, “Tulumanu dauwa, duu gi-nua, heebagi gi tangada hagaloohi siibi dela e-ngalua-mai gi-di-Au! Daaligidia a-mee, gei nia siibi ga-lellele dagidahi. Au ga-heebagi gi agu daangada.

13:8  Laa-lodo tenua, lua baahi e-dolu o-nia daangada gaa-mmade.

13:9  Au ga-haahaa di mouli o dahi baahi e-dolu daangada ala e-mouli, ga-haga-madammaa digaula gadoo be di silber dela e-haga-madammaa go-di ahi. Au ga-halahala di mouli digaula be-di hai e-haahaa nia goolo gi-di ahi. Gei digaula ga-dalodalo-mai gi-di-Au, gei Au ga-helekai gi-nia dangidangi digaula. Au ga-hagamodongoohia gi digaula bolo ginaadou la-nia daangada ni-aagu, ge digaula ga-hagamodongoohia-aga bolo Au go di-nadau God.”