Site uses cookies to provide basic functionality.

OK
PSALMS
Prev Up Next
Chapter 138
Psal Pohnpeia 138:1  Maing KAUN, I kin patohwan kasapahlkalahngan ong komwi sang nan mohngiongi unsek; I pahn koulkihong komwi koulen kaping mwohn koht akan.
Psal Pohnpeia 138:2  I kin sohpeiong Tehnpasomwi Sarawio, poaridi oh kapinga mwaromwi pwehki sapwellimomwi limpoak poatopoat oh loalopwoat, pwehki omwi ketin kasaledahr duwen mwaromwi oh sapwellimomwi kosonned akan ar lapalahpie.
Psal Pohnpeia 138:3  Komw ketin sapeng ie ni ei patohwan likweriong komwi; komw ketin kakehlakiniedahr sapwellimomwi roson.
Psal Pohnpeia 138:4  Maing KAUN, nanmwarki koaros en sampah pahn kapinga komwi, pwehki ar rongehr sapwellimomwi inou kan.
Psal Pohnpeia 138:5  Re pahn koulki dahme komw ketin wiadahr oh duwen sapwellimomwi roson lapalahpie.
Psal Pohnpeia 138:6  Mehnda ma komw kin ketiket wasa ileilehie, ahpw komw kin ketin kupwure me tikitik kan, oh me aklapalap akan sohte kak ruksang komwi.
Psal Pohnpeia 138:7  Ni ei kin mihla nan apwal akan, komw kin ketin apwahpwalih ie. Komw kin ketin pelianda lingeringer en ei imwintihti kan oh kin ketin kapitkiniehla sapwellimomwi manaman.
Psal Pohnpeia 138:8  Komw pahn ketin kapwaiada sapwellimomwi inou kan koaros; Maing KAUN, sapwellimomwi limpoak me poatopoat. Komw ketin kaunsekala doadoahk me komw ketin tapihadahr.