CopSahBible2 - II Samuel - 8

8:1  ⲁⲩⲱ ⲙⲛⲛⲥⲁ ⲛⲉⲓϣⲁϫⲉ ⲇⲁⲩⲉⲓⲇ ⲁϥⲡⲁⲧⲁⲥⲥⲉ ⲛⲛⲁⲗⲗⲟⲫⲩⲗⲟⲥ ⲁϥϭⲟⲧⲡⲟⲩ ⲉⲃⲟⲗ ⲁⲩⲱ ⲁϥϫⲓ ⲛⲧⲡⲟⲗⲓⲥ ⲉⲧⲛⲏϩ ⲉⲃⲟⲗ ⲛⲧⲟⲟⲧⲟⲩ ⲛⲛⲁⲗⲗⲟⲫⲩⲗⲟⲥ

8:2  ⲁⲩⲱ ⲇⲁⲩⲉⲓⲇ ⲁϥⲡⲁⲧⲁⲥⲥⲉ ⲙⲡⲕⲁϩ ⲙⲙⲱⲁⲃ ⲁϥϣⲓⲧⲟⲩ ϩⲛ ϩⲉⲛⲛⲟⲩϩ ⲉⲁϥⲣⲟⲕⲧⲟⲩ ⲉⲡⲕⲁϩ ⲁⲩⲱ ⲁϥϣⲓ ⲡⲉⲥⲕⲛⲟⲩϩ ⲥⲛⲁⲩ ⲉⲙⲟⲩⲟⲩⲧ ⲙⲙⲟⲟⲩ ⲡϫⲱⲕ ϫⲉ ⲙⲡⲉⲥⲕⲛⲟⲩϩ ⲁϥϥⲓⲧⲟⲩ ⲉϥⲟⲛϩ ⲁⲩⲱ ⲡⲗⲁⲟⲥ ⲙⲙⲱⲁⲃ ⲁϥϣⲱⲡⲉ ⲉⲩⲟ ⲛϩⲙϩⲁⲗ ⲛⲇⲁⲩⲉⲓⲇ ⲉⲩϫⲓⲧⲁⲓⲟ ⲛⲁϥ

8:3  ⲇⲁⲩⲉⲓⲇ ⲇⲉ ⲟⲛ ⲁϥⲡⲁⲧⲁⲥⲥⲉ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛⲣⲱⲁⲃ ⲡⲣⲣⲟ ⲛⲥⲟⲩⲃⲁ ⲉϥⲛⲁⲃⲱⲕ ⲉⲕⲧⲉⲧⲟⲟⲧϥ ⲉϫⲙ ⲡⲓⲉⲣⲟ ⲡⲉⲩⲫⲣⲁⲧⲏⲥ

8:4  ⲁⲩⲱ ⲇⲁⲩⲉⲓⲇ ⲁϥϫⲓ ϩⲁⲣⲱϥ ⲙⲡⲉϥⲙⲏⲏϣⲉ ⲁϥϥⲓ ⲙⲙⲏⲧ ⲛϣⲉ ⲛϩⲁⲣⲙⲁ ⲛⲧⲟⲟⲧϥ ⲁⲩⲱ ⲥⲁϣϥ ⲛⲧⲃⲁ ⲛϩⲓⲡⲡⲉⲩⲥ ⲁⲩⲱ ⲧⲃⲁ ⲥⲛⲁⲩ ⲛⲣⲙⲣⲁⲧⲟⲩ ⲛϩⲁⲣⲙⲁ ⲇⲉ ⲧⲏⲣⲟⲩ ⲛ ⲁϥⲧⲁⲕⲟⲟⲩ ⲁϥⲕⲱ ⲇⲉ ⲛⲁϥ ⲛϣⲉ ⲛϩⲁⲣⲙⲁ ⲉⲃⲟⲗ ⲛϩⲏⲧⲟⲩ

8:5  ⲁⲥⲉⲓ ⲇⲉ ⲛϭⲓ ⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲃⲟⲉⲓⲑⲉⲓ ⲉⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁⲩⲱ ⲁϥⲡⲁⲧⲁⲥⲥⲉ ⲛⲧⲥⲩⲣⲓⲁ ⲛϫⲟⲩⲧⲥⲛⲟⲟⲩⲥ ⲛϣⲟ ⲛⲣⲱⲙⲉ

8:6  ⲁⲩⲱ ⲇⲁⲩⲉⲓⲇ ⲁϥⲕⲱ ⲛϩⲉⲛⲡⲁⲣⲉⲙⲃⲟⲗⲏ ϩⲛ ⲧⲥⲩⲣⲓⲁ ⲛⲇⲁⲙⲁⲥⲕⲟⲥ ⲉⲧⲣⲉⲩⲣⲟⲉⲓⲥ ⲁⲩⲱ ⲧⲥⲩⲣⲓⲁ ⲁⲥⲣϩⲙϩⲁⲗ ⲛ ⲉⲩⲛⲧⲁⲓⲟ ⲛⲁϥ ⲁⲩⲱ ⲡϫⲟⲉⲓⲥ ⲁϥⲧⲟⲩϫⲉ ϩⲛ ⲛⲉⲙⲁ ⲛⲧⲁϥⲃⲱⲕ ⲉⲣⲟⲟⲩ

8:7  ⲇⲁⲩⲉⲓⲇ ⲇⲉ ⲁϥϫⲓ ⲛⲛⲉⲭⲗⲓⲛⲟⲛ ⲏ ⲛⲉⲕⲗⲁⲗ ⲛⲛⲟⲩⲃ ⲛⲁⲓ ⲛⲧⲁⲩⲧⲁⲙⲓⲟⲟⲩ ⲛⲁⲩ ⲛϭⲓ ⲛϩⲙϩⲁⲗ ⲛⲁⲇⲣⲁⲁⲍⲁⲣ ⲡⲣⲣⲟ ⲛⲥⲟⲩⲃⲁ ⲁϥⲉⲛⲧⲟⲩ ⲉϩⲣⲁⲓ ⲉⲑ ⲁϥϫⲓⲧⲟⲩ ⲛϭⲓ ⲫⲁⲣⲁⲱ ⲡⲣⲣⲟ ⲛⲕⲏⲙⲉ ϩⲙ ⲡⲧⲣⲉϥⲉⲓ ⲉϩⲣⲁⲓ ⲉⲑ ϩⲛ ⲛⲉϩⲟⲟⲩ ⲛϩⲣⲟⲃⲟⲁⲙ ⲡϣⲏⲣⲉ ⲛⲥⲟⲗⲟⲙⲟⲛ

8:8  ⲁⲩⲱ ⲁϥϫⲓ ⲉⲃⲟⲗ ϩⲛ ⲛⲉⲙⲁⲥⲃⲁⲕ ⲉⲃⲟⲗ ϩⲛ ⲛⲉⲡⲟⲗⲓⲥ ⲉⲧⲥⲟⲧⲡ ⲛⲧⲉ ⲁⲇⲣⲁⲁⲍⲁⲣ ⲛⲟⲩϩⲟⲙⲛⲧ ⲉⲛⲁϣⲱϥ ⲉⲙⲁⲧⲉ ⲛⲧⲁⲥⲟⲗⲟⲙⲟⲛ ⲧⲁⲙⲓⲟ ⲛϩⲏⲧϥ ⲛⲧⲉⲑⲁⲗⲁⲥⲥⲁ ⲛϩⲟⲙⲛⲧ ⲙⲛ ⲛⲉⲥⲧⲩⲗⲗⲟⲥ ⲁⲩⲱ ⲛⲗⲟⲩⲧⲏⲣ ⲙⲛ ⲛⲉⲥⲕⲉⲩⲏ ⲧⲏⲣⲟⲩ

8:9  ⲁⲩⲱ ⲁϥⲥⲱⲧⲙ ⲛϭⲓ ⲑⲟⲟⲩ ⲡⲣⲣⲟ ⲛⲉⲙⲁⲑ ϫⲉ ⲁ ⲡⲁⲧⲁⲥⲥⲉ ⲛⲧϭⲟⲙ ⲧⲏⲣⲥ ⲛⲁⲇⲣⲁⲁⲍⲁⲣ

8:10  ⲁⲑⲟⲟⲩ ϫⲟⲟⲩ ⲛⲓⲉⲍⲟⲩⲣⲁⲛ ⲡⲉϥϣⲏⲣⲉ ⲉⲣⲁⲧϥ ⲙⲡⲣⲣⲟ ⲇⲁⲩⲉⲓⲇ ⲉⲥⲉⲡⲥⲱⲡϥ ⲉⲩⲉⲓⲣⲏⲛⲏ ⲁⲩⲱ ⲉⲥⲙⲟⲩ ⲉⲣⲟϥ ϫⲉ ⲁϥⲡⲁⲧⲁⲥⲥⲉ ⲛⲁⲇⲣⲁⲁⲍⲁⲣ ⲉⲃⲟⲗ ϫⲉ ⲛⲉⲣⲉⲑⲟⲟⲩ ⲡⲟⲗⲉⲙⲓ ⲙⲛ ⲁⲇⲣⲁⲁⲍⲁⲣ ⲁⲩⲱ ⲛⲉⲩⲉⲛⲧⲟⲟⲧϥ ⲛϭⲓ ϩⲉⲛⲥⲕⲉⲩⲏ ⲛϩⲁⲧ ⲙⲛ ϩⲉⲛⲥⲕⲉⲩⲏ ⲛⲛⲟⲩⲃ ⲙⲛ ϩⲉⲛⲥⲕⲉⲩⲏ ⲛϩⲟⲙⲛⲧ

8:11  ⲛⲉⲛⲕⲟⲟⲩⲉ ⲁⲡⲣⲣⲟ ⲧⲃⲃⲟⲟⲩ ⲁϥⲉⲣⲏⲧ ⲙⲙⲟⲟⲩ ⲙⲡϫⲟⲉⲓⲥ ⲙⲛ ⲡϩⲁⲧ ⲙⲛ ⲡⲛⲟⲩⲃ ⲡⲁⲓ ⲛⲧⲁϥⲧⲃⲃⲟϥ ⲉⲃⲟⲗ ϩⲛ ⲛⲉⲡⲟⲗⲓⲥ ⲧⲏⲣⲟⲩ ⲛⲧⲁϥϭⲙϭⲟⲙ ⲉϩⲣⲁⲓ ⲉϫⲱⲟⲩ

8:12  ⲉⲃⲟⲗ ϩⲛ ϯⲇⲟⲩⲙⲁⲓⲁ ⲁⲩⲱ ⲉⲃⲟⲗ ϩⲙ ⲙⲱⲁⲃ ⲁⲩⲱ ⲉⲃⲟⲗ ϩⲛ ⲛⲉϣⲏⲣⲉ ⲛⲁⲙⲙⲱⲛ ⲁⲩⲱ ⲉⲃⲟⲗ ϩⲙ ⲡⲁⲙⲁⲗⲏⲕ ⲁⲩⲱ ⲉⲃⲟⲗ ϩⲛ ⲛⲉϣⲟⲗⲥ ⲛⲁⲇⲣⲁⲁⲍⲁⲣ ⲡϣⲏⲣⲉ ⲛϩⲣⲁⲁⲃ ⲡⲣⲣⲟ ⲛⲥⲁⲃⲁ

8:13  ⲇⲁⲩⲉⲓⲇ ⲇⲉ ⲁϥⲥⲙⲓⲛⲉ ⲛⲁϥ ⲛⲟⲩⲣⲁⲛ ⲛⲥⲟⲉⲓⲧ ⲁⲩⲱ ⲛⲧⲉⲣⲉϥⲕⲧⲟϥ ⲁϥⲡⲁⲧⲁⲥⲥⲉ ⲛϯⲇⲟⲩⲙⲁⲓⲁ ϩⲙ ⲡⲓⲁ ⲛⲛⲉϩⲙⲟⲩ ⲙⲙⲛⲧϣⲙⲏⲛ ⲛϣⲟ ⲛⲣⲱⲙⲉ

8:14  ⲁⲩⲱ ⲁϥⲕⲱ ⲛϩⲉⲛⲣⲉϥⲣⲟⲉⲓⲥ ϩⲛ ϯⲇⲟⲩⲙⲁⲓⲁ ⲧⲏⲣⲥ ⲁⲩⲱ ⲛⲓⲇⲟⲩⲙⲁⲓⲟⲥ ⲧⲏⲣⲟⲩ ⲁⲩⲣϩⲙϩⲁⲗ ⲙⲡⲣⲣⲟ ⲁⲩⲱ ⲁⲡϫⲟⲉⲓⲥ ⲧⲟⲩϫⲉⲇⲁⲩⲉⲓⲇ ϩⲛ ⲛⲙⲁ ⲧⲏⲣⲟⲩ ⲛⲧⲁϥⲃⲱⲕ ⲉⲣⲟⲟⲩ

8:15  ⲁⲩⲱ ⲁϥⲧⲣⲉ ⲉⲣⲣⲟ ⲉϫⲙ ⲡ ⲧⲏⲣϥ ⲇⲉ ⲛⲉϥⲉⲓⲣⲉ ⲛⲟⲩⲕⲣⲓⲙⲁ ⲙⲛ ⲟⲩⲇⲓⲕⲁⲓⲟⲥⲩⲛⲏ ϩⲙ ⲡⲉϥⲗⲁⲟⲥ ⲧⲏⲣϥ

8:16  ⲁⲩⲱ ⲓⲱⲁⲃ ⲡϣⲏⲣⲉ ⲛⲥⲁⲣⲟⲩⲉⲓⲁ ⲛⲉϥϣⲟⲟⲡ ⲉϫⲙ ⲡⲉϥⲙⲏⲏϣⲉ ⲁⲩⲱ ⲓⲱⲥⲁⲫⲁⲧ ⲡϣⲏⲣⲉ ⲛⲁⲭⲓⲁ ⲛⲧⲟϥ ⲡⲉ ⲉϥⲧⲣⲉⲡⲣⲣⲟ ⲉⲣⲡⲙⲉⲉⲩⲉ

8:17  ⲥⲁⲇⲇⲟⲩⲕ ⲇⲉ ⲡϣⲏⲣⲉ ⲛⲁⲭⲓⲧⲱⲃ ⲁⲩⲱ ⲁⲃⲓⲙⲉⲗⲉⲭ ⲡϣⲏⲣⲉ ⲛⲁⲃⲓⲁⲑⲁⲣ ⲛⲧⲟⲟⲩ ⲛⲉⲧⲟ ⲛⲟⲩⲏⲏⲃ ⲁⲩⲱ ⲁⲥⲁ ⲛⲧⲟϥ ⲡⲉⲧⲟ ⲛⲅⲣⲁⲙⲙⲁⲧⲉⲩⲥ

8:18  ⲁⲩⲱ ⲃⲁⲛⲁⲓⲁⲥ ⲡϣⲏⲣⲉ ⲛⲓⲱⲇⲁⲉ ⲛⲧⲟϥ ⲡⲉⲧⲟ ⲛⲥⲩⲙⲃⲟⲗⲟⲥ ⲡⲉⲭⲉⲗⲉⲑⲑⲓ ⲇⲉ ⲙⲛ ⲡⲉⲫⲉⲗⲉⲧⲧⲓ ⲛϣⲏⲣⲉ ⲛ ⲛⲧⲟⲟⲩ ⲛⲉ ⲛⲉⲁⲣⲭⲱⲛ ⲛⲧⲁⲩⲗⲏ ⲙⲡⲣⲣⲟ