Azeri - Zechariah - 3

3:1  رب منه بونو گؤرستدي: ربّئن مَله‌يئنئن قاباغيندا باش کاهئن يوشَع دورموشدو. شيطان دا اونون ساغيندا دورموشدو کي، اونا ائتّئهام وورسون.

3:2  رب شيطانا ددي: "رب سنه آجيقلانسين، ای شيطان! اورشَلئمي سِچَن رب، سنه آجيقلانسين. مگر بو آدام اوددان چيخاريلميش، ياريسي يانميش اودون تئکه‌سئنه بَنزه‌مئر؟"

3:3  يوشَع اَينئنه چوخ چئرکلي پالتار گِيئنئب مَله‌يئن قاباغيندا دايانميشدي.

3:4  بو مَلَک قاباغيندا دورانلارا ددي: "اونون اَينئندن چئرکلي پالتاري چيخاردين." سونرا يوشَعه ددي: "باخ گوناهيني سنئن اوستوندن گؤتوردوم، ائندي سنه بايرام پالتاري گِيئندئره‌جيم."

3:5  او واخت من ددئم: "قوي باشينا دا تمئز عمّامه قويسونلار." باشينا تمئز عمّامه قويوب اونا پالتار گِيئندئردئلر. ربّئن مَله‌يي ده يانيندا دورموشدو.

3:6  سونرا ربّئن مَله‌يي يوشَعه شهادت ورئب ددی:

3:7  "قوشونلار ربّی بله ديئر: «اگر يوللاريملا گده‌سن، وردئيئم امرئمي ساخلاياسان، اِوئمه سن باشچيليق اده‌جکسن، صحنلرئمي سن قوروياجاقسان. بورادا دورانلارين آراسيندا ائچه‌ري کچمک حاقّيني سنه ورئرم.»

3:8  ای باش کاهئن يوشَع، سن و سنئن قاباغيندا اوتوران يولداشلارين، قولاق آسين! چونکي اونلار گله‌جک حادئثه‌لرئن علامتئدئر. من «شاخه» آدلي قولومو گتئره‌جيم.

3:9  يوشَعئن قاباغينا قويدوغوم داشا باخين! او تَک داشين يدّي گؤزو وار. اونون اوستونه بئر يازي اويوب يازاجاغام." قوشونلار ربّی بويورور، "بئر گون ائچئنده بو اؤلکه‌نئن گوناهيني اورتادان گؤتوره‌جيم.

3:10  او گون هر بئرئنئز قونشوسونو اؤز تَنه‌يي آلتينا، انجئر آغاجي آلتينا دعوت اده‌جک." قوشونلار ربّی بويورور.