Site uses cookies to provide basic functionality.

OK
JEREMIAH
Prev Up Next
Chapter 43
Jere Aleppo 43:1  ויהי ככלות ירמיהו לדבר אל כל העם את כל דברי יהוה אלהיהם אשר שלחו יהוה אלהיהם אליהם—את כל הדברים האלה  {ס}
Jere Aleppo 43:2  ויאמר עזריה בן הושעיה ויוחנן בן קרח וכל האנשים הזדים  אמרים אל ירמיהו שקר אתה מדבר—לא שלחך יהוה אלהינו לאמר לא תבאו מצרים לגור שם
Jere Aleppo 43:3  כי ברוך בן נריה מסית אתך בנו—למען תת אתנו ביד הכשדים להמית אתנו ולהגלות אתנו בבל
Jere Aleppo 43:4  ולא שמע יוחנן בן קרח וכל שרי החילים וכל העם—בקול יהוה  לשבת בארץ יהודה
Jere Aleppo 43:5  ויקח יוחנן בן קרח וכל שרי החילים את כל שארית יהודה—אשר שבו מכל הגוים אשר נדחו שם לגור בארץ יהודה
Jere Aleppo 43:6  את הגברים ואת הנשים ואת הטף ואת בנות המלך ואת כל הנפש אשר הניח נבוזראדן רב טבחים את גדליהו בן אחיקם בן שפן ואת ירמיהו הנביא ואת ברוך בן נריהו
Jere Aleppo 43:7  ויבאו ארץ מצרים כי לא שמעו בקול יהוה ויבאו עד תחפנחס  {ס}
Jere Aleppo 43:8  ויהי דבר יהוה אל ירמיהו בתחפנחס לאמר
Jere Aleppo 43:9  קח בידך אבנים גדלות וטמנתם במלט במלבן אשר בפתח בית פרעה בתחפנחס—לעיני אנשים יהודים
Jere Aleppo 43:10  ואמרת אליהם כה אמר יהוה צבאות אלהי ישראל הנני שלח ולקחתי את נבוכדראצר מלך בבל עבדי ושמתי כסאו ממעל לאבנים האלה אשר טמנתי ונטה את שפרורו (שפרירו) עליהם
Jere Aleppo 43:11  ובאה (ובא) והכה את ארץ מצרים—אשר למות למות ואשר לשבי לשבי ואשר לחרב לחרב
Jere Aleppo 43:12  והצתי אש בבתי אלהי מצרים ושרפם ושבם ועטה את ארץ מצרים כאשר יעטה הרעה את בגדו ויצא משם בשלום
Jere Aleppo 43:13  ושבר את מצבות בית שמש אשר בארץ מצרים ואת בתי אלהי מצרים ישרף באש  {פ}