Kapingamarangi - Ezra - 3

3:1  I-di hidu-malama, digau Israel guu-noho i-lodo nadau waahale, gei digaula huogodoo gu-dagabuli i Jerusalem.

3:2  Gei Joshua, tama a Jehozadak, mo ono ehoo gau hai-mee-dabu, mo Zerubbabel, tama a Shealtiel, mo ono gau huogodoo, digaula gu-haga-duu-aga labelaa di gowaa dudu-tigidaumaha o-di God o Israel belee hai-ai nadau tigidaumaha dudu, be di hai dela guu-lawa di-hihi i-lodo Nnaganoho Moses, tangada hai-hegau a God.

3:3  Ma e-aha maa digau ala ne-lloomoi le e-mmaadagu i digau ala e-noho i tenua deelaa, gei digaula guu-hau-hua di-nadau gowaa dudu-tigidaumaha i-di gowaa hua dela nogo duu-iei di maa i-mua. Malaa, digaula gu-daamada guu-hai nadau tigidaumaha ala e-dudu i-hongo di-maa, i-nia luada mo hiahi.

3:4  Digaula guu-budu guu-hai Tagamiami o-nia Damaa-hale Hagaabili be-di hai dela gu-haganoho, gei digaula e-haihai tigidaumaha i-nia laangi huogodoo ala e-hagadau be-di mee dela guu-dugu.

3:5  Digaula gu-hagapuni nia tigidaumaha dudu ala e-haihai i-nia laangi huogodoo, mo e-haihai labelaa i-di Budu o-di Malama Hoou, mo nadau buni gi-di gowaa e-dahi e-daumaha ang-gi Dimaadua, mo nia tigidaumaha huogodoo ala e-hai ang-gi Dimaadua mai i tangada-nei mo tangada-nei.

3:6  Ma e-aha maa nia daangada digi daamada e-haga-duu-aga hoou di Hale Daumaha, gei digaula gu-daamada-hua di-hai nadau tigidaumaha dudu ang-gi Dimaadua, mai i tahi laangi o-di hidu malama.

3:7  Nia daangada gu-dahi-aga nadau bahihadu e-hui digau hai-hadu mono degitanga, digaula gu-dahi-aga labelaa nadau meegai, mono wai, mono lolo-olib, belee hagau gi digau Tyre mo Sidon, e-koodai gi-nia laagau-‘cedar’ mai Lebanon, ga-dagi-mai lodo-tai gi Joppa. Nia mee huogodoo aanei ne-hai mai i-lala nia mogobuna di king aamua go Cyrus, tangada Persia.

3:8  Di lua malama o-di ngadau i-muli di-nadau lloomoi gi-di gowaa dela e-duu-ai di Hale Daumaha i Jerusalem, digaula ga-daamada ga-ngalua. Zerubbabel, Joshua mo nau ihoo digau o Jew ala i-golo, digau hai-mee-dabu, mo digau Levi, mo digau huogodoo ala ne-lloomoi labelaa gi Jerusalem mai i-di nadau noho hege, ginaadou guu-buni gu-daamada di-nadau moomee. Gei digau Levi ala gu-madalua be nonua nadau ngadau, e-madamada humalia di moomee di hau haga-hoou di Hale Daumaha.

3:9  Jeshua, tangada Levi, mo ana dama-daane mo ono gau, mo Kadmiel mo ana dama-daane ala go di madahaanau o Hodaviah guu-buni ngaadahi bolo ga-madamada humalia mo-di dagi digau ala e-hau haga-hoou di Hale Daumaha deelaa. Gei-ogo digau Levi mai i-di madahaanau o Henadad gu-hagamaamaa labelaa digaula.

3:10  Di-nadau haga-noho di baba o-di Hale Daumaha, digau hai-mee-dabu gu-ulu nadau gahu-lloo gaa-tuu i nadau lohongo, e-kumi nadau labaa, gei digau Levi mai i-di madahaanau Asaph nogo i-golo labelaa mo nadau mee hagatangitangi. Digaula ga-hagahagaamu a Dimaadua be-di hai King David ne-haganoho dono madagoaa nogo king.

3:11  Digaula gu-dadaahili ang-gi Dimaadua taahili hagaamu deenei: “Dimaadua e-manawa-dumaalia, gei dono aloho i digau Israel dono hagaodi ai.” Nia daangada huogodoo guu-wwolo gi-nua-loo e-haga-hagaamu Dimaadua, idimaa di baba o-di hale la-gu-daamada gu-haga-noho.

3:12  Digau dogologowaahee mai i digau hai-mee-dabu mmaadua, mo mai i digau Levi, mo mai i-nia dagi madahaanau ala gu-gidee-ginaadou di Hale Daumaha dela i-mua, la-gu-tangitangi i-di nadau gidee di haga-noho o-di baba o-di Hale Daumaha deenei, idimaa, digaula gu-langahia di Hale Daumaha dela i-mua. Gei digau ala i-golo gu-wwolowwolo mo-di tenetene.

3:13  Ma deai tangada e-mee di-modongoohia ai be aahee digau ala e-tangi, ge aahee digau ala e-tenetene, idimaa, nia lee digaula gu-wwolo-loo gi-nua-loo gu-longono gi-nia gowaa mogowaa.