TpiKJPB - Joshua - 16

16:1  ¶ Na hap satu bilong ol pikinini bilong Josep i pundaun i stat long Jordan klostu long Jeriko, i go inap long wara bilong Jeriko long hap is, i go long dispela ples i no gat man i lusim Jeriko i go antap long olgeta hap bilong maunten Betel,

16:2  Na i go ausait i lusim Betel i go long Lus, na ran i go inap long ol hap arere bilong Arki i go long Atarot,

16:3  Na i go daun i go long hap wes long hap arere bilong Jafleti, i go long hap arere bilong Bet-horon daunbilo, na long Geser. Na ol hap i go ausait bilong en i stap long biksi.

16:4  Olsem na ol pikinini bilong Josep, Manasa na Ifraim, i kisim ol samting papa i givim pikinini bilong ol.

16:5  ¶ Na hap arere bilong ol pikinini bilong Ifraim bilong bihainim ol famili bilong ol i olsem, yes, hap arere bilong ol samting papa i givim pikinini bilong ol long sait bilong hap is em i Atarot-adar, i go long Bet-horon antap.

16:6  Na hap arere i go ausait i go long biksi i go long Mikmeta long sait bilong hap not. Na hap arere i go nabaut long hap is i go long Teanat-sailo, na i ran klostu long en long hap is long Janoha.

16:7  Na em i lusim Janoha i go daun long Atarot, na i go long Nearat, na i kamap long Jeriko, na i go ausait long Jordan.

16:8  Hap arere i lusim Tapua i go ausait i go long hap wes i go long wara Kana. Na ol hap i go ausait bilong en i stap long biksi. Dispela em i samting papa i givim pikinini bilong lain bilong ol pikinini bilong Ifraim long ol famili bilong ol.

16:9  Na ol wan wan biktaun bilong ol pikinini bilong Ifraim i stap namel long ol samting papa i laik givim ol pikinini bilong ol pikinini bilong Manasa, olgeta biktaun wantaim ol vilis bilong ol.

16:10  Na ol i no ranim i go ausait ol lain Kenan husat i stap long Geser. Tasol ol lain Kenan i stap namel long ol lain Ifraim inap long tude, na ol i stap wokboi aninit long takis.