CopSahBible2 - II Samuel - 13

13:1  ⲙⲛⲛⲥⲁ ⲛⲁⲓ ⲇⲉ ⲁⲃⲉⲥⲥⲁⲗⲱⲙ ⲡϣⲏⲣⲉ ⲛⲇⲁⲩⲉⲓⲇ ⲁⲩⲥⲱⲛⲉ ϣⲱⲡⲉ ⲛⲁϥ ⲉⲛⲉⲥⲉ ϩⲣⲁⲥ ⲉⲙⲁⲧⲉ ⲉⲡⲉⲥⲣⲁⲛ ⲡⲉ ⲑⲁⲙⲁⲣ ⲁⲩⲱ ⲁⲙⲛⲱⲛ ⲡϣⲏⲣⲉ ⲛ ⲁϥⲙⲉⲣⲓⲧⲥ

13:2  ⲁⲙⲛⲱⲛ ⲇⲉ ⲛⲉϥⲑⲗⲓⲃⲉ ⲉⲙⲁⲧⲉ ϩⲱⲥⲧⲉ ⲉⲧⲣⲉϥϣⲧⲟ ⲉⲡϣⲱⲛⲉ ⲉⲧⲃⲉ ⲑⲁⲙⲁⲣ ⲧⲉϥⲥⲱⲛⲉ ϫⲉ ⲛⲉ ⲟⲩⲡⲁⲣⲑⲉⲛⲟⲥ ⲧⲉ ⲉⲥⲥⲟⲃⲕ ⲁⲩⲱ ⲛⲉⲣⲉⲡϩⲱⲃ ⲙⲟⲕϩ ⲛⲁϩⲣⲁϥ ⲛⲁⲙⲙⲱⲛ ⲉⲧⲣⲉϥⲣⲟⲩϩⲱⲃ ⲛⲁⲥ ⲛⲧⲉⲓⲙⲓⲛⲉ

13:3  ⲁⲙⲛⲱⲛ ⲇⲉ ⲛⲉⲟⲩⲛⲧⲁϥ ⲙⲙⲁⲩ ⲛⲟⲩϣⲃⲏⲣ ⲉⲡⲉϥⲣⲁⲛ ⲡⲉ ⲓⲱⲛⲁⲇⲁⲃ ⲡϣⲏⲣⲉ ⲛⲥⲁⲙⲁⲁ ⲡⲥⲟⲛ ⲛ ⲁⲩⲱ ⲁⲩⲱ ⲓⲱⲛⲁⲇⲁⲃ ⲛⲉ ⲟⲩⲣⲱⲙⲉ ⲡⲉ ⲛⲥⲟⲫⲟⲥ ⲉⲙⲁⲧⲉ

13:4  ⲡⲉϫⲁϥ ⲛⲁϥ ϫⲉ ⲟⲩ ⲡⲉ ⲡϩⲱⲃ ⲉⲧⲛⲙⲙⲁⲕ ϫⲉ ⲉⲕⲟⲩⲉⲧⲟⲩⲱⲧ ϩⲓⲛⲁⲓ ⲉⲕϣⲱⲛⲉ ⲡϣⲏⲣⲉ ⲙⲡⲣⲣⲟ ⲧⲉⲛⲟⲩ ⲉⲓⲥ ϩⲏⲏⲧⲉ ⲛⲅⲛⲁⲧⲁⲙⲟⲓ ⲁⲛ ⲡⲉϫⲉⲁⲙⲛⲱⲛ ⲛⲁϥ ϫⲉ ⲑⲁⲙⲁⲣ ⲧⲥⲱⲛⲉ ⲛⲁⲃⲉⲥⲥⲁⲗⲱⲙ ⲡⲁⲥⲟⲛ ⲁⲛⲟⲕ ϯⲙⲉ ⲙⲙⲟⲥ ⲁⲩⲱ ⲙⲡⲓϭⲉⲛ ⲉⲓⲛⲁⲣⲟⲩ

13:5  ⲡⲉϫⲉⲓⲱⲛⲁⲇⲁⲃ ⲛⲁϥ ϫⲉ ⲛⲟϫⲕ ϩⲓϫⲉⲛ ⲡⲉⲕⲙⲁ ⲛⲛⲕⲟⲧⲕ ⲛⲅⲟⲡⲥ ϫⲉ ⲉⲕϣⲱⲛⲉ ⲁⲩⲱ ⲡⲉⲕⲉⲓⲱⲧ ϥⲛⲁⲉⲓ ⲉϩⲟⲩⲛ ϣⲁⲣⲟⲕ ⲉϭⲉⲙⲡⲉⲕⲟⲩⲱ ⲛⲅϫⲟⲟⲥ ⲛⲁϥ ϫⲉ ⲙⲁⲣⲉⲑⲁⲙⲁⲣ ⲧⲁⲥⲱⲛⲉ ⲉⲓ ⲛⲥⲧⲙⲟⲓ ⲛⲧⲟⲥ ⲛⲥⲧⲁⲙⲓⲟ ϩⲁϩⲧⲏⲓ ⲛⲕⲟⲗⲗⲩⲣⲓⲟⲛ ⲥⲛⲧⲉ ⲏ ⲡⲉϯⲛⲁⲟⲩⲟⲙϥ ϫⲉ ⲉⲓⲉⲛⲁⲩ ⲉⲣⲟⲥ ⲛⲧⲁⲟⲩⲱⲙ ⲉⲃⲟⲗ ϩⲛ ⲛⲉⲥϭⲓϫ

13:6  ⲁⲩⲱ ⲁⲙⲛⲱⲛ ⲁϥⲉⲛⲕⲟⲧⲕ ⲁϥⲧⲁⲁϥ ⲉⲡϣⲱⲛⲉ ⲡⲣⲣⲟ ⲁϥⲃⲱⲕ ⲉϩⲟⲩⲛ ϣⲁⲣⲟϥ ⲁϥϭⲉⲙⲡⲉϥⲟⲩⲱ ⲁⲩⲱ ⲁⲙⲛⲱⲛ ⲡⲉϫⲁϥ ⲙⲡⲉϥⲉⲓⲱⲧ ϫⲉ ⲙⲁⲣⲉⲑⲁⲙⲁⲣ ⲧⲁⲥⲱⲛⲉ ⲉⲓ ⲛⲥⲧⲁⲙⲓⲉⲕⲟⲗⲗⲩⲣⲓⲟⲛ ⲥⲛⲧⲉ ϩⲁϩⲧⲏⲓ ⲛⲧⲁⲟⲩⲱⲙ ϩⲛ ⲛⲉⲥϭⲓϫ

13:7  ⲁⲩⲱ ⲇⲁⲩⲉⲓⲇ ⲁϥϫⲟⲟⲩ ⲛⲑⲁⲙⲁⲣ ⲉϩⲣⲁⲓ ⲉⲡⲉϥⲏⲓ ⲉϥϫⲱ ⲙⲙⲟⲥ ⲛⲁⲥ ϫⲉ ⲃⲱⲕ ⲉϩⲣⲁⲓ ⲉⲡⲏⲓ ⲛⲁⲙⲛⲱⲛ ⲡⲟⲩⲥⲟⲛ ⲛⲧⲉⲧⲁⲙⲓⲟ ⲛⲁϥ ⲙⲡⲉⲧⲉϥⲛⲁⲟⲩⲟⲙϥ

13:8  ⲁⲩⲱ ⲑⲁⲙⲁⲣ ⲁⲥⲃⲱⲕ ⲉϩⲣⲁⲓ ⲉⲡⲏⲓ ⲛⲁⲙⲙⲱⲛ ⲡⲉⲥⲥⲟⲛ ⲛⲧⲟϥ ⲇⲉ ⲛⲉϥⲉⲛⲕⲟⲧⲕ ⲡⲉ ⲁⲥϫⲓ ⲇⲉ ⲙⲡϣⲱⲧⲉ ⲁⲥⲟⲩⲟϣⲙⲉϥ ⲁⲥⲧⲁⲙⲓⲟ ⲛⲛⲉⲕⲟⲗⲗⲩⲣⲓⲟⲛ ϩⲁϩⲧⲏϥ ⲁⲩⲱ ⲁⲥⲡⲁⲥⲧⲟⲩ

13:9  ⲁⲥϫⲓ ⲇⲉ ⲛⲧⲗⲁⲕⲛⲧ ⲁⲥⲟⲩⲁⲧⲃⲉⲥ ⲙⲡⲉϥϩⲁⲁⲧⲉ ⲉⲃⲟⲗ ⲙⲡⲉϥⲟⲩⲱϣ ⲇⲉ ⲉⲟⲩⲱⲙ ⲡⲉϫⲉⲁⲙⲛⲱⲛ ϫⲉ ⲛⲉϫⲣⲱⲙⲉ ⲛⲓⲙ ⲉⲃⲟⲗ ϩⲓϫⲱⲓ ⲁⲩⲱ ⲛⲣⲱⲙⲉ ⲧⲏⲣⲟⲩ ⲁⲩⲗⲟ ⲙⲙⲁⲩ ϩⲁⲧⲏϥ

13:10  ⲡⲉϫⲁϥ ⲇⲉ ⲛⲑⲁⲙⲁⲣ ϫⲉ ⲡⲉϯⲛⲁⲟⲩⲟⲙϥ ϫⲓⲧϥ ⲉϩⲟⲩⲛ ⲉⲡⲧⲁⲙⲓⲟⲛ ϫⲉ ⲉⲓⲉⲟⲩⲟⲙϥ ⲛⲧⲟⲟⲧⲉ ⲁⲩⲱ ⲑⲁⲙⲁⲣ ⲁⲥϫⲓ ⲛⲛⲉⲕⲟⲗⲗⲩⲣⲓⲟⲛ ⲉϩⲟⲩⲛ ⲉⲡⲧⲁⲙⲓⲟⲛ ⲛⲁⲙⲛⲱⲛ ⲡⲉⲥⲥⲟⲛ

13:11  ⲁⲥⲉⲛⲧⲟⲩ ϩⲁⲣⲱϥ ⲉⲧⲣⲉϥⲟⲩⲱⲙ ⲁϥⲥⲟⲕⲥ ⲇⲉ ⲉⲣⲟϥ ⲉϥϫⲱ ⲙⲙⲟⲥ ⲛⲁⲥ ϫⲉ ⲁⲙⲏ ⲛⲧⲉⲉⲛⲕⲟⲧⲕ ϩⲁϩⲧⲏⲓ ⲧⲁⲥⲱⲛⲉ

13:12  ⲡⲉϫⲁⲥ ⲛⲁϥ ϫⲉ ⲙⲡⲱⲣ ⲡⲁⲥⲟⲛ ⲙⲡⲉⲣⲑⲃⲃⲓⲟⲓ ϫⲉ ⲙⲉⲩⲣⲧⲉⲓϩⲉ ϩⲛ ⲡ ⲙⲡⲣⲉⲓⲣⲉ ⲛⲧⲉⲓⲙⲛⲧⲥⲟϭ

13:13  ⲁⲩⲱ ⲁⲛⲟⲕ ϩⲱ ⲉⲓⲛⲁϩⲉ ⲉⲡⲁⲛⲟϭⲛⲉϭ ⲧⲱⲛ ⲛⲧⲟⲕ ⲇⲉ ϩⲱⲱⲕ ⲛⲅⲣⲑⲉ ⲛⲟⲩⲁ ⲛⲛⲉⲓⲁⲑⲏⲧ ϩⲙ ⲡ ⲧⲉⲛⲟⲩ ϭⲉ ϣⲁϫⲉ ⲙⲛ ⲡⲣⲣⲟ ⲉⲕⲥⲟⲟⲩⲛ ϫⲉ ⲛϥⲛⲁϥⲓⲧ ⲁⲛ ⲛⲧⲟⲟⲧⲕ

13:14  ⲁⲩⲱ ⲙⲡⲉⲁⲙⲛⲱⲛ ⲣϩⲛⲁϥ ⲉⲥⲱⲧⲙ ⲛⲥⲁ ⲡⲉⲥϩⲣⲟⲟⲩ ⲁⲗⲗⲁ ⲁϥϭⲙϭⲟⲙ ⲉϩⲣⲁⲓ ⲉϫⲱⲥ ⲁϥⲉⲛⲕⲟⲧⲕ ⲛⲙⲙⲁⲥ ⲁϥⲑⲃⲃⲓⲟⲥ

13:15  ⲁⲩⲱ ⲁⲁⲙⲛⲱⲛ ⲙⲉⲥⲧⲱⲥ ϩⲛ ⲟⲩⲛⲟϭ ⲙⲙⲟⲥⲧⲉ ⲉⲙⲁⲧⲉ ϫⲉ ⲛⲁϣⲉ ⲡⲙⲟⲥⲧⲉ ⲛⲧⲁϥⲙⲉⲥⲧⲱⲥ ⲛϩⲏⲧϥ ⲉⲛⲁϣⲉ ⲧⲕⲁⲕⲓⲁ ⲛϩⲁⲉ ⲉϩⲟⲩⲉ ⲉⲡⲙⲁ ⲛⲧⲁϥⲟⲩⲁϣⲥ ⲛϩⲏⲧϥ ⲁⲩⲱ ⲡⲉϫⲉⲁⲙⲛⲱⲛ ⲉϩⲟⲩⲛ ⲉϩⲣⲁⲥ ϫⲉ ⲧⲱⲟⲩⲛ ⲛⲧⲉⲃⲱⲕ ⲉⲡⲟⲩⲏⲓ

13:16  ⲡⲉϫⲉⲑⲁⲙⲁⲣ ⲛⲁϥ ϫⲉ ⲡⲉⲓⲛⲟϭ ⲛⲥϯ ⲛⲃⲱⲱⲛ ⲁⲕⲁⲁϥ ⲛⲁⲓ ⲉⲁⲕⲉⲓⲣⲉ ⲛⲁⲓ ⲉϩⲟⲩⲉ ⲉⲟⲩⲁⲧⲣⲟⲩϩⲉ ⲁⲩⲱ ⲕϫⲱ ⲙⲙⲟⲥ ⲛⲁⲓ ϫⲉ ⲧⲱⲟⲩⲛ ⲛⲧⲉⲃⲱⲕ ⲉⲡⲟⲩⲏⲓ ⲁⲙⲛⲱⲛ ⲇⲉ ⲙⲡⲉϥⲟⲩⲱϣ ⲉⲥⲱⲧⲙ ⲛⲥⲱⲥ

13:17  ⲁⲗⲗⲁ ⲁϥⲙⲟⲩⲧⲉ ⲉⲡⲉϥϩⲙϩⲁⲗ ⲡⲉⲧϩⲓϫⲛⲡⲉϥⲏⲓ ⲡⲉϫⲁϥ ⲛⲁϥ ϫⲉ ϥⲓ ⲧⲁⲓ ⲛⲅⲛⲟϫⲥ ⲉⲃⲟⲗ ϩⲁⲧⲏⲓ ⲉⲫⲓⲣ ⲛⲅϣⲧⲁⲙ ⲙⲡⲣⲟ ⲉⲣⲱⲥ

13:18  ⲛⲉⲣⲉⲟⲩϣⲧⲏⲛ ⲇⲉ ϩⲓⲱⲱⲥ ⲉⲥⲟ ⲛⲙⲟⲩⲛⲅ ⲛϣⲛⲥ ϫⲉ ⲧⲁⲓ ⲧⲉ ⲑⲉ ⲉϣⲁⲩϯ ϩⲓⲱⲟⲩ ⲛϭⲓ ⲙⲡⲁⲣⲑⲉⲛⲟⲥ ⲛϣⲉⲉⲣⲉ ⲙⲡⲣⲣⲟ ⲛⲛⲉⲩϩⲟⲉⲓⲧⲉ ⲉⲧϩⲓⲃⲟⲗ ⲁⲩⲱ ⲡⲉϥϩⲙϩⲁⲗ ⲁϥⲥⲟⲕⲥ ⲁϥϥⲓⲧⲥ ϩⲁϩⲧⲏϥ ⲁϥϣⲉⲧⲙⲡⲣⲟ ⲉⲣⲱⲥ

13:19  ⲑⲁⲙⲁⲣ ⲇⲉ ⲁⲥϫⲓ ⲛⲟⲩⲕⲣⲙⲉⲥ ⲁⲥⲛⲟϫϥ ⲉϫⲛ ⲧⲉⲥⲁⲡⲉ ⲁⲩⲱ ⲧⲉϣⲧⲏⲛ ⲉⲧⲟ ⲛⲓⲉⲡⲥⲁ ⲉⲧϩⲓⲱⲱⲥ ⲁⲥϯⲧⲟⲟⲧⲥ ⲙⲙⲟⲥ ⲁⲥⲡⲁϩⲥ ⲁⲩⲱ ⲁⲥⲕⲁ ⲛⲉⲥϭⲓϫ ⲉϫⲛ ⲧⲉⲥⲁⲡⲉ ⲁⲥⲙⲟⲟϣⲉ ⲉⲥϫⲓϣⲕⲁⲕ ⲉⲃⲟⲗ

13:20  ⲁⲩⲱ ⲁⲃⲉⲥⲥⲁⲗⲱⲙ ⲡⲉⲥⲥⲟⲛ ⲡⲉϫⲁϥ ⲛⲁⲥ ϫⲉ ⲙⲏ ⲁⲙⲛⲱⲛ ⲡⲟⲩⲥⲟⲛ ⲡⲉ ⲛⲧⲁϥϣⲱⲡⲉ ⲛⲙⲙⲉ ⲧⲉⲛⲟⲩ ⲇⲉ ⲕⲁⲣⲱ ⲧⲁⲥⲱⲛⲉ ⲡⲟⲩⲥⲟⲛ ⲡⲉ ⲙⲡⲣⲕⲁⲡⲉⲓϣⲁϫⲉ ϩⲙ ⲡⲟⲩϩⲏⲧ ⲉⲕⲟⲧⲉ ⲉϫⲟⲟϥ ⲁⲩⲱ ⲑⲁⲙⲁⲣ ⲁⲥϩⲙⲟⲟⲥ ⲉⲥⲟ ⲛⲭⲏⲣⲁ ⲉⲥⲟ ⲛϩⲱⲣⲁ ϩⲙ ⲡⲏⲓ ⲛⲁⲃⲉⲥⲥⲁⲗⲱⲙ ⲡⲉⲥⲥⲟⲛ

13:21  ⲡⲣⲣⲟ ⲇⲉ ⲁϥⲥⲱⲧⲙ ⲉⲛⲉⲓϣⲁϫⲉ ⲧⲏⲣⲟⲩ ⲁϥϭⲱⲛⲧ ⲉⲙⲁⲧⲉ ⲙⲡⲉϥⲗⲩⲡⲉⲓ ⲙⲡⲉ ⲛⲁⲙⲛⲱⲛ ⲡⲉϥϣⲏⲣⲉ ⲛⲉϥⲙⲉ ⲅⲁⲣ ⲙⲙⲟϥ ϫⲉ ⲡⲉϥϣⲣⲡⲙⲓⲥⲉ ⲡⲉ

13:22  ⲁⲩⲱ ⲁⲃⲉⲥⲥⲁⲗⲱⲙ ⲙⲡⲉϥϣⲁϫⲉ ⲙⲛ ⲁⲙⲛⲱⲛ ⲟⲩⲇⲉ ϩⲛ ⲟⲩⲡⲉⲑⲟⲟⲩ ⲟⲩⲇⲉ ϩⲛ ⲟⲩⲡⲉⲧⲛⲁⲛⲟⲩϥ ⲁⲩⲱ ⲛⲉⲣⲉⲁⲃⲉⲥⲥⲁⲗⲱⲙ ⲙⲟⲥⲧⲉ ⲛⲁⲙⲛⲱⲛ ⲉⲧⲃⲉ ⲡϣⲁϫⲉ ⲛⲧⲁϥⲑⲃⲃⲓⲟ ⲛⲑⲁⲙⲁⲣ ⲧⲉϥⲥⲱⲛⲉ ⲛϩⲏⲧϥ

13:23  ⲁⲣⲟⲙⲡⲉ ⲇⲉ ⲥⲛⲧⲉ ⲛϩⲟⲟⲩ ϣⲱⲡⲉ ⲁⲩⲱ ⲛⲉⲩϩⲱⲱⲕⲉ ⲡⲉ ⲛⲛⲉⲥⲟⲟⲩ ⲛⲁⲃⲉⲥⲥⲁⲗⲱⲙ ϩⲛ ⲃⲉⲗⲁⲥⲱⲣ ⲧⲉⲧϩⲛ ⲉϩⲟⲩⲛ ⲉⲉⲫⲣⲁⲓⲙ ⲁⲩⲱ ⲁⲃⲉⲥⲥⲁⲗⲱⲙ ⲁϥⲧⲱϩⲙ ⲛⲛⲉϣⲏⲣⲉ ⲧⲏⲣⲟⲩ ⲙⲡⲣⲣⲟ

13:24  ⲁⲃⲉⲥⲥⲁⲗⲱⲙ ⲇⲉ ⲁϥⲉⲓ ⲉⲣⲁⲧϥ ⲙⲡⲣⲣⲟ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ϩⲏⲏⲧⲉ ⲥⲉϩⲱⲱⲕⲉ ⲛⲛⲉⲥⲟⲟⲩ ⲙⲡⲉⲕϩⲙϩⲁⲗ ⲙⲁⲣⲉⲡⲣⲣⲟ ϭⲉ ⲧⲱⲟⲩⲛ ⲛϥⲉⲓ ⲉⲡϩⲟⲟⲡ ⲙⲛ ⲛⲉϥϣⲏⲣⲉ ⲙⲡⲉⲕϩⲙϩⲁⲗ

13:25  ⲡⲣⲣⲟ ⲇⲉ ⲡⲉϫⲁϥ ⲛⲁⲃⲉⲥⲥⲁⲗⲱⲙ ϫⲉ ⲙⲡⲱⲣ ⲡⲁϣⲏⲣⲉ ⲙⲡⲣⲧⲣⲉⲛⲧⲱⲟⲩⲛ ⲧⲏⲣⲛ ⲛⲧⲉⲛⲉⲓ ⲛⲙⲙⲁⲕ ⲛⲧⲉⲛⲟⲩⲉϩⲃⲁⲣⲟⲥ ⲉⲣⲟⲕ ⲁⲃⲉⲥⲥⲁⲗⲱⲙ ⲇⲉ ⲁϥⲁⲛⲁⲅⲕⲁⲍⲉ ⲙⲙⲟϥ ⲙⲡⲉⲡⲣⲣⲟ ⲟⲩⲱϣ ⲉⲃⲱⲕ ⲁⲗⲗⲁ ⲁϥⲥⲙⲟⲩ ⲉⲣⲟϥ

13:26  ⲡⲉϫⲉⲁⲃⲉⲥⲥⲁⲗⲱⲙ ⲛⲁϥ ϫⲉ ⲉϣϫⲉ ⲛⲅⲛⲁⲟⲡⲧ ⲁⲛ ⲉⲉⲓ ⲙⲁⲣⲉⲁⲙⲛⲱⲛ ⲡⲁⲥⲟⲛ ⲉⲓ ⲛⲙⲙⲁⲓ ⲡⲉϫⲉⲡⲣⲣⲟ ⲛⲁϥ ϫⲉ ⲉⲧⲃⲉ ⲟⲩ ⲉⲣⲉⲁⲙⲛⲱⲛ ⲉⲓ ⲛⲙⲙⲁⲕ

13:27  ⲁⲃⲉⲥⲥⲁⲗⲱⲙ ⲇⲉ ⲁϥⲁⲛⲁⲅⲕⲁⲍⲉ ⲙⲙⲟϥ ⲁϥϫⲟⲟⲩ ⲛⲙⲙⲁϥ ⲛⲁⲙⲛⲱⲛ ⲁⲩⲱ ⲛϣⲏⲣⲉ ⲧⲏⲣⲟⲩ ⲙⲡⲣⲣⲟ ⲁⲃⲉⲥⲥⲁⲗⲱⲙ ⲇⲉ ⲁϥⲉⲓⲣⲉ ⲛⲟⲩϩⲟⲟⲡ ⲛⲣⲣⲟ

13:28  ⲁⲩⲱ ⲁⲃⲏⲥⲁⲗⲱⲙ ⲁϥϩⲱⲛ ⲉⲧⲟⲟⲧⲟⲩ ⲛⲛⲉϥϩⲙϩⲁⲗ ⲉϥϫⲱ ⲙⲙⲟⲥ ⲛⲁⲩ ϫⲉ ϯϩⲧⲏⲧⲛ ⲉⲣϣⲁⲛⲡϩⲏⲧ ⲛⲁⲙⲛⲱⲛ ⲟⲩⲣⲟⲧ ⲉⲣⲟϥ ϩⲁ ⲡⲏⲣⲡ ⲁⲩⲱ ⲛⲧⲁϫⲟⲟⲥ ⲛⲏⲧⲛ ϫⲉ ⲡⲁⲧⲁⲥⲥⲉ ⲙⲙⲟϥ ⲛⲧⲉⲧⲛⲙⲟⲟⲩⲧϥ ⲙⲡⲣⲣϩⲟⲧⲉ ⲛϩⲏⲧϥ ⲉⲃⲟⲗ ϫⲉ ⲁⲛⲟⲕ ⲡⲉⲧϩⲱⲛ ⲛⲧⲉⲧⲧⲏⲩⲧⲛ ⲧⲱⲕ ⲙⲙⲱⲧⲛ ⲛⲧⲉⲧⲛϣⲱⲡⲉ ⲛϩⲉⲛⲣⲱⲙⲉ ⲛϫⲱⲱⲣⲉ

13:29  ⲁⲩⲱ ⲛϩⲙϩⲁⲗ ⲛⲁⲃⲉⲥⲥⲁⲗⲱⲙ ⲁⲩⲉⲓⲣⲉ ⲛⲁⲙⲛⲱⲛ ⲕⲁⲧⲁ ⲑⲉ ⲛⲧⲁⲁⲃⲉⲥⲥⲁⲗⲱⲙ ϩⲱⲛ ⲉⲧⲟⲟⲧⲟⲩ ⲁⲩⲧⲱⲟⲩⲛ ⲇⲉ ⲧⲏⲣⲟⲩ ⲛϭⲓ ⲛϣⲏⲣⲉ ⲙⲡⲣⲣⲟ ⲁⲡⲟⲩⲁ ⲡⲟⲩⲁ ⲁⲗⲉ ⲉⲡⲉϥⲙⲁⲥ ⲡⲟⲣⲕ ⲁⲩϫⲱⲣⲙ ⲁⲩⲡⲱⲧ

13:30  ⲁⲥϣⲱⲡⲉ ⲇⲉ ⲉⲩⲡⲏⲧ ϩⲛ ⲧⲉϩⲓⲏ ⲡⲥⲟⲉⲓⲧ ⲁϥⲧⲁϩⲉ ⲡⲣⲣⲟ ⲉⲩϫⲱ ⲙⲙⲟⲥ ⲛⲁϥ ϫⲉ ⲁⲃⲉⲥⲥⲁⲗⲱⲙ ⲁϥⲡⲁⲧⲁⲥⲥⲉ ⲛⲛⲉϣⲏⲣⲉ ⲧⲏⲣⲟⲩ ⲙⲡⲣⲣⲟ ⲁⲩⲱ ⲙⲡⲉⲗⲁⲁⲩ ⲛϩⲏⲧⲟⲩ ⲟⲩϫⲁⲓ

13:31  ⲡⲣⲣⲟ ⲇⲉ ⲁϥⲧⲱⲟⲩⲛ ⲁϥϯⲧⲟⲟⲧϥ ⲉⲛⲉϥϩⲟⲉⲓⲧⲉ ⲁϥⲡⲁϩⲟⲩ ⲁⲩⲱ ⲁϥⲛⲟϫϥ ⲉϫⲙ ⲡⲕⲁϩ ⲁϥⲉⲛⲕⲟⲧⲕ ⲛⲉϥⲕⲉϩⲙϩⲁⲗ ⲇⲉ ⲧⲏⲣⲟⲩ ⲉⲧⲁϩⲉⲣⲁⲧⲟⲩ ⲙⲡⲉϥⲃⲟⲗ ⲁⲩϯⲧⲟⲟⲧⲟⲩ ⲉⲛⲉⲩϩⲟⲉⲓⲧⲉ ⲁⲩⲡⲁϩⲟⲩ

13:32  ⲁϥⲟⲩⲱϣⲃ ⲇⲉ ⲛϭⲓ ⲓⲱⲛⲁⲇⲁⲃ ⲡϣⲏⲣⲉ ⲛⲥⲁⲙⲁⲁ ⲡⲥⲟⲛ ⲛ ⲉϥϫⲱ ⲙⲙⲟⲥ ⲙⲡⲣⲣⲟ ϫⲉ ⲙⲡⲣⲧⲣⲉⲡⲁϫⲟⲉⲓⲥ ϫⲟⲟⲥ ϫⲉ ⲛϩⲙϩⲁⲗ ⲧⲏⲣⲟⲩ ⲉⲧⲉⲛϣⲏⲣⲉ ⲛⲉ ⲙⲡⲣⲣⲟ ⲁⲁⲃⲉⲥⲥⲁⲗⲱⲙ ⲙⲟⲟⲩⲧⲟⲩ ⲁⲗⲗⲁ ⲁⲙⲛⲱⲛ ⲙⲁⲩⲁⲁϥ ⲡⲉⲛⲧⲁϥⲙⲟⲩ ⲉⲃⲟⲗ ϫⲉ ⲛⲉϥϩⲓⲧⲧⲁⲡⲣⲟ ⲛⲁⲃⲉⲥⲥⲁⲗⲱⲙ ⲛϫⲓⲛ ⲡⲉϩⲟⲟⲩ ⲛⲧⲁϥⲑⲃⲃⲓⲟ ⲛⲑⲁⲙⲁⲣ ⲧⲉϥⲥⲱⲛⲉ ⲉⲣⲡⲉⲓϩⲱⲃ ⲛⲁϥ

13:33  ⲧⲉⲛⲟⲩ ϭⲉ ⲙⲡⲣⲧⲣⲉⲡⲁϫⲟⲉⲓⲥ ⲡⲣⲣⲟ ⲕⲁⲡⲉⲓϩⲱⲃ ϩⲙ ⲡⲉϥϩⲏⲧ ⲉϥϫⲱ ⲙⲙⲟⲥ ϫⲉ ⲛϣⲏⲣⲉ ⲙⲡⲣⲣⲟ ⲁⲩⲙⲟⲩ ⲁⲗⲗⲁ ⲁⲙⲛⲱⲛ ⲙⲁⲩⲁⲁϥ ⲡⲉⲛⲧⲁϥⲙⲟⲩ

13:34  ⲁⲩⲱ ⲁϥⲡⲱⲧ ⲛϭⲓ ⲁⲃⲉⲥⲥⲁⲗⲱⲙ ⲡϩⲙϩⲁⲗ ⲇⲉ ⲉⲧⲉⲡⲣⲉϥⲉⲛⲟⲩⲱ ⲡⲉ ⲙⲡⲣⲣⲟ ⲁϥϥⲓⲁⲧϥ ⲉϩⲣⲁⲓ ⲁϥⲛⲁⲩ ⲁⲩⲱ ⲉⲓⲥ ⲟⲩⲛⲟϭ ⲙⲙⲏⲏϣⲉ ⲛⲉϥⲙⲟⲟϣⲉ ϩⲛ ⲧⲉϩⲓⲏ ⲉⲣⲁⲧϥ ⲛⲥⲁ ⲥⲡⲓⲣ ⲙⲡⲧⲟⲟⲩ ⲙⲡⲙⲁ ⲛⲉⲓ ⲉϩⲣⲁⲓ ⲛⲉⲥⲕⲟⲡⲟⲥ ⲇⲉ ⲁϥⲧⲁⲙⲉⲡⲣⲣⲟ ⲉϥϫⲱ ⲙⲙⲟⲥ ⲛⲁϥ ϫⲉ ⲉⲓⲥ ⲛⲣⲱⲙⲉ ⲁⲓⲛⲁⲩ ⲉⲣⲟⲟⲩ ⲛⲧⲉϩⲓⲏ ⲛⲟⲣⲱⲛⲏ ⲛⲥⲁ ⲥⲡⲓⲣ ⲙⲡⲧⲟⲟⲩ

13:35  ⲡⲉϫⲉⲓⲱⲛⲁⲇⲁⲃ ⲙⲡⲣⲣⲟ ϫⲉ ⲉⲓⲥ ⲛϣⲏⲣⲉ ⲙⲡⲣⲣⲟ ⲁⲩⲉⲓ ⲕⲁⲧⲁ ⲡϣⲁϫⲉ ⲙⲡⲉⲕϩⲙϩⲁⲗ ⲧⲁⲓ ⲧⲉ ⲑⲉ ⲛⲧⲁⲥϣⲱⲡⲉ

13:36  ⲛⲧⲉⲣⲉϥⲟⲩⲱ ⲇⲉ ⲉϥϣⲁϫⲉ ⲉⲓⲥ ⲛϣⲏⲣⲉ ⲙⲡⲣⲣⲟ ⲁⲩⲉⲓ ⲁⲩⲱ ⲁⲩϥⲓϩⲣⲁⲩ ⲉⲃⲟⲗ ⲁⲩⲣⲓⲙⲉ ⲡⲣⲣⲟ ⲇⲉ ϩⲱⲱϥ ⲁϥⲣⲓⲙⲉ ⲙⲛ ⲛⲉϥϩⲙϩⲁⲗ ϩⲛ ⲟⲩⲛⲟϭ ⲛⲣⲓⲙⲉ ⲉⲙⲁⲧⲉ

13:37  ⲁⲃⲉⲥⲥⲁⲗⲱⲙ ⲇⲉ ⲁϥⲡⲱⲧ ⲁϥⲃⲱⲕ ⲉⲣⲁⲧϥ ⲛⲑⲟⲗⲙⲁⲓ ⲡϣⲏⲣⲉ ⲛⲉⲙⲓⲟⲩⲇ ⲡⲣⲣⲟ ⲛⲅⲉⲇⲥⲟⲩⲣ ⲉϩⲣⲁⲓ ⲉⲡⲕⲁϩ ⲙⲙⲁⲭⲁⲇ ⲁⲩⲱ ⲡⲣⲣⲟ ⲁϥⲣϩⲏⲃⲉ ⲙⲡⲉϥϣⲏⲣⲉ ⲛⲛⲉϩⲟⲟⲩ ⲧⲏⲣⲟⲩ

13:38  ⲁⲃⲉⲥⲥⲁⲗⲱⲙ ⲇⲉ ⲁϥⲡⲱⲧ ⲁϥⲡⲱⲧ ⲉϩⲣⲁⲓ ⲉⲅⲉⲇⲥⲟⲩⲣ ⲁⲩⲱ ⲛⲉϥⲙⲙⲁⲩ ⲛϣⲟⲙⲧⲉ ⲛⲣⲟⲙⲡⲉ

13:39  ⲡⲣⲟ ⲇⲉ ⲁϥϩⲣⲟⲕ ⲉⲧⲉⲙⲉⲓ ⲉⲃⲟⲗ ⲉⲕⲱⲧⲉ ⲛⲥⲁ ⲁⲃⲏⲥⲁⲗⲱⲙ ⲉⲙⲟⲟⲩⲧϥ ⲉⲃⲟⲗ ϫⲉ ⲁⲩⲥⲉⲗⲥⲱⲗϥ ⲉϫⲛ ⲁⲙⲛⲱⲛ ϫⲉ ⲁϥⲙⲟⲩ