LinVB - II John - 1

1:1  Ngáí, Mokóló, napésí mbóte na yŏ, Mamá wa lokúmu, mpé na bána ba yŏ, nalingí bínó na bolingi bwa sôló. Bobélé ngáí té, kasi baye bánso mpé bandimí mambí ma sôló bapésí bínó mbóte.

1:2  Bosôló bozalí o mitéma mya bísó, mpé bokoúmela na bísó sékô.

1:3  Nzámbe Tatá, ná mpé Yézu Krístu, Mwána wa Tatá, bakoyókela bísó ngolu, bakopésa bísó ngrásya na bobóto : tóbátela bosôló mpé tólingana.

1:4  Nasepélí míngi, mpô nakútání na bána ba yŏ basúsu bakolandaka nzelá ya bosôló, sé lokóla mobéko moye Tatá apésí bísó mozalí kotí­nda.

1:5  Mamá, naséngí yŏ sikáwa : tólingana. Nazalí kokomela yŏ mobéko mwa sika té ; ezalí sé mobéko moye tozwákí út’o ebandela.

1:6  Tokolinga sôló, sókó totósí mibéko mya Nzámbe. Mobéko moye batéyákí bínó út’o ebandela, mwangó moye : bózala na bolingani.

1:7  Basénginyi bakómí míngi o mokili, baye babóyí kondima ’te Yézu Krístu akómí moto. Na yangó bakokí koyéba Mosénginyi wa sôló, yě ndé Mongúná wa Krístu.

1:8  Bó­míké­ngele, sókí té bokobúngisa litómba lya mosálá mwa bínó ; bósála makási mpô bózwa mbano mobimba.

1:9  Moto apusí kokende mosíká mpé atíkí matéya ma Krístu, asangání na Nzámbe té. Kasi moto akangání na matéya maye, akozala na Tatá mpé na Mwána lisangá.

1:10  Sókó moto ayéí epái ya bínó mpé ayélí bínó matéya maye té, bóyamba yě o ndáko té, bópésa yě mpé mbóte té,

1:11  mpô moto apésí yě mbóte, andimí mabé ma yě.

1:12  Nazalí na makambo míngi ma koyébisa bínó, kasi nalingí kokoma mangó na ekomeli mpé na mái ma bokomi té. Nazalí na elíkyá ’te nakoyâ epái ya bínó, bôngó nakoyébisa bínó mangó na monoko mpô tósepela míngi mpenzá.

1:13  Bána ba ndeko wa yŏ wa mwásí óyo Nzámbe aponí, batíndélí yŏ mbóte.