CopSahBible2 - II Samuel - 14

14:1  ⲓⲱⲁⲃ ⲇⲉ ⲡϣⲏⲣⲉ ⲛⲥⲁⲣⲟⲩⲉⲓⲁⲥ ⲛⲧⲉⲣⲉϥⲉⲓⲙⲉ ϫⲉ ⲡϩⲏⲧ ⲙⲡⲣⲣⲟ ⲙⲟⲕϩ ⲉϫⲛ ⲁⲃⲉⲥⲥⲁⲗⲱⲙ

14:2  ⲁϥϫⲟⲟⲩ ⲛϭⲓ ⲓⲱⲁⲃ ⲉϩⲣⲁⲓ ⲉⲑⲉⲕⲟⲩⲉ ⲁϥϫⲓ ⲉⲃⲟⲗ ϩⲙ ⲡⲙⲁ ⲉⲧⲙⲙⲁⲩ ⲛⲟⲩⲥϩⲓⲙⲉ ⲛⲥⲟⲫⲏ ⲁⲩⲱ ⲡⲉϫⲁϥ ⲛⲁⲥ ϫⲉ ⲁⲣⲓⲡⲉⲥⲙⲟⲧ ⲙⲡϩⲏⲃⲉ ⲛⲧⲉϯϩⲓⲱⲱⲧⲉ ⲛϩⲉⲛϩⲟⲉⲓⲧⲉ ⲛϩⲏⲃⲉ ⲛⲧⲉⲧⲙⲧⲁϩⲥⲉ ⲛⲛⲉϩ ⲛⲧⲉϣⲱⲡⲉ ⲛⲑⲉ ⲛⲟⲩⲥϩⲓⲙⲉ ⲉⲥⲣϩⲏⲃⲉ ⲉϫⲛ ⲟⲩⲁ ⲉⲁϥⲙⲟⲩ ⲛⲧⲟⲟⲧⲥ ⲉⲓⲥ ϩⲛϩⲟⲟⲩ ⲉⲛⲁϣⲱⲟⲩ

14:3  ⲁⲩⲱ ⲉⲣⲉⲃⲱⲕ ⲉⲣⲁⲧϥ ⲙⲡⲣⲣⲟ ⲛⲧⲉϣⲁϫⲉ ⲙⲡⲉϥⲙⲧⲟ ⲉⲃⲟⲗ ⲕⲁⲧⲁ ⲡⲧⲱϣ ⲙⲡⲉⲓϣⲁϫⲉ ⲓⲱⲁⲃ ⲇⲉ ⲁϥⲕⲱ ⲛⲛⲉϥϣⲁϫⲉ ϩⲛ ⲧⲉⲥⲧⲁⲡⲣⲟ

14:4  ⲁⲩⲱ ⲧⲉⲥϩⲓⲙⲉ ⲧⲉ ⲉⲃⲟⲗ ϩⲛ ⲑⲉⲕⲟⲩⲉ ⲁⲥⲃⲱⲕ ⲉϩⲟⲩⲛ ⲉⲣⲁⲧϥ ⲙⲡⲣⲣⲟ ⲁⲥⲡⲁϩⲧⲥ ⲉϫⲙ ⲡⲕⲁϩ ⲁⲥⲟⲩⲱϣⲧ ⲛⲁϥ ⲁⲩⲱ ⲡⲉϫⲁⲥ ϫⲉ ⲛⲁϩⲙⲉⲧ ⲡⲣⲣⲟ ⲛⲁϩⲙⲉⲧ

14:5  ⲡⲉϫⲉⲡⲣⲣⲟ ϫⲉ ⲟⲩ ⲡⲉ ⲡⲟⲩϩⲱⲃ ⲛⲧⲁϥⲧⲁϩⲟ ⲛⲧⲟⲥ ⲇⲉ ⲡⲉϫⲁⲥ ϫⲉ ⲛⲁⲙⲉ ⲁⲛⲅ ⲟⲩⲥϩⲓⲙⲉ ⲁⲛⲟⲕ ⲛⲭⲏⲣⲁ ⲉⲁ ⲡⲁϩⲁⲓ ⲙⲟⲩ

14:6  ⲧⲉⲕϩⲙϩⲁⲗ ⲇⲉ ⲛⲉⲟⲩⲛⲧⲥ ϣⲏⲣⲉ ⲥⲛⲁⲩ ⲁⲩⲱ ⲁⲩⲧⲱⲟⲩⲛ ⲁⲩⲙⲓϣⲉ ⲙⲛ ⲛⲉⲩⲉⲣⲏⲩ ϩⲛ ⲧⲥⲱϣⲉ ⲛⲉⲙⲛⲡⲉⲧⲛⲁⲃⲱⲕ ⲇⲉ ⲟⲩⲧⲱⲟⲩ ⲉⲧⲣⲉϥⲡⲟⲗϭⲟⲩ ⲁⲡⲟⲩⲁ ⲇⲉ ⲙⲙⲟⲟⲩ ⲉⲛⲧⲟⲟⲧϥ ⲉϫⲙ ⲡⲉϥⲥⲟⲛ ⲁϥⲣⲁϩⲧϥ ⲁϥⲙⲟⲟⲩⲧϥ

14:7  ⲁⲧⲡⲁⲧⲣⲓⲁ ⲧⲏⲣⲥ ⲏ ⲛⲛⲟϭ ⲛⲧⲡⲟⲗⲓⲥ ⲁⲩⲧⲱⲟⲩⲛ ⲉϫⲛ ⲧⲉⲕϩⲙϩⲁⲗ ⲉⲩϫⲱ ⲙⲙⲟⲥ ⲛⲁⲥ ϫⲉ ⲁⲩⲉⲓⲥ ⲁⲩⲉⲡⲉⲛⲧⲁϥⲙⲉⲟⲩⲧ ⲡⲉϥⲥⲟⲛ ⲛⲧⲁⲣⲉⲛⲧⲁⲕⲟϥ ⲉⲡⲙⲁ ⲛⲧⲉⲯⲩⲭⲏ ⲙⲡⲏ ⲡⲁⲓ ⲛⲧⲁϥⲙⲟⲟⲩⲧϥ ⲛⲧⲉⲛϥⲓ ⲛⲧⲙⲏⲧⲉ ⲙⲡⲉⲧⲛⲕⲗⲏⲣⲟⲛⲟⲙⲟⲥ ⲛⲥⲉϫⲉⲛⲁ ⲛⲧⲁϫⲏⲃⲥ ⲏ ⲡⲁⲕⲉⲟⲩⲟⲉⲓⲛ ⲛⲧⲁϥⲥⲉⲉⲡⲉ ⲛⲁⲓ ϩⲱⲥⲧⲉ ⲉⲧⲙϣⲱϫⲡ ⲉⲡⲁϩⲟⲩ ⲙⲡⲣⲡⲙⲉⲉⲩⲉ ⲙⲡⲁϩⲁⲓ ⲛⲟⲩϣⲃⲃⲓⲱ ⲁⲩⲱ ⲟⲩⲣⲁⲛ ϩⲓϫⲙ ⲡϩⲟ ⲙⲡⲕⲁϩ

14:8  ⲡⲉϫⲉⲡⲣⲣⲟ ⲛⲁⲥ ϫⲉ ⲃⲱⲕ ϩⲛ ⲟⲩⲟⲩϫⲁⲓ ⲉⲡⲟⲩⲏⲓ ⲁⲩⲱ ⲁⲛⲟⲕ ϯⲛⲁⲟⲩⲉϩⲥⲁϩⲛⲉ ⲉⲧⲃⲏⲏⲧⲉ

14:9  ⲡⲉϫⲉⲧⲉⲥϩⲓⲙⲉ ⲧⲉ ⲉⲃⲟⲗ ϩⲛ ⲑⲉⲕⲟⲩⲉ ϫⲉ ⲡⲁϫⲟⲉⲓⲥ ⲡⲣⲣⲟ ⲉⲣⲉⲧⲁⲛⲟⲙⲓⲁ ϩⲓϫⲱⲓ ⲁⲩⲱ ⲉϫⲙ ⲡⲏⲓ ⲙⲡⲁⲉⲓⲱⲧ ⲡⲣⲣⲟ ⲇⲉ ⲁⲩⲱ ⲡⲉⲑⲣⲟⲛⲟⲥ ⲙⲡⲉⲕⲉⲟⲟⲩ ⲟⲩⲁⲁϥ

14:10  ⲡⲉϫⲉⲡⲣⲣⲟ ⲛⲁⲥ ϫⲉ ⲛⲓⲙ ⲡⲉⲧⲧⲟⲛϩ ⲛⲙⲙⲉ ⲁⲛⲓϥ ⲉⲣⲁⲧ ⲁⲩⲱ ⲛϥⲛⲁⲕⲧⲟϥ ϭⲉ ⲁⲛ ⲉⲧⲟⲛⲁϩϥ ⲙⲙⲟ

14:11  ⲡⲉϫⲉⲧⲉⲥϩⲓⲙⲉ ϩⲓⲑⲏ ⲙⲡⲣⲣⲟ ϫⲉ ⲙⲁⲣⲉⲡⲁϫⲟⲉⲓⲥ ⲡⲣⲣⲟ ⲣⲡⲙⲉⲉⲩⲉ ⲙⲡϫⲟⲉⲓⲥ ⲡⲉϥⲛⲟⲩⲧⲉ ⲉⲧⲁϣⲉ ⲡⲉⲧϫⲓ ⲉϩⲟⲩⲛ ⲉⲣⲟⲓ ⲕⲁⲧⲁ ⲡⲁⲥⲛⲟϥ ⲉⲧⲙⲧⲁⲕⲟϥ ⲛⲥⲉⲧⲙϥⲓ ⲙⲡⲁϣⲏⲣⲉ ⲛⲧⲙⲏⲧⲉ ⲡⲉϫⲉ ⲛⲁⲥ ϫⲉ ϥⲟⲛϩ ⲛϭⲓ ⲡϫⲟⲉⲓⲥ ϫⲉ ⲉϣⲱⲡⲉ ⲟⲩⲛⲟⲩⲃⲱ ⲛⲟⲩⲱⲧ ⲛⲧⲉ ⲧⲁⲡⲏ ⲙⲡⲟⲩϣⲏⲣⲉ ⲛⲁϩⲉ ⲉϫⲙ ⲡⲕⲁϩ

14:12  ⲡⲉϫⲉⲧⲉⲥϩⲓⲙⲉ ϩⲓⲑⲏ ⲙⲡⲣⲣⲟ ϫⲉ ⲁⲛⲟⲕ ⲧⲉⲕϩⲙϩⲁⲗ ⲙⲁⲣⲓϩⲉ ⲉⲑⲏ ⲛϣⲁϫⲉ ⲙⲛ ⲡⲁϫⲟⲉⲓⲥ ϩⲛ ⲟⲩϣⲁϫⲉ ⲡⲉϫⲉⲡⲣⲣⲟ ϫⲉ ϣⲁϫⲉ

14:13  ⲡⲉϫⲉⲧⲉⲥϩⲓⲙⲉ ϫⲉ ⲉⲧⲃⲉ ⲟⲩ ⲁⲕⲙⲉⲉⲩⲉ ⲛⲧⲉⲓⲙⲓⲛⲉ ⲉϫⲙ ⲡⲗⲁⲟⲥ ⲙⲡⲛⲟⲩⲧⲉ ⲏ ⲛⲧⲉⲡⲉⲓϣⲁϫⲉ ⲉⲓ ⲉⲃⲟⲗ ϩⲛ ⲣⲱϥ ⲙⲡⲣⲣⲟ ⲛⲑⲉ ⲛⲟⲩⲛⲟⲃⲉ ⲛⲧⲉⲧⲙⲡⲣⲣⲟ ⲕⲧⲟ ⲙⲡⲉⲧⲏⲡ ⲉⲣⲟϥ ⲉⲁⲩⲛⲟϫϥ ⲉⲃⲟⲗ

14:14  ϫⲉ ⲛⲧⲉⲓϩⲉ ϩⲛ ⲟⲩⲙⲟⲩ ⲧⲉⲛⲛⲁⲙⲟⲩ ⲡⲉ ⲁⲩⲱ ⲛⲑⲉ ⲙⲡⲙⲟⲟⲩ ⲉϣⲁϥⲡⲱⲛ ⲉϫⲙ ⲡⲕⲁϩ ⲛⲥⲉⲛⲁⲉϣⲟⲗϥ ⲁⲛ ⲉϩⲟⲩⲛ ⲧⲁⲓ ⲧⲉ ⲑⲉ ⲙⲡⲛⲟⲩⲧⲉ ⲛⲁϫⲓ ⲁⲛ ⲛⲧⲉⲯⲩⲭⲏ ⲙⲡⲉⲧⲙⲟⲕⲙⲉⲕ ⲉⲛⲟⲩϫⲉ ⲉⲃⲟⲗ ⲙⲙⲟϥ ⲙⲡⲉⲛⲧⲁϥⲣⲡⲉϥⲃⲟⲗ

14:15  ⲧⲉⲛⲟⲩ ϭⲉ ⲡϣⲁϫⲉ ⲛⲧⲁⲓⲉⲓ ⲉⲧⲃⲏⲏⲧϥ ⲉⲧⲁⲩⲟϥ ⲉⲡⲁϫⲟⲉⲓⲥ ⲡⲣⲣⲟ ⲡⲁⲓ ⲡⲉ ⲡⲗⲁⲟⲥ ϥⲛⲁⲛⲁⲩ ⲉⲣⲟⲓ ⲛϥϣⲁϫⲉ ⲧⲉⲕϩⲙϩⲁⲗ ⲇⲉ ⲉⲧⲉⲁⲛⲟⲕ ⲧⲉ ⲙⲁⲣⲉⲥϣⲁϫⲉ ⲙⲛ ⲡⲣⲣⲟ ϫⲉ ⲙⲉϣⲁⲕ ⲉⲣⲉⲡⲣⲣⲟ ⲉⲓⲣⲉ ⲙⲡϣⲁϫⲉ ⲛⲧⲉϥϩⲙϩⲁⲗ

14:16  ϫⲉ ⲡⲣⲣⲟ ⲉϥⲉⲥⲱⲧⲙ ⲛϥⲛⲟⲩϩⲙ ⲛⲧⲉϥϩⲙϩⲁⲗ ⲛⲧⲟⲟⲧϥ ⲙⲡⲣⲱⲙⲉ ⲉⲧⲕⲱⲧⲉ ⲛⲥⲁ ⲑⲏ ⲛⲃⲓⲧⲧ ⲙⲙⲁⲩ ⲙⲛ ⲡⲁⲕⲉϣⲏⲣⲉ ⲉⲃⲟⲗ ϩⲛ ⲧⲉⲕⲗⲏⲣⲟⲛⲟⲙⲓⲁ ⲙⲡⲛⲟⲩⲧⲉ

14:17  ⲡⲉϫⲉⲧⲉⲥϩⲓⲙⲉ ⲟⲛ ϫⲉ ⲉⲣⲉⲡϣⲁϫⲉ ⲙⲡⲁϫⲟⲉⲓⲥ ⲡⲣⲣⲟ ϣⲱⲡⲉ ⲉⲩⲑⲩⲥⲓⲁ ϫⲉ ⲕⲁⲧⲁ ⲑⲉ ⲛⲟⲩⲁⲅⲅⲉⲗⲟⲥ ⲛⲧⲉ ⲡⲛⲟⲩⲧⲉ ⲧⲁⲓ ϩⲱⲱϥ ⲧⲉ ⲑⲉ ⲙⲡⲁϫⲟⲉⲓⲥ ⲡⲣⲣⲟ ⲉⲧⲣⲉϥⲥⲱⲧⲙ ⲉⲡⲁⲅⲁⲑⲟⲛ ⲁⲩⲱ ⲉⲡⲡⲟⲛⲏⲣⲟⲛ ⲁⲩⲱ ⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁϣⲱⲡⲉ ⲛⲙⲙⲁⲕ

14:18  ⲡⲣⲣⲟ ⲇⲉ ⲁϥⲟⲩⲱϣⲃ ⲡⲉϫⲁϥ ⲛⲧⲉⲥϩⲓⲙⲉ ϫⲉ ⲙⲡⲣϩⲉⲡⲡⲉⲓϣⲁϫⲉ ⲉⲣⲟⲓ ⲡⲁⲓ ⲉϯⲛⲁϫⲟⲟϥ ⲉⲣⲟ ⲁⲛⲟⲕ ⲡⲉϫⲉⲧⲉⲥϩⲓⲙⲉ ⲛⲁϥ ϫⲉ ⲙⲁⲣⲉⲡⲁϫⲟⲉⲓⲥ ⲡⲣⲣⲟ ϣⲁϫⲉ

14:19  ⲡⲉϫⲉⲡⲣⲣⲟ ⲛⲁⲥ ϫⲉ ⲙⲏ ⲧⲟⲟⲧϥ ⲛⲓⲓⲱⲁⲃ ⲥⲙⲟⲛⲧ ⲛⲙⲙⲉ ϩⲙ ⲡⲉⲓϣⲁϫⲉ ⲡⲉϫⲉⲧⲉⲥϩⲓⲙⲉ ϩⲓⲑⲏ ⲙⲡⲣⲣⲟ ϫⲉ ⲧⲉⲕⲯⲩⲭⲏ ⲟⲛϩ ⲡⲁϫⲟⲉⲓⲥ ⲡⲣⲣⲟ ⲉϣⲱⲡⲉ ⲟⲩⲛ ⲥⲁ ⲟⲩⲛⲁⲙ ⲏ ⲛⲥⲁ ϩⲃⲟⲩⲣ ⲉϥϣⲟⲃⲉ ⲉⲃⲟⲗ ϩⲛ ⲛⲉϣⲁϫⲉ ⲧⲏⲣⲟⲩ ⲛⲧⲁⲡⲁϫⲟⲉⲓⲥ ⲡⲣⲣⲟ ϫⲟⲟⲩ ϫⲉ ⲡⲉⲕϩⲙϩⲁⲗ ⲓⲱⲁⲃ ⲛⲧⲟϥ ⲡⲉⲛⲧⲁϥϩⲱⲛ ⲉⲧⲟⲟⲧ ⲁⲩⲱ ⲛⲧⲟϥ ⲡⲉ ⲛⲧⲁϥⲕⲱ ϩⲛ ⲧⲧⲁⲡⲣⲟ ⲛⲧⲉⲕϩⲙϩⲁⲗ ⲛⲛⲉⲓϣⲁϫⲉ ⲧⲏⲣⲟⲩ

14:20  ⲉⲧⲣⲉϥⲁϩⲉⲣⲁⲧϥ ⲛϭⲓ ⲡⲧⲱϣ ⲙⲡⲉⲓϣⲁϫⲉ ⲡⲁⲓ ⲛⲧⲁⲡⲉⲕϩⲙϩⲁⲗ ⲓⲱⲁⲃ ⲁⲁϥ ⲉⲧⲉⲡⲉⲓϣⲁϫⲉ ⲡⲉ ⲁⲩⲱ ⲡⲁϫⲟⲉⲓⲥ ⲡⲣⲣⲟ ⲟⲩⲥⲟⲫⲟⲥ ⲡⲉ ⲛⲑⲉ ⲛⲧⲥⲟⲫⲓⲁ ⲛⲟⲩⲁⲅⲅⲉⲗⲟⲥ ⲛⲧⲉ ⲡⲛⲟⲩⲧⲉ ⲉⲧⲣⲉϥⲥⲟⲩⲉⲛϩⲱⲃ ⲛⲓⲙ ⲉⲧϣⲟⲟⲡ ϩⲙ ⲡⲕⲁϩ

14:21  ⲡⲉϫⲉⲡⲣⲣⲟ ⲉϩⲟⲩⲛ ϩⲛ ⲓⲱⲁⲃ ϫⲉ ⲉⲓⲥ ϩⲏⲏⲧⲉ ⲁⲓⲉⲓⲣⲉ ⲙⲡⲉⲕϣⲁϫⲉ ⲉⲧⲉⲡⲁⲓ ⲡⲉ ⲃⲱⲕ ⲛⲅⲕⲧⲟ ⲙⲡϣⲏⲣⲉ ϣⲏⲙ ⲉⲧⲉⲁⲃⲉⲥⲥⲁⲗⲱⲙ ⲡⲉ

14:22  ⲁⲩⲱ ⲓⲱⲁⲃ ⲁϥⲡⲁϩⲧϥ ϩⲓⲑⲏ ⲙⲙⲟϥ ⲉϫⲙ ⲡⲕⲁϩ ⲁϥⲟⲩⲱϣⲧ ⲁⲩⲱ ⲁϥⲥⲙⲟⲩ ⲉⲡⲣⲣⲟ ⲡⲉϫⲉⲓⲱⲁⲃ ϩⲓⲑⲏ ⲙⲙⲟϥ ϫⲉ ⲙⲡⲟⲟⲩ ⲁⲡⲉⲕϩⲙϩⲁⲗ ⲉⲓⲙⲉ ϫⲉ ⲁⲓϭⲉⲛⲭⲁⲣⲓⲥ ⲛⲁϩⲣⲁⲕ ⲡⲁϫⲟⲉⲓⲥ ⲡⲣⲣⲟ ϫⲉ ⲡⲁϫⲟⲉⲓⲥ ⲡⲣⲣⲟ ⲁϥⲉⲓⲣⲉ ⲙⲡϣⲁϫⲉ ⲙⲡⲉϥϩⲙϩⲁⲗ

14:23  ⲓⲱⲁⲃ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉϩⲣⲁⲓ ⲉⲅⲉⲇⲥⲟⲩⲣ ⲁϥⲉⲓⲛⲉ ⲛⲁⲃⲉⲥⲥⲁⲗⲱⲙ ⲉϩⲣⲁⲓ ⲉⲑ

14:24  ⲡⲣⲣⲟ ⲇⲉ ⲡⲉϫⲁϥ ⲛⲓⲱⲁⲃ ϫⲉ ⲙⲁⲣⲉϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲛϥⲧⲉⲙⲉⲓ ⲉϩⲟⲩⲛ ⲉϩⲣⲁⲓ ⲁⲃⲉⲥⲥⲁⲗⲱⲙ ⲇⲉ ⲁϥⲃⲱⲕ ⲉϩⲣⲁⲓ ⲉⲡⲉϥⲏⲓ ⲁⲩⲱ ⲡϩⲟ ⲙⲡⲣⲣⲟ ⲙⲡⲉϥⲉⲓⲟⲣϩϥ

14:25  ⲁⲩⲱ ⲛⲉⲙⲛ ϭⲉ ⲣⲱⲙⲉ ϩⲙ ⲡ ⲧⲏⲣϥ ⲛⲑⲉ ⲛⲁⲃⲉⲥⲥⲁⲗⲱⲙ ⲉⲛⲉⲥⲱϥ ⲏ ⲉϥⲧⲏϣ ⲉⲙⲁⲧⲉ ϫⲓⲛ ⲛⲉⲉⲓⲃ ⲛⲣⲁⲧϥ ϣⲁ ⲉϩⲣⲁⲓ ⲉⲧⲉϥⲁⲡⲉ ⲉⲙⲛⲗⲁⲁⲩ ⲛϫⲃⲓⲛ ϩⲓⲱⲱϥ

14:26  ⲁⲩⲱ ⲟⲛ ⲛⲉ ϩⲙ ⲡⲧⲣⲉϥϣⲉϥⲡⲉϥⲃⲱ ⲁⲩⲱ ⲟⲛ ⲛϫⲓⲛ ⲡⲧⲱϣ ⲛϩⲏ ⲛⲛⲉϩⲟⲟⲩ ⲉⲛⲉϩⲟⲟⲩ ⲉϥϣⲁⲛⲧⲱϣ ⲉϣⲉϥⲡⲉϥⲃⲱ ϩⲙ ⲡⲧⲣⲉϥϣⲓⲁⲓ ϩⲓϫⲱϥ ⲁⲩⲱ ⲡⲃⲱ ⲛⲧⲉϥⲁⲡⲉ ⲉϥϣⲁⲛϣⲟϥϥ ϣⲁϥϣⲓⲧϥ ⲛϥⲣϣⲏⲧ ⲛⲥⲁⲧⲉⲉⲣⲉ ⲛϩⲣⲏϣⲉ ϩⲛ ⲧⲥⲁⲧⲉⲉⲣⲉ ⲙⲡⲣⲣⲟ

14:27  ⲁⲩⲱ ⲁⲃⲏⲥⲁⲗⲱⲙ ⲁϥϫⲡⲉϣⲟⲙⲛⲧ ⲛϣⲏⲣⲉ ⲛⲁϥ ⲙⲛ ⲟⲩϣⲉⲉⲣⲉ ⲉⲡⲉⲥⲣⲁⲛ ⲡⲉ ⲑⲏⲙⲁⲣ ⲧⲁⲓ ⲇⲉ ⲉⲛⲉⲟⲩⲥϩⲓⲙⲉ ⲧⲉ ⲉⲛⲉⲥⲉ ⲡⲉⲥϩⲣⲃ ⲉⲙⲁⲧⲉ ⲁⲩⲱ ⲁⲥⲣⲥϩⲓⲙⲉ ⲛϩⲣⲟⲃⲟⲁⲙ ⲡϣⲏⲣⲉ ⲛⲥⲁⲗⲱⲙⲱⲛ ⲁⲥϫⲡⲟ ⲛⲁϥ ⲛⲁⲃⲓⲁ

14:28  ⲁⲃⲉⲥⲥⲁⲗⲱⲙ ⲇⲉ ⲁϥϩⲙⲟⲟⲥ ϩⲛ ⲑ ⲛⲣⲟⲙⲡⲉ ⲥⲛⲧⲉ ⲛϩⲟⲟⲩ ⲙⲡⲉϥⲛⲁⲩ ⲉⲡϩⲟ ⲙⲡⲣⲣⲟ

14:29  ⲁⲃⲉⲥⲥⲁⲗⲱⲙ ⲇⲉ ⲁϥⲙⲟⲩⲧⲉ ⲉⲓⲱⲁⲃ ⲉⲧⲣⲉϥϫⲟⲟⲩϥ ⲉⲣⲁⲧϥ ⲙⲡⲣⲣⲟ ⲁⲩⲱ ⲙⲡⲉϥⲟⲩⲱϣ ⲉⲉⲓ ⲉⲣⲁⲧϥ ⲁϥϫⲟⲟⲩ ⲟⲛ ⲙⲡⲙⲉϩⲥⲉⲡ ⲥⲛⲁⲩ ⲁⲩⲱ ⲙⲡⲉϥⲟⲩⲱϣ ⲉⲉⲓ ⲛⲁϥ

14:30  ⲡⲉϫⲉⲁⲃⲉⲥⲥⲥⲁⲗⲱⲙ ⲛⲛⲉϥϩⲙϩⲁⲗ ϫⲉ ⲉⲓⲥ ⲧⲙⲉⲣⲓⲥ ⲏ ⲡⲉϫⲛⲟⲟⲩ ϩⲛ ⲧⲥⲱϣⲉ ⲛⲓⲱⲁⲃ ⲉϥϩⲏⲛ ⲉⲣⲟⲓ ⲉⲣⲉϩⲉⲛⲉⲓⲱⲧ ϣⲟⲟⲡ ⲛⲁϥ ⲛϩⲏⲧϥ ⲃⲱⲕ ⲛⲧⲉⲧⲛⲣⲟⲕϩϥ ϩⲛ ⲟⲩⲥⲁⲧⲉ ⲁⲩⲱ ⲛϩⲙϩⲁⲗ ⲛⲁⲃⲉⲥⲥⲁⲗⲱⲙ ⲁⲩⲣⲱⲕϩ ⲛⲧⲙⲉⲣⲓⲥ ⲛⲉⲓⲱⲧ ϩⲛ ⲟⲩⲥⲁⲧⲉ ⲛϩⲙϩⲁⲗ ⲇⲉ ⲛⲓⲱⲁⲃ ⲁⲩⲃⲱⲕ ⲉⲣⲁⲧϥ ⲛⲓⲱⲁⲃ ⲉⲣⲉⲛⲉⲩϩⲟⲉⲓⲧⲉ ⲡⲏϩ ϩⲓⲱⲟⲩ ⲡⲉϫⲁⲩ ⲙⲡⲉⲩϫⲟⲉⲓⲥ ϫⲉ ⲛϩⲙϩⲁⲗ ⲛⲁⲃⲉⲥⲥⲁⲗⲱⲙ ⲁⲩϯ ⲙⲡⲕⲱϩⲧ ⲛⲧⲙⲉⲣⲓⲥ ⲛⲉⲓⲱⲧ

14:31  ⲓⲱⲁⲃ ⲇⲉ ⲁϥⲧⲱⲟⲩⲛ ⲁϥⲃⲱⲕ ⲉⲣⲁⲧϥ ⲛⲁⲃⲉⲥⲥⲁⲗⲱⲙ ⲉⲡⲉϥⲏⲓ ⲡⲉϫⲁϥ ⲛⲁϥ ϫⲉ ⲉⲧⲃⲉ ⲟⲩ ⲛⲉⲕϩⲙϩⲁⲗ ⲁⲩϯⲡⲕⲱϩⲧ ⲉⲧⲁⲙⲉⲣⲓⲥ ⲁⲩⲣⲟⲕϩⲥ

14:32  ⲡⲉϫⲉⲁⲃⲉⲥⲥⲁⲗⲱⲙ ⲛⲓⲱⲁⲃ ϫⲉ ⲁⲓⲧⲛⲛⲟⲟⲩ ⲛⲁⲕ ⲛⲟⲩⲥⲟⲡ ⲁⲩⲱ ⲥⲛⲁⲩ ⲉⲓϫⲱ ⲙⲙⲟⲥ ϫⲉ ⲁⲙⲟⲩ ϣⲁⲣⲟⲓ ϫⲉ ⲉⲓⲉϫⲟⲟⲩⲕ ⲉⲣⲁⲧϥ ⲙⲡⲣⲣⲟ ⲛⲅϫⲟⲟⲥ ⲛⲁϥ ϫⲉ ⲉⲧⲃⲉ ⲟⲩ ⲁⲓⲉⲓ ⲉⲃⲟⲗ ϩⲛ ⲅⲉⲇⲥⲟⲩⲣ ⲛⲉ ⲟⲩⲁⲅⲁⲑⲟⲛ ⲛⲁⲓ ⲡⲉ ⲉⲧⲣⲁϭⲱ ⲙⲙⲁⲩ ⲡⲉ ⲁⲩⲱ ⲉⲓⲥ ϩⲏⲏⲧⲉ ϣⲁ ⲧⲉⲛⲟⲩ ⲙⲡⲓⲛⲁⲩ ⲉⲡϩⲟ ⲙⲡⲣⲣⲟ ⲉϣϫⲉ ⲟⲩⲛⲁⲇⲓⲕⲓⲁ ⲇⲉ ⲛϩⲏⲧϥ ⲉⲓⲉ ⲙⲟⲟⲩⲧ

14:33  ⲓⲱⲁⲃ ⲇⲉ ⲁϥϯ ⲙⲡⲉϥⲟⲩⲟⲓ ⲉϩⲟⲩⲛ ⲉⲡⲣⲣⲟ ⲁϥⲧⲁⲩⲟ ⲉⲣⲟϥ ⲛⲛⲉⲓϣⲁϫⲉ ⲁⲩⲱ ⲁϥⲙⲟⲩⲧⲉ ⲉⲁⲃⲏⲥⲁⲗⲱⲙ ⲁϥⲃⲱⲕ ⲉϩⲟⲩⲛ ϣⲁ ⲡⲣⲣⲟ ⲁϥⲡⲁϩⲧϥ ⲉϫⲙ ⲡⲕⲁϩ ϩⲓⲑⲏ ⲙⲡⲣⲣⲟ ⲁϥⲟⲩⲱϣⲧ ⲛⲁϥ ⲁⲩⲱ ⲡⲣⲣⲟ ⲁϥϯⲡⲓ ⲉⲣⲱϥ ⲛⲁⲃⲉⲥⲥⲁⲗⲱⲙ