Kapingamarangi - Nehemiah - 6

6:1  Sanballat, Tobiah, Geshem mo madau hagadaumee ala i-golo gu-longono bolo gimaadou guu-lawa di-hau di abaaba, deai di gowaa e-bongoo ai, ma e-aha maa gidaadou digi taiaga nia bontai.

6:2  Sanballat mo Geshem e-hagau-mai di-nau haga-iloo bolo gimaadou e-heetugi i tei guongo i-di Gowaa-Baba o Ono, dela di-nadau hai belee haga-huaidu au.

6:3  Au ga-hagau agu gau belee hagamodongoohia gi digaula boloo, “Au e-hai dagu hegau hagalabagau. Au e-deemee di-hana gi-golo. Au hagalee dugu di moomee bolo e-hanadu e-mmada goolua i-golo.”

6:4  Digaula e-hagau mai haga-haa go di haga-iloo la-hua, gei nia madagoaa huogodoo gei au e-helekai go telekai la-hua.

6:5  Sanballat gu-hagau-mai dana hege i-di lima holongo, di lede deenei dono hagamodongoohia nonua ai.

6:6  Deenei di lede: “Geshem gu-helekai-mai bolo nia helekai i-golo e-hagadeledele i-mehanga digau ala i tadau baahi bolo goe mo digau o Jew e-hagamamaanadu bolo goodou gi-huli gi-daha mo-di king aamua o Persia, deenei tadinga di-godou hagaduu-aga hoou di abaaba deelaa. Mee gu-helekai-mai labelaa bolo goe e-hagatogomaalia e-hai di king.

6:7  Gei goe gu-hagababa ang-gi nia soukohp bolo digaula gii-hula gi hagadele-ina bolo goe di king o Judah. Di king aamua o Persia la-ga-longono-ia di-mee deenei, deelaa-laa au e-hiihai bolo gidaua e-heetugi e-helekai di-mee deenei.”

6:8  Gei au gaa-hui telekai a-maa boloo, “Telekai e-donu i-lodo au helekai ai. Kooe-hua ne-bida hai au helekai aanaa.”

6:9  Digaula e-hagamada bolo e-hagamadagudagu gimaadou bolo gii-dugu di moomee. Gei au gaa-hai dagu dalodalo boloo, “Meenei God, Goe hagamaaloo-ina au!”

6:10  Di madagoaa deelaa, gei au gaa-hana e-heetugi gi Shemaiah, tama ni Delaiah, dono damana madua go Mehetabel. Mee e-deemee di-hana gi-daha mo dono hale, gei mee ga-helekai-mai, “Gidaua gaa-hula gaa-pala hagammuni i-di Gowaa-Dabu i-lodo di Hale Daumaha, gaa-tai nia bontai di Hale Daumaha, idimaa digaula ga-lloomoi ga-daaligi goe boo.”

6:11  Gei au ga-helekai, “Au hagalee tagadilinga daane dela e-lele e-bala hagammuni. Ma di-aha, goe e-hagamamaanadu bolo au ga-dagaloaha gi-daha mo-di made maa au gaa-hana gaa-bala hagammuni i-lodo di Hale Daumaha? Au hagalee hai beenaa.”

6:12  I dogu hagamamaanadu di-mee deenei, ga-modongoohia bolo God digi helekai gi Shemaiah, gei ma go Tobiah mo Sanballat ala ne-hui halahalau mee bolo gi-hagi-mai telekai deelaa.

6:13  Digaula ne-belee hai au gi-madagu, e-hai au gii-hala, belee hagahuaidu dogu ingoo, ge haga-langaadia au.

6:14  Gei au ga-dalodalo, “Meenei God, Goe gi-langahia di-mee Tobiah mo Sanballat ne-hai, ge gi-hagaduadua-ina meemaa. Goe gi-langahia-e-Goe di ahina go Noadiah mo nia soukohp ala i-golo huogodoo ala gu-hagamada guu-hai au gi-madagu.”

6:15  I-muli nia laangi madalima maa-lua o-di moomee deelaa, di abaaba hagatau guu-lawa di-hai i-di madalua maa-lima laangi o-di malama go Elul.

6:16  Madau hagadaumee ala e-haganiga gimaadou ne-longono-ginaadou, malaa, digaula gu-iloo bolo ginaadou gu-langaadia, idimaa nia daangada huogodoo gu-iloo bolo di moomee la-guu-lawa, idimaa God nogo madalia di moomee deenei.

6:17  Di madagoaa deelaa, nia dagi o digau o Jew gu-helehelekai ginaadou mo Tobiah.

6:18  Digau dogologo i Judah gu-huli-mai i-di baahi o-maa, idimaa tamana dauaga o-maa, tangada o Jew, go Shecaniah, tama ni Arah. Gei tama-daane a-maa, Jehohanan guu-hai dono lodo gi tama-ahina Meshullam, tama ni Berechiah.

6:19  Nia daangada e-helehelekai i ogu mua i-di hai o nnegau humalia a Tobiah ne-hai, mo-di wanga gi mee nnagadilinga mee huogodoo ala nogo helehelekai-iei au. Gei mee e-hagahagau ana lede i-nia madagoaa huogodoo belee hai au gi-madagu.