Kapingamarangi - Nehemiah - 3

3:1  Deenei di hai ne-hau-ai di abaaba di waahale: tagi aamua hai-mee-dabu go Eliashib mo ono ehoo gau hai-mee-dabu gu-hagaduu-aga hoou di Bontai-Siibi, ga-hagadabu di-maa gaa-wanga ono bontai. Digaula gu-haga-dabu di abaaba deelaa ga-hana-adu-loo gi-di gowaa dela iai di Angulaa o ‘Digau e-Lau’ mo-di Angulaa i Hananel.

3:2  Nia daane o Jericho guu-hau di gunga nomuli. Zaccur tama ni Imri guu-hau di gunga nomuli.

3:3  Di madahaanau Hassenaah gu-haga-duu-aga di Bontai Iga. Digaula gu-haganoho nia waduu, giodo mo nia bontai, ge guu-wanga nnagadilinga baalanga tai bontai.

3:4  Meremoth, tama ni Uriah dela dono damana-madua go Hakkoz, guu-hau di gunga di abaaba nomuli. Meshullam, tama ni Berechiah, dono damana madua go Meshezabel guu-hau hoou di gunga di abaaba nomuli. Zadok, tama ni Baana, guu-hau hoou di gunga di abaaba nomuli.

3:5  Nia daane o Tekoa guu-hau di gunga nomuli, gei nia dagi o-di waahale e-de-hiihai di-hai di moomee haingadaa dela ne-wanga go nia dagi di moomee deelaa gi digaula.

3:6  Joiada, tama ni Paseah, mo Meshullam, tama ni Besodeiah, gu-hagaduu-aga labelaa di Bontai Jeshanah. Digaula gu-haganoho nia waduu, giodo mo nia bontai, ge guu-wanga nnagadilinga baalanga tai bontai.

3:7  Melatiah, tangada Gibeon, Jadon, tangada Meronoth, mo nia daane o Gibeon mo Mizpah guu-hau di gunga di abaaba nomuli, gaa-tugi-loo i-di gowaa e-noho-ai di gobinaa o tenua baahi-gi-dai o Euphrates.

3:8  Uzziel, tama ni Harhaiah, tangada tugi-goolo, guu-hau di gunga nomuli. Hananiah, tangada hai lolo-kala, guu-hau di gunga nomuli, tugi-loo di abaaba dela e-hagaingoo bolo di Abaaba Palaha.

3:9  Rephaiah, tama ni Hur, di tagi o-di baahi di guongo Jerusalem, guu-hau di gunga nomuli.

3:10  Jedaiah, tama Harumaph, guu-hau di gunga nomuli, dela e-hoohoo gi dono hale. Hattush, tama ni Hashabneiah guu-hau di gunga nomuli.

3:11  Malchijah, tama ni Harim, mo Hasshub, tama ni Pahath=Moab guu-hau di gunga nomuli, mo-di hagaduu-aga di Angulaa o-nia Mee-Dunu-Mee.

3:12  Shallum, tama ni Hallohesh, di tagi o-di baahi guongo Jerusalem dela i-golo, guu-hau di gunga nomuli, gei nia dama-ahina a-maa gu-hagamaamaa a-mee i dana moomee.

3:13  Hanun mo digau di waahale Zanoah gu-hagaduu-aga hoou di Bontai di Gowaa-Baba. Digaula gu-haganoho nia bontai, ge guu-wanga nnagadilinga baalanga tai bontai. Digaula guu-hau hoou di abaaba deelaa gi-nia piidi e-1,500 gaa-tugi-loo i-di Bontai Kili-Geinga.

3:14  Malchijah, tama ni Rechab, di tagi ni-di waahale Beth=Haccherem, gu-hagaduu-aga hoou di Bontai Kili-Geinga, gu-haganoho nia bontai, ge guu-wanga nnagadilinga baalanga tai bontai.

3:15  Shallum, tama ni Colhozeh, tagi o tenua go Mizpah, gu-hagaduu-aga hoou di Bontai di Monowai, guu-gahu di gowaa heehee nia daangada, gu-taiaga hagatau hagahumalia di abaaba, mo nia bontai, mo nia mee tai mono baalanga. Gei mee gu-hagaduu-aga di abaaba hoohoo gi-di hadagee di king i-baahi di Monowai Shelah, gaa-tugi-loo i-di gaagenge dela e-gaga-iha i-di Waahale o David.

3:16  Nehemiah, tama ni Azbuk, di tagi ni-di baahi tenua go Beth=Zur guu-hau di gunga nomuli, gaa-tugi-loo i taalunga David, mo-di monowai, mo nia hale digau-dauwa.

3:17  Hunu gau Levi ala gu-hagaduu-aga hoou di abaaba deenei: Rehum, tama ni Bani, guu-hau di gunga nomuli. Hashabiah, di tagi di baahi tenua go Keilah, guu-hau di gunga nomuli, e-pono digau tenua o-maa.

3:18  Bavvai, tama ni Henadad, di tagi di baahi tenua go Keilah dela i-golo, guu-hau di gunga nomuli.

3:19  Ezer, tama ni Jeshua, di tagi o Mizpah, guu-hau di gunga nomuli, dela i-mua di hale dugu goloo-dauwa, gaa-tugi-loo i-di gowaa dela e-huli-ai di abaaba.

3:20  Baruch, tama ni Zabbai, guu-hau di gunga nomuli gii-tugi-loo i-di bontai di hale tagi aamua hai-mee-dabu go Eliashib.

3:21  Meremoth, tama ni Uriah, dono damana madua go Hakkoz, guu-hau di gunga nomuli, guu-tugi-loo i-di hagaodi di hale Eliashib.

3:22  Hunu gau hai-mee-dabu ala gu-hagaduu-aga hoou di abaaba deenei: Digau hai-mee-dabu mai nia gowaa e-hoohoo gi Jerusalem guu-hau di gunga nomuli.

3:23  Benjamin mo Hasshub guu-hau di gunga nomuli, dela hualaa i-mua di-nau hale. Azariah, tama ni Maaseiah, dono damana madua go Ananiah, guu-hau di gunga nomuli, dela hualaa i-mua dono hale.

3:24  Binnui, tama ni Henadad, guu-hau di gunga nomuli, daamada i-di hale Azariah gaa-tugi-loo i-di madaaduge di abaaba deelaa.

3:25  Palal, tama ni Uzai, guu-hau di gunga nomuli, daamada i-di madaaduge di abaaba mo i-di angulaa o-di hale di king mugi-nua, hoohoo gi-di malaelae digau hagaloohi. Pedaiah, tama ni Parosh, guu-hau di gunga nomuli, e-tugi-loo i-di hagaodi bahi-gi-dua taalinga di Bontai Wai, mo-di angulaa digau hagaloohi di Hale Daumaha. Di gowaa deenei la i-baahi hua tama-gowaa dulii dela e-hagaingoo bolo Ophel, di gowaa e-noho-ai digau ala e-ngalua i-di Hale Daumaha.

3:26  Palal, tama ni Uzai, guu-hau di gunga nomuli, daamada i-di madaaduge di abaaba mo i-di angulaa o-di hale di king mugi-nua, hoohoo gi-di malaelae digau hagaloohi. Pedaiah, tama ni Parosh, guu-hau di gunga nomuli, e-tugi-loo i-di hagaodi bahi-gi-dua taalinga di Bontai Wai, mo-di angulaa digau hagaloohi di Hale Daumaha. Di gowaa deenei la i-baahi hua tama-gowaa dulii dela e-hagaingoo bolo Ophel, di gowaa e-noho-ai digau ala e-ngalua i-di Hale Daumaha.

3:27  Nia daane o Tekoa guu-hau di gunga nomuli, di-nadau lua holongo, daamada i-di angulaa hagaloohi damana o digau ala e-hagaloohi di Hale Daumaha, gaa-tugi-loo i-di abaaba taalinga Ophel.

3:28  Di buini gau hai-mee-dabu guu-hau di gunga nomuli, daamada i-di Bontai Hoodo gaa-hana gi-baahi gi-ngeia, tangada-nei mo tangada-nei gi-hauhia di abaaba i-mua dono hale.

3:29  Zadok, tama ni Immer, guu-hau di gunga nomuli dela hualaa i-mua dono hale. Shemaiah, tama ni Shecaniah, tangada benebene o-di Bontai Bahi-i-dua, guu-hau di gunga nomuli.

3:30  Hananiah, tama ni Shelemiah, mo Hanun, di ono dama a Zalaph, guu-hau di gunga nomuli i-di nau lua holongo. Meshullam, tama ni Berechiah, guu-hau di gunga nomuli dela i-mua dono hale.

3:31  Malchijah, tangada tugi-goolo, guu-hau di gunga nomuli, gii-tugi-loo i-di hale digau ngalua o-di Hale Daumaha, mo digau huihui mee e-ngalua i-di ngudu di Bontai Miphkad, hoohoo gi-di madaaduge o-di abaaba dela i-baahi gi-dua-ngeia.

3:32  Digau tugi goolo mo digau huihui mee guu-hau di gunga muliagi-loo, daamada i-di madaaduge, gaa-tugi-loo gi-di Bontai Siibi.