CopSahBible2 - II Samuel - 4

4:1  ⲁⲩⲱ ⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲁϥⲥⲱⲧⲙ ϫⲉ ⲁⲁⲃⲉⲛⲛⲏⲣ ⲙⲟⲩ ϩⲛ ⲭⲉⲃⲣⲱⲛ ⲁⲛⲉϥϭⲓϫ ⲕⲱ ⲉⲃⲟⲗ ⲁϥⲥⲧⲱⲧ ⲁⲩⲱ ⲛⲉⲣⲱⲙⲉ ⲧⲏⲣⲟⲩ ⲙⲡ ⲁⲩϣⲧⲟⲣⲧⲣ

4:2  ⲣⲱⲙⲉ ⲇⲉ ⲥⲛⲁⲩ ⲛⲇⲩⲛⲁⲧⲟⲥ ⲛⲕⲣⲟϥ ⲉⲩⲏⲡ ⲉⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲣⲁⲛ ⲙⲡⲟⲩⲁ ⲙⲙⲟⲟⲩ ⲡⲉ ⲃⲁⲁⲛⲛⲁ ⲁⲩⲱ ⲡⲣⲁⲛ ⲙⲡⲙⲉϩⲥⲛⲁⲩ ⲡⲉ ϩⲣⲏⲭⲁⲃ ⲛϣⲏⲣⲉ ⲛϩⲣⲉⲙⲙⲱⲛ ⲡⲃⲏⲣⲟⲑⲁⲓⲟⲥ ⲉⲃⲟⲗ ϩⲛ ⲛϣⲏⲣⲉ ⲛⲃⲉⲛⲓⲁⲙⲓⲛ ϫⲉ ⲃⲉⲣⲱⲑ ⲉⲥⲏⲡ ⲉⲛϣⲏⲣⲉ ⲛⲃⲉⲛⲓⲁⲙⲓⲛ

4:3  ⲛⲃⲏⲣⲱⲑⲁⲓⲟⲥ ⲇⲉ ⲁⲩⲡⲱⲧ ⲉⲅⲉⲑⲑⲁⲓⲙ ⲁⲩⲱ ⲛⲉⲩϭⲁⲗⲱⲟⲩ ⲉⲡⲙⲁ ⲉⲧⲙⲙⲁⲩ ϣⲁ ⲉϩⲣⲁⲓ ⲉⲡⲟⲟⲩ ⲛϩⲟⲟⲩ

4:4  ⲓⲱⲛⲁⲑⲁⲛ ⲇⲉ ⲡϣⲏⲣⲉ ⲛⲥⲁⲟⲩⲗ ⲛⲉⲟⲩⲛⲧⲁϥ ⲙⲙⲁⲩ ⲛⲟⲩϣⲏⲣⲉ ⲉϥϣⲟⲟϭⲉ ⲉⲛⲉϥⲟⲩⲉⲣⲏⲧⲉ ⲉⲩϣⲏⲣⲉ ⲡⲉ ⲉϥϩⲛϯ ⲛⲣⲟⲙⲡⲉ ⲡⲁⲓ ⲇⲉ ⲛⲧⲉⲣⲟⲩⲉⲛⲡⲟⲩⲱ ⲛⲥⲁⲟⲩⲗ ⲙⲛ ⲓⲱⲛⲁⲑⲁⲛ ⲡⲉϥϣⲏⲣⲉ ⲉⲃⲟⲗ ϩⲙ ⲡ ⲧⲉϥⲙⲟⲟⲛⲉ ⲁⲥϥⲓⲧϥ ⲁⲥⲡⲱⲧ ⲛⲙⲙⲁϥ ⲉⲥⲡⲏⲧ ⲇⲉ ⲛⲙⲙⲁϥ ⲉⲁϥϫⲱⲗϩⲥ ⲁϥϩⲉ ⲁϥⲣϭⲁⲗⲉ ⲡⲉϥⲣⲁⲛ ⲡⲉ ⲙⲉⲙⲫⲓⲃⲟⲥⲑⲉ

4:5  ⲁⲩⲃⲱⲕ ⲇⲉ ⲛϭⲓ ⲛⲣⲱⲙⲉ ⲛϩⲣⲉⲙⲙⲱⲛ ⲡⲃⲏⲣⲱⲑⲁⲓⲟⲥ ϩⲣⲉⲕⲭⲁ ⲙⲛ ⲃⲁⲁⲛⲁ ⲁⲩⲟⲛϣⲟⲩ ⲉϩⲟⲩⲛ ⲙⲡⲛⲁⲩ ⲙⲡⲕⲁⲩⲙⲁ ⲙⲙⲉⲉⲣⲉ ⲉⲡⲏⲓ ⲛⲓⲉⲃⲟⲥⲑⲉ ⲛⲧⲟϥ ⲇⲉ ⲛⲉϥⲉⲛⲕⲟⲧⲕ ϩⲓϫⲙ ⲡⲉϥϭⲗⲟϭ ⲙⲡⲛⲁⲩ ⲙⲙⲉⲉⲣⲉ

4:6  ⲁⲩⲱ ⲧⲙⲛⲟⲟⲧⲉ ⲙⲡⲏⲓ ⲛⲉⲥⲧⲃⲃⲟ ⲛϩⲉⲛⲥⲟⲩⲟ ⲁⲥϫⲓⲣⲉⲕⲣⲓⲕⲉ ⲇⲉ ⲁⲥⲱⲃϣ ⲁⲩⲱ ⲃⲁⲁⲛⲁ ⲙⲛ ϩⲣⲏⲭⲁⲃ ⲛⲉϥⲥⲛⲏⲩ ⲙⲡⲉⲗⲁⲁⲩ ⲉⲓⲙⲉ ⲉⲣⲟⲟⲩ

4:7  ⲁⲩⲟⲛϣⲟⲩ ⲉϩⲟⲩⲛ ⲉⲡⲏⲓ ⲓⲉⲃⲟⲥⲑⲉ ⲇⲉ ⲛⲉϥⲉⲛⲕⲟⲧⲕ ϩⲓϫⲙ ⲡⲉϥϭⲗⲟϭ ϩⲙ ⲡⲉϥⲕⲟⲓⲧⲱⲛ ⲁⲩⲕⲟⲛⲥϥ ⲇⲉ ⲁⲩⲙⲟⲟⲩⲧϥ ⲁⲩⲱ ⲁⲩϥⲓ ⲛⲧⲉϥⲁⲡⲉ ⲁⲩⲉⲓ ⲉⲃⲟⲗ ⲉⲩⲙⲟⲟϣⲉ ϩⲛ ⲧⲉϩⲓⲏ ⲉⲧϫⲓ ⲉⲙⲙⲁ ⲛϩⲱⲧⲡ ⲛⲧⲉⲩϣⲏ ⲧⲏⲣⲥ

4:8  ⲁⲩⲉⲓⲛⲉ ⲛⲧⲁⲡⲉ ⲛⲓⲉⲃⲟⲥⲑⲉ ⲉⲣⲁⲧϥ ⲛⲇⲁⲩⲉⲓⲇ ϩⲛ ⲭⲉⲃⲣⲱⲛ ⲡⲉϫⲁⲩ ⲉϩⲟⲩⲛ ϩⲙ ⲡⲣⲣⲟ ϫⲉ ⲉⲓⲥ ⲧⲁⲡⲉ ⲛⲓⲉⲃⲟⲥⲑⲉ ⲡϣⲏⲣⲉ ⲛⲥⲁⲟⲩⲗ ⲡⲉⲕϫⲁϫⲉ ⲉⲛⲉϥⲕⲱⲧⲉ ⲛⲥⲁ ⲧⲉⲕⲯⲩⲭⲏ ⲁⲩⲱ ⲡϫⲟⲉⲓⲥ ⲁϥϯ ⲙⲡⲉⲛϫⲟⲉⲓⲥ ⲡⲣⲣⲟ ⲛⲟⲩϫⲓⲕⲃⲁ ⲛⲛⲉⲕϫⲁϫⲉ ⲛⲑⲉ ⲙⲡⲟⲟⲩ ⲛϩⲟⲟⲩ ⲉⲃⲟⲗ ϩⲛ ⲥⲁⲟⲩⲗ ⲡⲉⲕϫⲁϫⲉ ⲁⲩⲱ ⲉⲃⲟⲗ ϩⲙ ⲡⲉⲥⲡⲉⲣⲙⲁ ⲛ

4:9  ⲇⲁⲩⲉⲓⲇ ⲇⲉ ⲁϥⲟⲩⲱϣⲃ ⲛⲣⲉⲕⲭⲁ ⲙⲛ ⲃⲁⲁⲛⲁ ⲡⲉϥⲥⲟⲛ ⲛϣⲏⲣⲉ ⲛϩⲣⲉⲙⲙⲱⲛ ⲡⲃⲏⲣⲱⲑⲁⲓⲟⲥ ⲉϥϫⲱ ⲙⲙⲟⲥ ⲛⲁⲩ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ⲡⲁⲓ ⲛⲧⲁϥⲥⲱⲧⲉ ⲛⲧⲁⲯⲩⲭⲏ ⲉⲃⲟⲗ ϩⲛ ⲑⲗⲓⲯⲓⲥ ⲛⲓⲙ

4:10  ϫⲉ ⲡⲉⲛⲧⲁϥⲉⲛⲡⲟⲩⲱ ⲛⲁⲓ ϫⲉ ⲥⲁⲟⲩⲗ ⲁϥⲙⲟⲩ ⲁⲩⲱ ⲛⲧⲟϥ ⲉϥⲟ ⲛⲑⲉ ⲙⲡⲉⲧⲧⲁϣⲉⲟⲉⲓϣ ⲛⲁⲓ ⲛⲟⲩϩⲣⲟⲟⲩ ⲉⲛⲁⲛⲟⲩϥ ⲁⲓⲁⲙⲁϩⲧⲉ ⲙⲙⲟϥ ⲁⲓⲙⲟⲟⲩⲧϥ ϩⲛ ⲥⲉⲕⲉⲗⲁⲕ ⲡⲁⲓ ⲉⲛⲉⲡⲉⲧⲉϣϣⲉ ⲉⲧⲣⲁϯ ⲛⲁϥ ⲛϩⲛⲧⲁⲓⲟ

4:11  ⲧⲉⲛⲟⲩ ϭⲉ ϩⲉⲛⲣⲱⲙⲉ ⲙⲡⲟⲛⲏⲣⲟⲥ ⲁⲩⲙⲟⲩⲟⲧ ⲛⲟⲩⲣⲱⲙⲉ ⲛⲇⲓⲕⲁⲓⲟⲥ ϩⲙ ⲡⲉϥⲏⲓ ϩⲓϫⲙ ⲡⲉϥⲙⲁ ⲛⲛⲕⲟⲧⲕ ⲁⲩⲱ ⲧⲉⲛⲟⲩ ϯⲛⲁϫⲡⲉⲕⲱⲧⲉ ⲛⲥⲁ ⲡⲉϥⲥⲛⲟϥ ⲛⲧⲉⲧⲏⲩⲧⲛ ⲁⲩⲱ ϯⲛⲁⲃⲉⲧⲧⲏⲩⲧⲛ ⲉⲃⲟⲗ ϩⲓϫⲙ ⲡⲕⲁϩ

4:12  ⲇⲁⲩⲉⲓⲇ ⲇⲉ ⲁϥⲟⲩⲉϩⲥⲁϩⲛⲉ ⲛⲛⲉϥϩⲙϩⲁⲗ ⲁⲩϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲣⲟⲟⲩ ⲁⲩⲙⲟⲟⲩⲧⲟⲩ ⲁⲩⲱ ϩⲧⲏⲩ ⲛⲛⲉⲩϭⲓϫ ⲙⲛ ⲛⲉⲩⲟⲩⲉⲣⲏⲧⲉ ⲁⲩⲟϣⲧⲟⲩ ⲉϫⲛ ⲧⲉⲕⲣⲏⲛⲏ ⲉⲧϩⲛⲭⲉⲃⲣⲱⲛ ⲧⲁⲡⲉ ⲇⲉ ⲛⲓⲉⲃⲟⲥⲑⲉ ⲁⲩⲧⲟⲙⲥⲥ ϩⲙ ⲡⲧⲁⲫⲟⲥ ⲛⲁⲃⲉⲛⲛⲏⲣ ⲡϣⲏⲣⲉ ⲛⲛⲏⲣ