CopSahBible2 - II Samuel - 9

9:1  ⲡⲉϫⲉ ⲇⲉ ϫⲉ ⲉϣⲱⲡⲉ ⲟⲩⲛⲣⲱⲙⲉ ⲉⲁϥⲥⲉⲉⲡⲉ ⲉⲃⲟⲗ ϩⲙ ⲡⲏⲓ ⲛⲥⲁⲟⲩⲗ ϯⲛⲁⲉⲓⲣⲉ ⲛⲁϥ ⲛⲟⲩⲛⲁ ⲉⲧⲃⲉ ⲓⲱⲛⲁⲑⲁⲛ

9:2  ⲛⲉⲟⲩⲛⲟⲩϩⲙϩⲁⲗ ⲇⲉ ϣⲟⲟⲡ ⲉⲃⲟⲗ ϩⲙ ⲡⲏⲓ ⲛⲥⲁⲟⲩⲗ ⲉⲡⲉϥⲣⲁⲛ ⲡⲉ ⲥⲓⲃⲁ ⲁⲩⲙⲟⲩⲧⲉ ⲇⲉ ⲉⲣⲟϥ ⲁⲩⲉⲛⲧϥ ⲉⲣⲁⲧϥ ⲛⲇⲁⲩⲉⲓⲇ ⲡⲉϫⲉⲡⲣⲣⲟ ⲛⲁϥ ϫⲉ ⲉⲛⲉⲛⲧⲟⲕ ⲡⲉ ⲥⲓⲃⲁ ⲡⲉϫⲁϥ ϫⲉ ⲁⲛⲟⲕ ⲡⲉⲕϩⲙϩⲁⲗ

9:3  ⲡⲉϫⲉⲡⲣⲣⲟ ⲛⲁϥ ϫⲉ ⲉϣⲱⲡⲉ ⲟⲩⲛ ⲁⲣⲱⲙⲉ ⲥⲉⲉⲡⲉ ⲉⲃⲟⲗ ϩⲙ ⲡⲏⲓ ⲛⲥⲁⲟⲩⲗ ϯⲛⲁⲉⲓⲣⲉ ⲛⲁϥ ⲛⲟⲩⲛⲁ ⲛⲧⲉ ⲡⲛⲟⲩⲧⲉ ⲡⲉϫⲉⲥⲓⲃⲁ ϩⲓⲑⲏ ⲙⲡⲣⲣⲟ ϫⲉ ⲟⲩⲛⲟⲩϣⲏⲣⲉ ⲉⲡⲁⲓⲱⲛⲁⲑⲁⲛ ⲡⲉ ⲉⲣⲉⲛⲉϥⲟⲩⲉⲣⲏⲧⲉ ϣⲟⲟϭⲉ

9:4  ⲡⲉϫⲉⲡⲣⲣⲟ ⲛⲁϥ ϫⲉ ⲉⲣⲉⲡⲁⲓ ⲛⲧⲱⲛ ⲡⲉϫⲉⲥⲓⲃⲁ ϫⲉ ⲉⲓⲥ ϩⲏⲏⲧⲉ ϥϩⲙⲡⲏⲓ ⲙⲙⲁⲭⲓⲣ ⲡϣⲏⲣⲉ ⲛⲁⲙⲓⲏⲗ ⲡⲉ ⲉⲃⲟⲗ ϩⲛ ⲗⲁⲇⲁⲃⲁⲣ

9:6  ⲁϥⲓ ⲇⲉ ⲛϭⲓ ⲙⲉⲙⲫⲓⲃⲟⲥⲑⲉ ⲡϣⲏⲣⲉ ⲛⲓⲱⲛⲁⲑⲁⲛ ⲡϣⲏⲣⲉ ⲛⲥⲁⲟⲩⲗ ⲉⲣⲁⲧϥ ⲙⲡⲣⲣⲟ ⲇⲁⲩⲉⲓⲇ ⲁϥⲡⲁϩⲧϥ ϩⲓⲑⲏ ⲙⲙⲟϥ ⲁϥⲟⲩⲱϣⲧ ⲛⲁϥ ⲡⲉϫⲉ ⲛⲁϥ ϫⲉ ⲙⲉⲙⲫⲓⲃⲟⲥⲑⲉ ⲡⲉϫⲁϥ ϫⲉ ⲉⲓⲥ ϩⲏⲏⲧⲉ ⲁⲛⲟⲕ ⲡⲉⲕϩⲙϩⲁⲗ

9:7  ⲡⲉϫⲉ ⲛⲁϥ ϫⲉ ⲙⲡⲣⲣϩⲟⲧⲉ ϫⲉ ϩⲛ ⲟⲩⲉⲓⲣⲉ ϯⲛⲁⲉⲓⲣⲉ ⲛⲙⲙⲁⲕ ⲛⲟⲩⲛⲁ ⲉⲧⲃⲉ ⲓⲱⲛⲁⲑⲁⲛ ⲡⲉⲕⲉⲓⲱⲧ ⲁⲩⲱ ϯⲛⲁϯ ⲛⲁⲕ ⲛⲛⲉⲓⲱϩⲉ ⲧⲏⲣⲟⲩ ⲛⲥⲁⲟⲩⲗ ⲡⲉⲓⲱⲧ ⲙⲡⲉⲕⲉⲓⲱⲧ ⲁⲩⲱ ⲛⲧⲟⲕ ⲕⲛⲁϭⲱ ⲉⲕⲟⲩⲉⲙⲟⲉⲓⲕ ⲛⲙⲙⲁⲓ ϩⲓϫⲛ ⲧⲁⲧⲣⲁⲡⲉⲍⲁ ⲛⲟⲩⲟⲉⲓϣ ⲛⲓⲙ

9:8  ⲙⲉⲙⲫⲓⲃⲟⲥⲑⲉ ⲇⲉ ⲁϥⲡⲁϩⲧϥ ⲁϥⲟⲩⲱϣⲧ ⲉϥϫⲱ ⲙⲙⲟⲥ ϫⲉ ⲟⲩ ⲡⲉ ⲡⲉⲕϩⲙϩⲁⲗ ϫⲉ ⲁⲕϭⲱϣⲧ ⲉϫⲛ ⲟⲩⲟⲩϩⲟⲣ ⲉϥⲙⲟⲟⲩⲧ ⲕⲁⲧⲁ ⲧⲁⲙⲓⲛⲉ

9:9  ⲁⲩⲱ ⲁϥⲙⲟⲩⲧⲉ ⲉⲥⲓⲃⲁ ⲡϩⲙϩⲁⲗ ⲛⲥⲁⲟⲩⲗ ⲡⲉϫⲁϥ ⲛⲁϥ ϫⲉ ⲛⲕⲁ ⲛⲓⲙ ⲉⲛⲁⲥⲁⲟⲩⲗ ⲛⲉ ⲁⲩⲱ ⲉⲧⲏⲡ ⲧⲏⲣⲟⲩ ⲉⲡⲉϥⲏⲓ ⲉⲓⲥ ϩⲏⲏⲧⲉ ⲁⲓⲧⲁⲁⲩ ⲧⲏⲣⲟⲩ ⲙⲡϣⲏⲣⲉ ⲙⲡⲉⲕϫⲟⲉⲓⲥ

9:10  ⲁⲣⲓϩⲱⲃ ϭⲉ ⲉⲡⲉϥⲕⲁϩ ⲛⲧⲟⲕ ⲙⲛ ⲛⲉⲕϣⲏⲣⲉ ⲙⲛ ⲛⲉⲕϩⲙϩⲁⲗ ⲛⲅϫⲓⲟⲉⲓⲕ ⲉϩⲟⲩⲛ ⲙⲡϣⲏⲣⲉ ⲙⲡⲉⲕϫⲟⲉⲓⲥ ⲛⲥⲉⲟⲩⲱⲙ ⲙⲙⲟⲟⲩ ⲁⲩⲱ ⲙⲉⲙⲫⲓⲃⲟⲥⲑⲉ ⲡϣⲏⲣⲉ ⲙⲡⲉⲕϫⲟⲉⲓⲥ ⲉϥⲉϭⲱ ⲉϥⲟⲩⲉⲙⲟⲉⲓⲕ ⲛⲙⲙⲁⲓ ⲛⲟⲩⲟⲉⲓϣ ⲛⲓⲙ ϩⲓϫⲛ ⲧⲁⲧⲣⲁⲡⲉⲍⲁ ⲥⲓⲃⲁ ⲇⲉ ⲛⲉⲟⲩⲛⲧⲁϥ ⲙⲙⲁⲩ ⲙⲙⲛⲧⲏ ⲛϣⲏⲣⲉ ⲁⲩⲱ ϫⲟⲩⲱⲧ ⲛϩⲙϩⲁⲗ

9:11  ⲡⲉϫⲉⲥⲓⲃⲁ ϩⲓⲑⲏ ⲙⲡⲣⲣⲟ ϫⲉ ⲕⲁⲧⲁ ϩⲱⲃ ⲛⲓⲙ ⲛⲧⲁⲡⲁϫⲟⲉⲓⲥ ⲡⲣⲣⲟ ϩⲱⲛ ⲙⲙⲟⲟⲩ ⲛⲧⲟⲟⲧϥ ⲙⲡⲉϥϩⲙϩⲁⲗ ⲧⲁⲓ ⲧⲉ ⲑⲉ ⲉⲧⲉⲣⲉⲡⲉⲕϩⲙϩⲁⲗ ⲛⲁⲁⲁⲩ ⲁⲩⲱ ⲙⲉⲙⲫⲓⲃⲟⲥⲑⲉ ⲇⲉ ⲛⲉϥⲟⲩⲱⲙ ϩⲓϫⲛ ⲧⲉⲧⲣⲁⲡⲉⲍⲁ ⲛ ⲛⲑⲉ ⲛⲟⲩⲁ ⲛⲛϣⲏⲣⲉ ⲙⲡⲣⲣⲟ

9:12  ⲙⲉⲙⲫⲓⲃⲟⲥⲑⲉ ⲇⲉ ⲛⲉⲟⲩⲉⲛⲧⲁϥ ⲙⲙⲁⲩ ⲛⲟⲩϣⲏⲣⲉ ⲉⲡⲉϥⲣⲁⲛ ⲡⲉ ⲙⲓⲭⲁ ⲁⲩⲱ ⲛⲉⲧⲏⲡ ⲧⲏⲣⲟⲩ ⲉⲡⲏⲓ ⲛⲥⲓⲃⲁ ⲛⲉ ⲛϩⲙϩⲁⲗ ⲙⲙⲉⲙⲫⲓⲃⲟⲥⲑⲉ

9:13  ⲙⲉⲙⲫⲓⲃⲟⲥⲑⲉ ⲇⲉ ⲛⲉϥⲟⲩⲏϩ ϩⲛ ⲑ ⲉⲃⲟⲗ ϫⲉ ⲛⲉϥⲟⲩⲱⲙ ⲛⲟⲩⲟⲉⲓϣ ⲛⲓⲙ ϩⲓϫⲛ ⲧⲉⲧⲣⲁⲡⲉⲍⲁ ⲙⲡⲣⲣⲟ ⲛⲧⲟϥ ⲇⲉ ⲛⲉ ⲟⲩϭⲁⲗⲉ ⲡⲉ ⲛⲧⲉϥⲟⲩⲉⲣⲏⲧⲉ ⲥⲛⲧⲉ