Kekchi - Nehemiah - 8

8:1  Saˈ xcuuk li po eb laj Israel queˈxchˈutub ribeb chixjunileb aran Jerusalén saˈ li neba̱l li cuan chiru li oqueba̱l bar nequeˈnumeˈ cuiˈ li nequeˈbelan haˈ. Queˈxtzˈa̱ma chiru laj Esdras laj tzˈi̱b nak tixcˈam chak li hu li tzˈi̱banbil cuiˈ li chakˈrab li quiqˈueheˈ re laj Moisés xban li Dios chokˈ reheb laj Israel.

8:2  Saˈ xbe̱n li cutan re li xcuuk li po laj Esdras laj tij quixcˈam chak li hu li tzˈi̱banbil cuiˈ li chakˈrab re ta̱ril xsaˈ chiruheb chixjunileb li chˈutchˈu̱queb aran, joˈ cui̱nk, joˈ ixk ut joˈ ajcuiˈ chixjunileb li teˈru̱k xtaubal ru li xya̱lal li a̱tin li ta̱ril saˈ li hu.

8:3  Ut laj Esdras quiril xsaˈ li hu chiruheb chixjunileb li cuanqueb saˈ li neba̱l li cuan chiru li oqueba̱l bar nequeˈnumeˈ cuiˈ li nequeˈbelan haˈ. Quixtiquib rilbal saˈ li hu tzˈi̱banbil cuiˈ li chakˈrab chalen ekˈela toj quicuulac cuaˈleb chiruheb chixjunileb li cuanqueb aran, joˈ cui̱nk, joˈ ixk, ut joˈ ajcuiˈ chiruheb li queˈru xtaubal ru. Ut chixjunileb queˈxcanab rib chirabinquil li cˈaˈru naxye saˈ li chakˈrab.

8:4  Laj Esdras, li nacˈutuc re li chakˈrab chiruheb li tenamit, xakxo saˈ xbe̱n li tusbil cheˈ li queˈxyi̱b re ta̱xakli̱k cuiˈ. Ut eb li cui̱nk aˈin xakxo̱queb chixcˈatk saˈ lix nim ukˈ laj Esdras: laj Matatías, laj Sema, laj Anías, laj Urías, laj Hilcías, ut laj Maasías. Ut saˈ lix tzˈe xakxo̱queb laj Pedaías, laj Misael, laj Malquías, laj Hasum, laj Hasbadana, laj Zacarías ut laj Mesulam.

8:5  Chixjunileb li tenamit li cuanqueb aran queˈril nak laj Esdras quixte li hu li tzˈi̱banbil cuiˈ li chakˈrab xban nak najt xteram li naˈajej li xakxo cuiˈ. Nak quixte li hu, chixjunileb li tenamit queˈxakli.

8:6  Laj Esdras quixlokˈoni li Ka̱cuaˈ li nimajcual Dios ut chixjunileb li tenamit queˈxtaksi li rukˈeb ut queˈxye: —¡Joˈcan taxak! ¡Joˈcan taxak!— Queˈxcubsi ribeb chiru li Ka̱cuaˈ ut queˈxxulub lix jolomeb, ut queˈxlokˈoni li Dios.

8:7  Ut eb laj levita yo̱queb chixchˈolobanquil xya̱lal li chakˈrab chiruheb li tenamit. Ut eb li tenamit queˈxqˈue xchˈo̱l chirabinquil. Eb laj levita, aˈaneb aˈin: laj Jesúa, laj Bani, laj Serebías, laj Jamín, laj Acub, laj Sabetai, laj Hodías, laj Maasías, laj Kelita, laj Azarías, laj Jozabed, laj Hanán ut laj Pelaía.

8:8  Eb aˈan yo̱queb chirilbal xsaˈ li hu li tzˈi̱banbil cuiˈ li chakˈrab chi tzˈakal re ru ut queˈxchˈolob xya̱lal re nak li tenamit teˈxtau ru chi us.

8:9  Nak queˈrabi cˈaˈru naxye saˈ li chakˈrab queˈoc chi ya̱bac. Ut laj Nehemías li gobernador, ut laj Esdras laj tij, ut laj tzˈi̱b, ut eb laj levita li yo̱queb chixchˈolobanquil lix ya̱lal reheb li tenamit, queˈxye reheb: —Miyotˈeˈ e̱chˈo̱l ut mexya̱bac xban nak li cutan aˈin kˈaxal lokˈ chiru li Ka̱cuaˈ li kaDios.—

8:10  Ut queˈxye ajcuiˈ reheb: —Chenima ru li cutan aˈin xban nak li cutan aˈin kˈaxal lokˈ chiru li Ka̱cuaˈ. Mirahoˈ e̱chˈo̱l. Tzacahomak li cha̱bil tzacae̱mk ut ucˈumak li cha̱bil vino li quiˈ ut qˈuehomak xtzacae̱mk li ma̱cˈaˈ cuan reheb yi̱banbil. Ut chisahokˈ taxak saˈ e̱chˈo̱l xban nak li sahil chˈo̱lej li naxqˈue li Ka̱cuaˈ, aˈan naxqˈue xcacuil kachˈo̱l.—

8:11  Eb laj levita yo̱queb ajcuiˈ xcˈojobanquil xchˈo̱leb li tenamit ut queˈxye reheb: —Mirahoˈ chic le̱ chˈo̱l. Canabomak ya̱bac xban nak li cutan aˈin kˈaxal lokˈ chiru li Ka̱cuaˈ, chanqueb.

8:12  Ut chixjunileb li tenamit queˈxninkˈei ru li cutan. Queˈco̱eb chi cuaˈac ut chi ucˈac ut queˈxqˈue ajcuiˈ xcuaheb li ma̱cˈaˈ cuan reheb. Ut cˈajoˈ nak queˈsahoˈ saˈ xchˈo̱leb xban nak queˈxtau ru li a̱tin li quiyeheˈ saˈ xxiqueb.

8:13  Ut joˈ cuulajak chic queˈxchˈutub ribeb riqˈuin laj Esdras laj tzˈi̱b, eb laj levita ut eb laj tij joˈqueb ajcuiˈ chixjunileb li nequeˈjolomin re li junju̱nk cabal re xtaubal ru chi us li naxye saˈ li chakˈrab.

8:14  Ut queˈxtau retalil tzˈi̱banbil saˈ li chakˈrab li quiqˈueheˈ re laj Moisés xban li Ka̱cuaˈ nak eb laj Israel teˈxyi̱b lix cocˈ muheba̱leb re teˈcua̱nk cuiˈ nak teˈninkˈei̱k saˈ xcuuk li po.

8:15  Ut queˈxtakla resil saˈ eb li tenamit joˈ ajcuiˈ Jerusalén ut queˈxye reheb: —Ayukex saˈ eb li tzu̱l ut te̱sicˈ chak rukˈeb li cheˈ Olivo, li cheˈ mirto, li cheˈ palma ut li chaj joˈ ajcuiˈ chixjunileb li cheˈ li cuan xxak chi us re xyi̱banquil le̱ cocˈ muheba̱l joˈ tzˈi̱banbil saˈ li chakˈrab, chanqueb.

8:16  Joˈcan nak co̱eb chixjunileb li tenamit ut queˈxsicˈ rukˈeb li cheˈ re teˈxyi̱b lix cocˈ muheba̱leb. Cuan queˈxyi̱b lix cocˈ muheba̱leb saˈ li neba̱l li cuan saˈ xbe̱n li rochocheb. Ut cuan queˈxyi̱b saˈ li neba̱l re li rochocheb. Ut queˈxyi̱b ajcuiˈ saˈ li neba̱l re lix templo li Dios. Ut queˈxyi̱b ajcuiˈ saˈ li neba̱l li cuan cuiˈ li oqueba̱l bar nequeˈnumeˈ cuiˈ li nequeˈbelan haˈ ut queˈxyi̱b ajcuiˈ cuan cuiˈ li oqueba̱l Efraín xcˈabaˈ.

8:17  Chixjunileb li queˈsukˈi cuiˈchic Jerusalén queˈxyi̱b lix cocˈ muheba̱leb ut aran queˈcuan chi saˈ nak yo̱queb chi ninkˈei̱c. Chalen saˈ eb li cutan nak quicuan laj Josué li ralal laj Nun, ma̱ jun sut queˈxba̱nu chi joˈcan. Ut cˈajoˈ nak queˈsahoˈ saˈ xchˈo̱leb laj Israel.

8:18  Laj Esdras rajlal cutan quiril xsaˈ li hu li tzˈi̱banbil cuiˈ li chakˈrab li quiqˈueheˈ reheb xban li Dios. Saˈ li xbe̱n cutan quixtiquib rilbal xsaˈ li hu chiruheb li tenamit toj quirakeˈ li ninkˈe. Ut saˈ lix cuakxak li cutan queˈxchˈutub ribeb re xlokˈoninquil li Ka̱cuaˈ joˈ cˈaynakeb xba̱nunquil.