CopSahBible2 - II Samuel - 22

22:1  ⲇⲁⲩⲉⲓⲇ ⲇⲉ ⲁϥⲧⲁⲩⲟ ⲉⲡϫⲟⲉⲓⲥ ⲛⲛϣⲁϫⲉ ⲛⲧⲉⲓⲱⲇⲏ ϩⲙ ⲡⲉϩⲟⲟⲩ ⲛⲧⲁⲡϫⲟⲉⲓⲥ ⲛⲁϩⲙⲉϥ ⲛⲧⲟⲟⲧⲟⲩ ⲛⲛⲉϥϫⲁϫⲉ ⲧⲏⲣⲟⲩ ⲁⲩⲱ ⲛⲧⲟⲟⲧϥ ⲛⲥⲁⲟⲩⲗ

22:2  ⲉϥϫⲱ ⲙⲙⲟⲥ ϫⲉ ⲡϫⲟⲉⲓⲥ ⲛⲧⲟⲕ ⲡⲉ ⲡⲁⲧⲁϫⲣⲟ ⲁⲩⲱ ⲡⲁⲙⲁ ⲙⲡⲱⲧ ⲉϥⲛⲟⲩϩⲙ ⲙⲙⲟⲓ

22:3  ⲡⲁⲛⲟⲩⲧⲉ ⲡⲉ ⲡⲁⲟⲩⲟⲉⲓⲛ ⲛⲧⲟϥ ⲡⲉⲧⲛⲁϩⲁⲣⲉϩ ⲉⲣⲟⲓ ϯⲛⲁϣⲱⲡⲉ ⲉⲓⲕⲱ ⲛϩⲧⲏⲓ ⲉⲣⲟϥ ⲛⲧⲟϥ ⲡⲉ ⲧⲁⲛⲁϣⲧⲉ ⲁⲩⲱ ⲡⲧⲁⲡ ⲙⲡⲁⲟⲩϫⲁⲓ ⲡⲁⲣⲉϥϣⲟⲡⲧ ⲉⲣⲟϥ ⲛⲧⲟϥ ⲡⲉ ⲡⲙⲁ ⲙⲡⲱⲧ ⲙⲡⲁⲟⲩϫⲁⲓ ⲉϥⲛⲁⲛⲁϩⲙⲉⲧ ⲛⲧⲟⲟⲧϥ ⲙⲡⲣⲉϥϫⲓⲛϭⲟⲛⲥ

22:4  ⲡϫⲟⲉⲓⲥ ⲥⲙⲁⲙⲁⲁⲧ ϯⲛⲁⲉⲡⲓⲕⲁⲗⲉⲓ ⲙⲙⲟϥ ⲁⲩⲱ ϯⲛⲁⲛⲟⲩϩⲙ ⲛⲧⲟⲟⲧⲟⲩ ⲛⲛⲁϫⲁϫⲉ

22:5  ϫⲉ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲙⲙⲟⲕϩⲥ ⲙⲡⲙⲟⲩ ⲁⲩⲱ ⲙⲙⲟⲩ ⲛⲥⲱⲣⲙ ⲛⲧⲁⲁⲛⲟⲙⲓⲁ ⲁⲩⲑⲉⲣϣⲁⲓ

22:6  ⲛⲛⲁⲁⲕⲉ ⲛⲁⲙⲛⲧⲉ ⲁⲩⲕⲱⲧⲉ ⲉⲣⲟⲓ ⲁⲩⲱ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲛϭⲟⲣϭⲥ ⲙⲡⲙⲟⲩ

22:7  ϩⲙ ⲡⲧⲣⲁⲑⲗⲓⲃⲉ ϯⲛⲁⲉⲡⲓⲕⲁⲗⲉⲓ ⲙⲡϫⲟⲉⲓⲥ ⲁⲩⲱ ϯⲛⲁⲱϣ ⲉⲃⲟⲗ ⲉϩⲣⲁⲓ ⲉⲡⲁⲛⲟⲩⲧⲉ ⲛϥⲥⲱⲧⲙ ⲉⲡⲁϩⲣⲟⲟⲩ ⲉⲃⲟⲗ ϩⲙ ⲡⲉϥⲣⲡⲉ ⲉⲧⲟⲩⲁⲁⲃ ⲁⲩⲱ ⲡⲁⲁϣⲕⲁⲕ ϩⲛ ⲛⲉϥⲙⲁⲁϫⲉ

22:8  ⲁϥϭⲱϣⲧ ⲉϫⲙ ⲡⲕⲁϩ ⲁⲩⲱ ⲁϥⲛⲟⲉⲓⲛ ⲁⲩⲱ ⲛⲥⲛⲧⲉ ⲛⲧⲡⲉ ⲁⲩϣⲧⲟⲣⲧⲣ ϫⲉ ⲁⲡϫⲟⲉⲓⲥ ϭⲱⲛⲧ ⲉⲣⲟⲟⲩ

22:9  ⲟⲩⲕⲁⲡⲛⲟⲥ ⲁϥⲉⲓ ⲉϩⲣⲁⲓ ϩⲛ ⲧⲉϥⲟⲣⲅⲏ ⲁⲩⲱ ⲟⲩⲥⲁⲧⲉ ⲉⲃⲟⲗ ϩⲛ ⲧⲉϥⲧⲁⲡⲣⲟ ⲥⲛⲁⲟⲩⲱⲙ ϩⲉⲛϫⲃⲃⲉⲥ ⲁⲩⲙⲟⲩϩ ⲉⲃⲟⲗ ϩⲓⲧⲟⲟⲧϥ

22:10  ⲙⲡⲏⲩⲉ ⲁϥⲣⲁⲕⲧⲟⲩ ⲁϥⲉⲓ ⲉⲡⲉⲥⲏⲧ ⲟⲩϭⲟⲥⲙ ⲉϥϣⲟⲟⲡ ϩⲁ ⲛⲉϥⲟⲩⲉⲣⲏⲧⲉ

22:11  ⲁϥϩⲙⲟⲟⲥ ϩⲓϫⲛ ⲛⲉⲭⲁⲓⲣⲟⲩⲃⲓⲛ ⲁϥϩⲱⲗ ⲉⲃⲟⲗ ⲁⲩⲱ ⲁϥⲟⲩⲱⲛϩ ⲉⲃⲟⲗ ϩⲓϫⲛ ⲛⲉⲧⲛϩ ⲙⲡⲧⲏⲩ

22:12  ⲁϥⲕⲱ ⲛⲟⲩⲕⲁⲕⲉ ϩⲓϩⲏ ⲙⲙⲟϥ ⲧⲉϥⲥⲕⲏⲛⲏ ⲉⲥϣⲟⲟⲡ ϩⲙ ⲡⲉϥⲕⲱⲧⲉ ϩⲛⲙⲟⲟⲩ ⲛⲕⲁⲕⲉ ⲁⲩⲟⲩⲙⲟⲧ ⲏ ⲁⲩⲁϣⲁⲓ ϩⲛ ⲛⲉⲕⲗⲟⲟⲗⲉ ⲛⲁⲏⲣ

22:13  ⲉⲃⲟⲗ ϩⲙ ⲡⲉϥⲟⲩⲟⲉⲓⲛ ⲛⲉⲕⲗⲟⲟⲗⲉ ⲁⲩⲙⲟⲟϣⲉ ϩⲓϩⲏ ⲙⲙⲟϥ ϩⲛϫⲃⲃⲉⲥ ⲛⲥⲁⲧⲉ ⲁⲩⲙⲟⲩϩ

22:14  ⲡϫⲟⲉⲓⲥ ⲁϥϯϩⲣⲟⲩⲃⲁⲓ ⲉⲃⲟⲗ ϩⲛ ⲧⲡⲉ ⲁⲩⲱ ⲡⲡⲉⲧϫⲟⲥⲉ ⲁϥϯ ⲙⲡⲉϥϩⲣⲟⲟⲩ

22:15  ⲁϥϫⲟⲟⲩ ⲉⲃⲟⲗ ⲛⲛⲉϥⲥⲟⲧⲉ ⲁⲩⲱ ⲁϥϫⲟⲟⲣⲟⲩ ⲉⲃⲟⲗ ϩⲛⲉⲃⲣⲏϭⲉ ⲁϥⲧⲁϣⲟⲟⲩ ⲁⲩⲱ ⲁϥϣⲧⲣⲧⲱⲣⲟⲩ

22:16  ⲁⲩⲟⲩⲱⲛϩ ⲉⲃⲟⲗ ⲛϭⲓ ϩⲉⲛⲡⲏⲅⲏ ⲙⲙⲟⲟⲩ ⲁⲩⲱ ⲁⲩϭⲱⲗⲡ ⲉⲃⲟⲗ ⲛϭⲓ ⲛⲥⲛⲧⲉ ⲛⲧⲟⲓⲕⲟⲩⲙⲉⲛⲏ ϩⲛ ⲑⲟⲧⲉ ⲙⲡϫⲟⲉⲓⲥ ⲉⲃⲟⲗ ϩⲙ ⲡⲛⲓϥⲉ ⲙⲡⲉ ⲛⲧⲉϥⲟⲣⲅⲏ

22:17  ⲁϥⲧⲛⲛⲟⲟⲩ ⲉⲃⲟⲗ ϩⲙ ⲡϫⲓⲥⲉ ⲁϥϫⲓⲧ ⲁϥϣⲟⲡⲧ ⲉⲣⲟϥ ⲉⲃⲟⲗ ϩⲛ ϩⲉⲛⲙⲟⲟⲩ ⲉⲛⲁϣⲱⲟⲩ

22:18  ⲁϥⲛⲁϩⲙⲉⲧ ⲛⲧⲟⲟⲧⲟⲩ ⲛⲛⲁϫⲁϫⲉ ⲉⲧϭⲙϭⲟⲙ ⲁⲩⲱ ⲛⲧⲟⲟⲧⲟⲩ ⲛⲛⲉⲧⲙⲟⲥⲧⲉ ⲙⲙⲟⲓ ϫⲉ ⲁⲩⲧⲁϫⲣⲟ ⲉϩⲟⲩⲉ ⲉⲣⲟⲓ

22:19  ⲁⲩⲱ ⲁⲩⲁϩⲉⲣⲁⲧⲟⲩ ⲉⲣⲟⲓ ⲛϭⲓ ⲛⲉϩⲟⲟⲩ ⲛⲧⲁⲑⲗⲓⲯⲓⲥ ⲁⲩⲱ ⲡϫⲟⲉⲓⲥ ⲁϥϣⲱⲡⲉ ⲛⲁⲓ ⲛⲧⲁϫⲣⲟ

22:20  ⲁⲩⲱ ⲁϥⲟⲩⲱϣⲥ ⲛⲁⲓ ⲉⲃⲟⲗ ⲁϥⲛⲁϩⲙⲉⲧ ϫⲉ ⲁⲡⲉϥⲟⲩⲱϣ ϣⲱⲡⲉ ⲛϩⲏⲧ

22:21  ⲁⲩⲱ ⲡϫⲟⲉⲓⲥ ⲁϥⲧⲱⲱⲃⲉ ⲛⲁⲓ ⲕⲁⲧⲁ ⲧⲁⲓⲇⲓⲕⲁⲓⲟⲥⲩⲛⲏ ⲁⲩⲱ ⲕⲁⲧⲁ ⲡⲧⲃⲃⲟ ⲛⲛⲁϭⲓϫ ⲁϥⲧⲱⲱⲃⲉ ⲛⲁⲓ

22:22  ϫⲉ ⲁⲓϩⲁⲣⲉϩ ⲉⲛⲉϩⲓⲟⲟⲩⲉ ⲙⲡϫⲟⲉⲓⲥ ⲁⲩⲱ ⲙⲡⲓⲣϣⲁϥⲧⲉ ⲉⲡⲁⲛⲟⲩⲧⲉ

22:23  ϫⲉ ⲛⲉϥϩⲁⲡ ⲧⲏⲣⲟⲩ ⲙⲡⲁⲙⲧⲟ ⲉⲃⲟⲗ ⲁⲩⲱ ⲛⲉϥⲇⲓⲕⲁⲓⲱⲙⲁ ⲙⲡⲓⲥⲁϩⲱⲟⲩ ⲉⲃⲟⲗ ⲙⲙⲟⲓ

22:24  ⲁⲩⲱ ϯⲛⲁϣⲱⲡⲉ ⲉⲓⲟⲩⲁⲁⲃ ⲛⲁϩⲣⲁϥ ⲁⲩⲱ ϯⲛⲁϩⲟⲣⲧ ⲉⲣⲟⲓ ⲉⲧⲁⲁⲛⲟⲙⲓⲁ

22:25  ⲁⲩⲱ ⲡϫⲟⲉⲓⲥ ⲛⲁⲧⲱⲱⲃⲉ ⲛⲁⲓ ⲕⲁⲧⲁ ⲧⲁⲇⲓⲕⲁⲓⲟⲥⲩⲛⲏ ⲁⲩⲱ ⲕⲁⲧⲁ ⲡⲧⲃⲃⲟ ⲛⲛⲁϭⲓϫ ϥⲛⲁⲧⲱⲱⲃⲉ ⲛⲁⲓ ⲙⲡⲙⲧⲟ ⲉⲃⲟⲗ ⲛⲛⲉϥⲃⲁⲗ

22:26  ⲉⲕϣⲁⲛϣⲱⲡⲉ ⲙⲛ ⲟⲩⲁ ⲉϥⲟⲩⲁⲁⲃ ⲕⲛⲁϣⲱⲡⲉ ⲉⲕⲟⲩⲁⲁⲃ ⲁⲩⲱ ⲉⲕϣⲁⲛϣⲱⲡⲉ ⲙⲛ ⲟⲩⲧⲉⲗⲓⲟⲥ ⲕⲛⲁϣⲱⲡⲉ ⲉⲕⲟ ⲛⲧⲉⲗⲓⲟⲥ

22:27  ⲁⲩⲱ ⲉⲕϣⲁⲛϣⲱⲡⲉ ⲙⲛ ⲟⲩⲥⲱⲧⲡ ⲕⲛⲁϣⲱⲡⲉ ⲉⲕⲟ ⲛⲥⲱⲧⲡ ⲁⲩⲱ ⲉⲕϣⲁⲛϣⲱⲡⲉ ⲙⲛ ⲡⲉⲧϭⲟⲟⲙⲉ ⲕⲛⲁϣⲱⲡⲉ ⲉⲕϭⲟⲟⲙⲉ

22:28  ⲁⲩⲱ ⲡⲗⲁⲟⲥ ⲛϩⲏⲕⲉ ⲉⲕⲛⲁⲛⲁϩⲙⲉϥ ⲁⲩⲱ ⲛⲃⲁⲗ ⲛⲛⲉϫⲁⲥⲓϩⲏⲧ ⲕⲛⲁⲑⲃⲃⲓⲟⲟⲩ

22:29  ϫⲉ ⲛⲧⲟⲕ ⲡⲉ ⲡⲁϩⲏⲃⲥ ⲡϫⲟⲉⲓⲥ ⲁⲩⲱ ⲛⲧⲟⲕ ⲡⲉⲧⲛⲁⲧⲣⲉⲡⲁⲕⲁⲕⲉ ⲉⲣⲟⲩⲟⲉⲓⲛ ⲛⲁϩⲣⲁⲓ

22:30  ϫⲉ ⲉⲓⲛⲁⲡⲱⲧ ϩⲣⲁⲓ ⲛϩⲏⲧⲕ ⲉⲓⲧⲟⲩϫⲏⲩ ⲁⲩⲱ ⲉⲓⲛⲁⲟⲩⲱⲧⲃ ⲛⲟⲩⲥⲟⲃⲧ ϩⲙ ⲡⲁⲛⲟⲩⲧⲉ

22:31  ⲡⲁⲛⲟⲩⲧⲉ ⲉⲧⲧⲁϫⲣⲏⲟⲩⲧ ⲧⲉϥϩⲓⲏ ⲟⲩⲁⲁⲃ ⲡϣⲁϫⲉ ⲙⲡϫⲟⲉⲓⲥ ϫⲟⲟⲣ ⲉϥⲡⲟⲥⲉ ⲧⲛⲁϣⲧⲉ ⲡⲉ ⲛⲟⲩⲟⲛ ⲛⲓⲙ ⲉⲧⲕⲱ ⲛϩⲧⲏⲩ ⲉⲣⲟϥ

22:32  ⲛⲓⲙ ⲡⲉ ⲡϫⲱⲱⲣⲉ ⲛⲥⲁ ⲡϫⲟⲉⲓⲥ ⲁⲩⲱ ⲛⲓⲙ ⲡⲉⲧⲛⲁⲣⲣⲉϥⲥⲱⲛⲧ ⲛⲥⲁ ⲡⲉⲛⲛⲟⲩⲧⲉ

22:33  ⲡϫⲟⲉⲓⲥ ⲉⲧⲧⲁϫⲣⲟ ⲙⲙⲟⲓ ϩⲛ ⲟⲩϭⲟⲙ ⲁⲩⲱ ⲁϥⲥⲟⲩⲧⲛ ⲧⲁϩⲓⲏ ⲉⲥⲟⲩⲁⲁⲃ

22:34  ⲉϥⲉⲥⲟⲃⲧⲉ ⲛⲛⲁⲟⲩⲉⲣⲏⲧⲉ ⲛⲑⲉ ⲛⲟⲩⲓⲟⲩⲗ ⲁⲩⲱ ⲉϥⲧⲁϩⲟ ⲙⲙⲟⲓ ⲉⲣⲁⲧ ⲉϫⲛ ⲛⲙⲁ ⲉⲧϫⲟⲥⲉ

22:35  ⲉϥⲧⲥⲁⲃⲟ ⲛⲛⲁϭⲓϫ ⲉⲡⲡⲟⲗⲉⲙⲟⲥ ⲉⲁϥⲕⲱ ⲛⲟⲩⲡⲓⲧⲉ ⲛϩⲟⲙⲛⲧ ϩⲛ ⲛⲁϭⲃⲟⲓ

22:36  ⲁⲩⲱ ⲁⲕϯ ⲛⲁⲓ ⲛⲧⲛⲁϣⲧⲉ ⲙⲡⲁⲟⲩϫⲁⲓ ⲁⲩⲱ ⲡⲉⲕⲥⲱⲧⲙ ⲉⲣⲟⲓ ⲁϥⲧⲟⲩϫⲁⲓ

22:37  ⲁⲕⲟⲩⲱϣⲥ ⲉⲃⲟⲗ ⲛⲛⲁⲧⲁϭⲥⲉ ϩⲁⲣⲁⲧ ⲁⲩⲱ ⲛⲁⲟⲩⲉⲣⲏⲧⲉ ⲙⲡⲟⲩϣⲧⲟⲣⲧⲣ

22:38  ϯⲛⲁⲡⲱⲧ ⲛⲥⲁ ⲛⲁϫⲁϫⲉ ⲛⲧⲁⲧⲁⲕⲟ ⲙⲙⲟⲟⲩ ⲁⲩⲱ ⲛϯⲛⲁⲕⲧⲟ ⲙⲙⲟⲓ ⲁⲛ ϣⲁⲛϯⲟϫⲛⲟⲩ

22:39  ϯⲛⲁⲗⲟϫⲟⲩ ⲛⲥⲉⲧⲙⲉϣⲧⲱⲟⲩⲛ ⲁⲩⲱ ⲥⲉⲛⲁϩⲉ ϩⲁ ⲛⲁⲟⲩⲉⲣⲏⲧⲉ

22:40  ⲁⲩⲱ ⲕⲛⲁⲧⲁϫⲣⲟⲓ ϩⲛ ⲟⲩϭⲟⲙ ⲉⲡⲡⲟⲗⲉⲙⲟⲥ ⲁⲩⲱ ⲕⲛⲁⲕⲱⲗϫ ϩⲁⲣⲁⲧ ⲛⲛⲉⲛⲧⲁⲩⲧⲱⲟⲩⲛ ⲉϩⲣⲁⲓ ⲉϫⲱⲓ

22:41  ⲁⲩⲱ ⲛⲁϫⲁϫⲉ ⲁⲩⲧⲁⲁⲩ ⲉⲩⲑⲃⲃⲓⲏⲩ ⲛⲁϩⲣⲁⲓ ⲛⲕⲟⲟⲩⲉ ⲉⲧⲙⲟⲥⲧⲉ ⲙⲙⲟⲓ ⲁⲕⲙⲟⲩⲟⲩⲧ ⲙⲙⲟⲟⲩ

22:42  ⲥⲉⲛⲁⲱϣ ⲉⲃⲟⲗ ⲛⲧⲉⲧⲙⲃⲟⲏⲑⲓⲁ ϣⲱⲡⲉ ⲛⲁⲩ ⲁⲩⲱϣ ⲉⲃⲟⲗ ⲉϩⲣⲁⲓ ⲉⲡϫⲟⲉⲓⲥ ⲁⲩⲱ ⲙⲡⲉϥⲥⲱⲧⲙ ⲉⲣⲟⲟⲩ

22:43  ⲁⲓϣⲁϣⲟⲩ ⲛⲑⲉ ⲛⲟⲩⲕⲁϩ ⲛⲧⲉ ⲡⲕⲁϩ ⲛⲑⲉ ⲙⲡⲟⲙⲉ ⲛⲛⲉϩⲓⲟⲟⲩⲉ ⲁⲓϫⲟⲟⲣⲟⲩ ⲉⲃⲟⲗ

22:44  ⲕⲛⲁⲛⲁϩⲙⲉⲧ ⲉⲡϣⲁⲛⲧ ⲛⲧⲉ ⲛⲗⲁⲟⲥ ⲕⲛⲁϩⲁⲣⲉϩ ⲉⲣⲟⲓ ⲉⲁⲁⲧ ⲛⲁⲡⲉ ⲉϫⲛ ⲛⲗⲁⲟⲥ ⲙⲛ ⲛϩⲉⲑⲛⲟⲥ ⲡⲗⲁⲟⲥ ⲉⲧⲙⲡⲓⲥⲟⲩⲱⲛϥ ⲁϥⲣϩⲙϩⲁⲗ ⲛⲁⲓ

22:45  ⲁⲩⲥⲱⲧⲙ ⲉⲣⲟⲓ ⲁⲩⲕⲉⲛⲉⲩⲙⲁⲁϫⲉ ⲉⲣⲟⲓ ϩⲉⲛϣⲏⲣⲉ ⲛϣⲙⲙⲟ ⲁⲩϫⲓϭⲟⲗ ⲉⲣⲟⲓ

22:46  ϩⲛϣⲏⲣⲉ ⲛϣⲙⲙⲟ ⲥⲉⲛⲁⲛⲟϫⲟⲩ ⲃⲟⲗ ⲁⲩⲱ ⲥⲉⲛⲁⲣϭⲱⲃ ⲉⲃⲟⲗ ϩⲛ ⲛⲉⲩⲙⲟⲉⲓⲧ ⲙⲙⲟⲟϣⲉ

22:47  ⲡϫⲟⲉⲓⲥ ⲟⲛϩ ⲁⲩⲱ ϥⲉⲙⲁⲙⲁⲁⲧ ⲛϭⲓ ⲡⲉⲧϩⲁⲣⲉϩ ⲉⲣⲟⲓ ⲁⲩⲱ ϥⲛⲁϫⲓⲥⲉ ⲛϭⲓ ⲡⲁⲛⲟⲩⲧⲉ ⲡⲉⲧⲣⲟⲉⲓⲥ ⲉⲡⲁⲟⲩϫⲁⲓ

22:48  ⲡϫⲟⲉⲓⲥ ⲉϥⲧⲁϫⲣⲏⲩ ⲉϥϯ ⲛⲁⲓ ⲛⲟⲩⲕⲃⲁ ⲉϥϯⲥⲃⲱ ⲛⲛⲉⲗⲁⲟⲥ ⲉⲩϩⲁⲣⲉϩ

22:49  ⲉϥⲉⲓⲛⲉ ⲙⲙⲟⲓ ⲟⲩⲧⲱⲟⲩ ⲛⲛⲁϫⲁϫⲉ ⲁⲩⲱ ⲕⲛⲁϫⲓ ⲙⲙⲟⲓ ⲟⲩⲧⲱⲟⲩ ⲛⲛⲉⲧⲧⲱⲟⲩⲛ ⲉϩⲣⲁⲓ ⲉϫⲱⲟⲩ ⲛⲧⲟⲕ ⲡⲉⲧⲛⲁⲛⲁϩⲙⲉⲧ ⲛⲧⲟⲟⲧϥ ⲛⲟⲩⲣⲱⲙⲉ ⲛϩⲉⲛϫⲓⲛϭⲟⲛⲥ

22:50  ⲉⲧⲃⲉ ⲡⲁⲓ ϯⲛⲁⲉⲝⲟⲙⲟⲗⲟⲅⲉⲓ ⲛⲁⲕ ⲡϫⲟⲉⲓⲥ ϩⲛ ⲛϩⲉⲑⲛⲟⲥ ⲁⲩⲱ ϯⲛⲁϣⲁⲗⲗⲉⲓ ⲉⲡⲉⲕⲣⲁⲛ

22:51  ⲉϥⲧⲁϣⲟ ⲛⲛⲉⲟⲩϫⲁⲓ ⲙⲡⲉϥⲣⲣⲟ ⲁⲩⲱ ⲉϥⲉⲓⲣⲉ ⲛⲟⲩⲛⲁ ⲙⲛ ⲡⲉϥⲭⲣⲓⲥⲧⲟⲥ ⲙⲛ ⲡⲉϥⲥⲡⲉⲣⲙⲁ ⲛϣⲁ ⲉⲛⲉϩ