Kapingamarangi - Nehemiah - 8

8:1  Di hidu malama, gei digau Israel guu-noho i-lodo nadau gowaa, mo i-lodo nadau waahale. Dahi laangi hua o-di malama deelaa, gei digaula huogodoo ga-dagabuli-mai gi-di gowaa e-dahi i Jerusalem, i-di malaelae i taalinga di abaaba, dela e-haga-ingoo bolo di Bontai Wai. Digaula ga-tangi gi Ezra bolo gi-gaamai di Beebaa Nnaganoho. Ezra la tangada hai-mee-dabu dela e-kabemee huoloo di hai o Nnaganoho a Moses ala ne-wanga go Dimaadua gi digau Israel.

8:2  Malaa, Ezra gaa-daa di beebaa, gaa-kae gi-di gowaa dela e-dagabuli-ai nia daangada, nia daane, nia ahina mono dama ala gu-iloo di hagabaubau ge gu-iloo di tonu gi-nia mee.

8:3  Ezra gaa-dau di Beebaa Nnaganoho gi digaula i-di gowaa dela e-hoohoo gi-di bontai di abaaba, daamada mai luada gaa-dae gi-di oodee, gei digaula gu-hagalongo hagahumalia huoloo gi-di dau o-di Beebaa Nnaganoho.

8:4  Ezra e-duu i-hongo di hada dela ne-hau gi-di laangi hagalabagau deenei. Gei-ogo digau aanei e-tuu i-di baahi gau-donu o Ezra: go Mattithiah, Shema, Anaiah, Uriah, Hilkiah, mo Maaseiah, gei-ogo digau aanei e-tuu i-baahi gau-ihala o-maa: Pedaiah, Mishael, Malchijah, Hashum, Hashbaddanah, Zechariah, mo Meshullam.

8:5  Ezra e-duu i-hongo di hada, gei-ogo nia daangada huogodoo e-mmada-aga gi mee. Di madagoaa o-mee ne-huge di beebaa, digaula huogodoo guu-tuu i-nua.

8:6  Ezra ga-helekai, “Gidaadou gi-hagaamuina Dimaadua, go di God Aamua!” Gei-ogo digau huogodoo gu-taiaga nadau lima, ga-helekai, “Amen! Amen!” Gei digaula gaa-togo gi-lala i-hongo di gelegele ga-daumaha gi Dimaadua.

8:7  Gei digaula gaa-tuu i-nua i nadau lohongo, gei-ogo digau Levi aanei ga-haga-modomodongoohia gi digaula nia haganoho: go Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan mo Pelaiah.

8:8  Digaula e-haga-donudonu nia haganoho a God gi nnelekai o tenua deelaa, bolo gi-modongoohia gii-donu ginai nia daangada.

8:9  Di madagoaa nia daangada ne-longono-ginaadou di hai o-nia haganoho ala nogo dau, nadau lodo gu-ngalungalua, gu-daamada gu-tangitangi, gei Nehemiah go di gobinaa, mo Ezra tangada hai-mee-dabu dela e-kabemee huoloo di hai o Nnaganoho, mo digau Levi ala e-haga-modomodongoohia nnaganoho, digaula ga-helekai ang-gi nia daangada huogodoo, “Dangi-nei la di langi e-hagadabu ang-gi Dimaadua di-godou God, goodou hudee tangitangi.

8:10  Goodou hula gi godou hale, heia godou haga-miami. Goodou wanga-ina godou meegai mo nia waini gi digau ala hagalee dohu nadau meegai. Dangi-nei la di laangi dabu ang-gi Dimaadua, goodou hudee manawa-gee, idimaa, di tene dela e-gowadu go Dimaadua le e-hagamaaloo-aga goodou.”

8:11  Digau Levi aalaa ga-heehee i-mehanga digaula, belee boliboli digaula, mo-di helekai ang-gi digaula bolo gi-hudee manawa-gee, idimaa dangi-nei la di laangi dabu.

8:12  Malaa, nia daangada huogodoo guu-hula gi nadau hale, gu-miamiami mo-di inu, mo-di tenetene, gei gu-haangai nia daangada ala i-golo, idimaa, digaula guu-donu gi nnelekai ala ne-dau gi digaula.

8:13  Di laangi nomuli, gei nia dagi madahaanau mono gau hai-mee-dabu mo digau Levi gaa-hula gi Ezra, belee aago di hai o nnaganoho.

8:14  Digaula ga-gidee bolo Nnaganoho a Dimaadua ala ne-wanga gi Moses belee hagi-anga gi digaula, la-guu-dugu bolo digau Israel la-gii-noho i-lodo nia damaa-hale hagaabili i-di waalooloo o Tagamiami o-nia Damaa-hale Hagaabili i-di hidu malama.

8:15  Digaula gaa-hai gi digaula bolo gi-haga-iloo laa-lodo Jerusalem mo i-lodo nia waahale ala i-golo boloo, “Goodou hula gi-hongo nia dama-gonduu, goweia godou manga laagau-‘pine’, nia manga laagau-olib, mo nia manga mai nia hagadilinga laagau ala i-golo, nia ‘myrtle’ mo nia niu, e-hai-ai nia dama-hale lligi, be-di hai dela guu-hai i-lodo Nnaganoho.”

8:16  Malaa, digaula guu-hele nadau manga laagau, e-hau nadau dama-hale i-hongo nadau hale, mo i-di gili nadau hale, mo i-di malaelae di Hale Daumaha mo i-nia gowaa ala e-heetugi nia daangada ala e-hoohoo gi-di Bontai Wai mo-di Bontai Ephraim.

8:17  Nia daangada huogodoo ala ne-lloomoi i nadau hai-hege i Babylon gu-haga-duu nadau dama-hale aalaa, guu-noho i-no-lodo. Deenei di hai matagidagi Taumaha deenei i-muli di madagoaa o Joshua, tama-daane a Nun. Nia daangada huogodoo gu-ngalungalua mo-di tenetene.

8:18  Daamada di dahi laangi o Taumaha deelaa, gaa-dae gi-di haga-odi o-di laangi hagamuliagina o Taumaha, digaula e-daudau hunu gowaa i-lodo di Beebaa Nnaganoho i-nia laangi huogodoo. Digaula gu-haihai di-nadau Daumaha deenei i-nia laangi e-hidu, ge di walu laangi digaula e-hai di-nadau daumaha haga-lawa, be-di hai dela guu-dugu i-lodo Nnaganoho.