Kapingamarangi - Nehemiah - 1

1:1  Aanei nnelekai Nehemiah go di tama Hacaliah ne-helekai-ai. I-lodo di malama go Kislev, i-di madalua ngadau a Artaxerxes nogo hai di king aamua o Persia, gei au go Nehemiah nogo noho i Susa, go di waahale e-dagi tenua deelaa.

1:2  Malaa, Hanani, tangada i ogu duaahina-daane, gaa-dau i-golo mai i Judah mo nia daane ala i-golo, gei au ga-heeu gi digaula di hai o digau o Jew ala ne-hula gi-muli gi nadau gowaa donu, mo-di hai o Jerusalem.

1:3  Digaula ga-helekai-mai gi-di-au bolo digau ala ne-dubu ala guu-noho i-lodo nadau henua donu, la-guu-tale ginai di haingadaa mai baahi digau mai-i-daha ala e-haganiga digaula, gu-haihai digaula hagahuaidu. Digaula ga-helekai-mai labelaa bolo di abaaba Jerusalem gu-meheu gi-lala, gei di ngudu di abaaba o-di waahale digi hauhia haga-hoou, daamada mai di madagoaa dela ne-dudu go di ahi.

1:4  Dogu longono-e-au nia mee aanei, gei au gaa-noho gi-lala, gaa-dangi. Au ga-dangidangi i-nia laangi e-logo, digi miami, gaa-hai dagu dalodalo gi God, ga-helekai,

1:5  “Meenei Dimaadua, go di God di langi, Kooe dela e-aamua ge hagamadagudia huoloo! Kooe dela e-manawa-dahi huoloo ge e-daudali dau hagababa dela ne-hai gi digau ala e-aloho i-di-Goe ge e-haga-kila-aga au helekai.

1:6  Goe hila-mai gi-di-au, hagalongo gi agu dalodalo ala e-dangidangi-iei au i-di aa mo-di boo, bolo Goe gii-hila ang-gi au hege, digau Israel. Au e-haagi bolo gimaadou, go digau Israel la digau gu-ihala. Madau maadua-mmaadua mo au, gimaadou gu-haihai madau huaidu.

1:7  Gimaadou gu-hai-baahi adu gi-di-Goe, ge digi hagakila au mee ala ne-hai-mai gi gimaadou bolo gi-heia. Gimaadou gu-dagadagahi au haganoho ala ne-hagi-anga Kooe gi Moses, bolo gi-hagia-mai gi gimaadou.

1:8  Goe gi-langahia dau helekai ne-hai gi Moses dela e-hai boloo: ‘Maa goodou digau Israel hagalee daudali mo-di modudahi mai gi-di-Au, gei Au ga-haga-maaheu goodou dagidahi laa-lodo nia guongo ala i-golo.

1:9  Gei maa goodou ga-huli-mai gi-di-Au, ga-haga-kila-aga agu mee ala ne-haga-noho adu gi goodou bolo gi-heia, gei Au ga-laha-mai labelaa goodou gi dagu gowaa dela ne-hilihili belee hai di gowaa e-hagalaamua-ai dogu ingoo, ma e-aha maa goodou e-noho i-nia mada o henuailala.’

1:10  “Meenei Tagi, gimaadou go au hege, go au daangada. Kooe dela ne-haga-dagaloaha gimaadou mai o mogobuna mo mai oo mahi aamua.

1:11  Goe hagalongo gi dagu dangidangi mo nia dangidangi o au hege huogodoo ala i-golo, ala e-hagalaamua Goe. Goe hila-mai gi-di-au dangi-nei, gii-mee au di-gida dogu dumaalia mai baahi di king.” I-nia laangi aalaa, gei au nogo hai tangada madamada humalia nia waini di king.