II CORINTHIANS
Chapter 7
| II C | Kapingam | 7:1 | Ogu ihoo hagaaloho, nia hagababa huogodoo aanei ne-hai-mai gi gidaadou. Deenei-laa, gidaadou la-gi-haga-madammaa-ina gidaadou gi-daha mo nia mee huogodoo ala e-haga-milimilia tadau huaidina mo tadau hagataalunga. Gidaadou la-gii-noho dabu mo-di hagalaamua-ina a God. | |
| II C | Kapingam | 7:2 | Goodou gi-mamaanadu-ina gimaua. Gimaua digi hai di-mau mee huaidu, haga-hala be halahalau dahi dangada. | |
| II C | Kapingam | 7:3 | Au hagalee ne-helekai beenei belee hagahuaidu goodou. Idimaa, i-mua au gu-helekai bolo goodou e-i-lodo dogu manawa, deelaa-laa e-buni-ai gidaadou i-lodo tadau mouli be i-lodo tadau mmade. | |
| II C | Kapingam | 7:4 | Dogu hagadagadagagee adu gi goodou, la-koia e-damanaiee, gei au e-hagaamu goodou. I-lodo mau hagaduadua huogodoo, gei au nogo duu maaloo, gei au gu-tenetene huoloo. | |
| II C | Kapingam | 7:5 | Di-mau dau-adu gi Macedonia, gimaua digi hagamolooloo. Nia madagoaa huogodoo e-haingadaa, e-lagalagamaaloo gimaadou mo nia daangada, gei di madagu i mau lodo. | |
| II C | Kapingam | 7:6 | Go God dela e-hagamaaloo-aga digau huogodoo ala e-daamaha nadau lodo, geia gu-haga-tenetene labelaa gimaua i-di dau-mai Titus gi mau baahi. | |
| II C | Kapingam | 7:7 | Gei hagalee go dono dau-mai la-hua dela ne-haga-tenetene gimaua, mo dono haga-iloo hogi di-godou hai ne-hagamaaloo-aga ia. Mee gu-hagi-mai gi gimaua di-godou hidihidi huoloo i-di-au, mo di-godou manawa-gee, mo di-godou hiihai e-haga-dagaloaha au. Aanei nia mee ne-haga-damana dogu tene. | |
| II C | Kapingam | 7:8 | Maa dagu lede dela ne-hagau-adu gi goodou la-gu-haga-manawa-gee goodou, gei au hagalee tilikai hualaa i dagu hai di lede deenei. Au nogo tilikai hualaa i-matagidagi idimaa dagu lede la-gu-haga-mmaemmae goodou i tama madagoaa dulii. | |
| II C | Kapingam | 7:9 | Dolomeenei gei au gu-tenetene, hagalee bolo e-tene gi dagu hai goodou gi-manawa-gee, au e-tene gi di-godou manawa-gee, dela ga-hidi-mai-ai goodou gaa-oongo godou lodo, gaa-huli hoou. God dela ne-hai-hegau gi di-godou manawa-gee deelaa, deelaa-laa, gimaua di-mau mee huaidu ne-hai-adu gi goodou ai. | |
| II C | Kapingam | 7:10 | Di manawa-gee mai baahi o God, le e-hidi-ai di huli-hoou o tangada, gaa-hidi-ai di haga-mouli, gei deai tilikai hualaa i-lodo di manawa-gee beenei ai. Gei di manawa-gee o henuailala le e-hidi-ai di made. | |
| II C | Kapingam | 7:11 | Goodou mmada gi God i dana haga-manawa-gee godou lodo. Dana haga-manawa-gee goodou, guu-hai goodou gi-manawa maaloo, manawa hagamahi bolo goodou gi-madammaa. Goodou gu-lodo-huaidu gi-di mee huaidu, goodou gu-haga-lligalliga, goodou gu-hidihidi, goodou gu-maanadu-mai au, gei goodou gu-togomaalia e-hagaduadua digau ala e-hai di huaidu. Goodou gu-haga-modongoohia-aga bolo goodou guu-hai nia mee huogodoo ala e-hai nia mee gii-donu. | |
| II C | Kapingam | 7:12 | Gei-au ne-hihi-adu di lede deelaa gi goodou, hagalee ne-hidi-mai tangada dela guu-hai dana mee hala, be tangada dela gu-ihala. Au ne-hihi di lede deelaa bolo gi-gidee-ai goodou di-godou haa-manawa i gimaua, i-mua nia hadumada o God. | |
| II C | Kapingam | 7:13 | Deelaa di mee ne-maaloo dangihi-ai mau lodo. Mau lodo gu-maaloo-aga, gei gimaua hogi gu-tenetene huoloo gi di-godou hai dela ne-haga-tenetene a Titus i dono madagoaa nogo i godou baahi. | |
| II C | Kapingam | 7:14 | Au gu-hagaamu goodou ang-gi Titus, gei au hagalee langaadia dogu hagaamu goodou. Gimaua nogo helehelekai-adu gi goodou i-nia mee ala e-donu i-nia madagoaa huogodoo, dela gadoo di-mau hagaamu goodou ang-gi Titus gu-modongoohia-aga bolo e-donu. | |
| II C | Kapingam | 7:15 | Malaa, dono aloho i goodou gu-damana-aga i dono mamaanadu godou manawa hagalongo, mo di-godou benebene ia hagalabagau huoloo. | |