Azeri - Amos - 4

4:1  ای سئزلر، سامئره داغيندا بَسله‌نَن باشان ائنکلري! بو سؤزو اِشئدئن، ای يوخسوللارا ظولم ادن، مؤحتاجلاري اَزَن، اَرلرئنه «گتئر ائچک» دئيَن آروادلار!

4:2  پروردئگار رب اؤز موقدّسلئيي آدينا بله آند ائچئب. «باخ، اوستونوزه اِله واخت گلئر کي، سئزي چَنگللرله، لاپ آخير قالانلارينيزي باليق چکن چَنگللرله چکئب آپاراجاقلار.

4:3  هر بئرئنئز دووارين دَلمه-دِشئيئندن چيخاجاق، موستقئم گده‌جک؛ خِرمونا طرف آتيلاجاقسينيز.» رب بله بويورور.

4:4  «بِيت ائله گدئب گوناه ائشله‌دئن! گئلگالا گلئب گوناهلارينيزي چوخالدين! هر سحر قوربانلارينيزي گتئرئن، هر اوچ گوندن بئر قازانجينيزين اوندا بئر حئصّه‌سئني ورئن.

4:5  تشکّور اوچون مايالي چؤرک يانديريب تقدئم ادئن، گؤنولدن وردئيئنئز تقدئملرئنئزي اعلان ادئب اشئتدئرئن. چونکي سئز ای ائسرايئل اؤولادلاري، بوندان خوشلانيرسينيز!» پروردئگار رب بله بويورور.

4:6  «من بوتون شهرلرئنئزده آغزينيزي بوش قويدوم. هر يرده سئزه چؤرک قيتليغي وردئم. لاکئن گئنه منئم طرفئمه دؤنمه‌دئنئز.» رب بويورور.

4:7  «بوندان علاوه، من بئچئن واختينا اوچ آي قالميش سئزدن ياغيشي کَسدئم. بئر شهرئن اوستونه ياغيش ياغديرديم، آمّا او بئرئنئن اوستونه ياغديرماديم. ياغيش بئر اَکئن اوستونه ياغدي، لاکئن او بئرئنئن اوستونه ياغماديغيندان، او قورودو.

4:8  ائکي-اوچ شهر سو ائچمک اوچون باشقا بئر شهره گتدي، آمّا دويونجا سو ائچمه‌دي. لاکئن گئنه منئم طرفئمه دؤنمه‌دئنئز.» رب بله بويورور.

4:9  «اَکئنئزه ائستي يِل و کوف گؤندره‌رک سئزي دفه‌لرله ووردوم. باغلارينيزي و اوزوملوکلرئنئزي، انجئر و زيتون آغاجلاريني چَيئرتکه يِدي. لاکئن گئنه منئم طرفئمه دؤنمه‌دئنئز.» رب بله بويورور.

4:10  «مئصئرده اولدوغو کئمي آرانيزا وبا گؤنده‌ردئم. جاوانلارينيزي قيلينجلا اؤلدورتدوم. آتلارينيزي سوروب آپارتديرديم. قوشونونوزدان مِيئت ائيئني بورنونوزا چاتديرديم. لاکئن گئنه منئم طرفئمه دؤنمه‌دئنئز.» رب بله بويورور.

4:11  «من سودوملا گوموراني نجه داغيتديم، سئزدن بعضئلرئني ده اِله داغيتديم. سئز اوددان گؤتورولَن اودون کئمي ائدئنئز. لاکئن گئنه منئم طرفئمه دؤنمه‌دئنئز.» رب بله بويورور.

4:12  «ای ائسرايئللی‌لر، بونا گؤره ده سئزئنله بله رفتار اده‌جيم. بو رفتاريما گؤره تارينيزي پئشواز اتمَيه حاضير اولون، ای ائسرايئللی‌لر!»

4:13  اودور داغلارا قورولوش ورن، يِلي يارادان، نه دوشوندويونو ائنسانا بئلدئرَن، سحر ائشيغيني قارانليق ادن، يِر اوزونون اوجا يِرلرئنه آياق باسان- اونون آدي قوشونلار تاريسي رَبدئر.