Pohnpeian - Psalms - 78

78:1  Nei aramas akan, kumwail rong ei padahk, oh rong mwahu dahme I pahn nda.

78:2  I pahn koasoiahda karasaras kaselel kei oh kawehwehda soahng rir kei en ahnsou samwalahr ako,

78:3  soangen ire kei me kitail rongehr oh eseier, soahng kei me atail pahpa ako koasoiaiongkitailehr.

78:4  Kitail sohte pahn ekihsang neitail seri kan; kitail pahn kawehwehiong dih en mwuhr duwen manaman en KAUN-O oh wiepen nin lime lapalap akan oh soahng kapwuriamwei kan me e ketin wiadahr.

78:5  E ketikihong sapwellime aramas en Israel kosonned akan oh kosonned kei ong kadaudok en Seikop. E ketin kaweidki atail pahpa kahlap oko re en padahkihong nair seri kan sapwellime kosonned akan,

78:6  pwe dih en mwuhr en wehwehki oh uhd padahkihong nair seri kan.

78:7  Ih duwen met ar pahn pil likihala Koht oh sohte manokehla dahme e ketin wiahda ahpw re pahn kin kapwaiada sapwellime kosonned akan ahnsou koaros.

78:8  Re sohte pahn duwehte ar pahpa kahlap ako me kahngohdi oh sapeik, me ar likih Koht sohte mwahn kehlail oh re sohte kin loalopwoatohng.

78:9  Mehn Epraim kan me weuwa nair kesik ketieu oh arep kan, re tangdoaui ni rahn en mahweno.

78:10  Re sohte kapwaiada ar inou ong Koht; re sohte men kapwaiada sapwellime kosonned akan.

78:11  Re manokehla dahme e ketin wiadahro, manaman ko me e ketin wiahda mwohn masarail ko.

78:12  Nindokon ar pahpa kahlap ako uduhdiahl, Koht ketin wiahda manaman kei nan wasa patapat en Soan, nan wehin Isip.

78:13  E ketin pwalangpeseng sehdo ni pali riau oh kahluwairail nan ngalangal; oh ketin kawuhdi pali riau en sehdo rasehng dihd riau.

78:14  Ni rahn e ketin kahluwa irail pahn mwetehn depwek ehu oh pwohng ehu pwon sang ni marain en kisiniei.

78:15  E ketin pwalangpeseng paip nan sapwtehn oh ketikihong irail pihl sang loale.

78:16  E kupwurehda pihl en kusieisang nan paipo oh ketin kakusei pihl rasehng pillap pwoat.

78:17  Ahpw re usehlahte ar wiewia dihpiong Koht, oh kahngohdiong Wasa Lapalahpie nan sapwtehno.

78:18  Re kasongosonge Koht ni ar nsenki pekipeki kisin tungoal me re anahne.

78:19  Re aklapalap patohwan ong Koht, ketihtihki, “Pala Koht kak kaunopada atail tungoal nan sapwtehnet?

78:20  Mehlel me e ketin poakih paipo, pihl ahpw kusieisang loale; ahpw ia duwe, e kak ketin katungoalehkin kitail pilawa oh ketikihong sapwellime kan uduk pwe re en tungoale?”

78:21  Koht eri ketin engiengda ni eh ketin karongehda; e ahpw ketin kauwohng kisiniei sapwellime aramas ako, oh sapwellime engieng ahpw laudla,

78:22  pwehki ar sohte likih oh sohte kamehlele me e pahn ketin komourirailla.

78:23  E ahpw ketin mahsendalahng pahnlahng oh ketin ruwese pwe wenihmwen lahng kan en ritida;

78:24  e ahpw ketin kamwerehdi wahn pilawa sang nanleng, ni e ketin kadaridi mana pwe re en tungoale.

78:25  Irail eri tungoale kisin tungoal en tohnleng kan, oh Koht ketikihong irail uwen me re anahne.

78:26  E pil ketin mweidala pwe angin palimese en ipirseli wasa, oh sapwellime manaman en kamwekidada angin palieir;

78:27  e ahpw ketin kadaridiong sapwellime aramas akan pelin menpihr ehu, me tohtohsang piken ni oahroar kan;

78:28  re ahpw pwupwudiong nan werengen impwal ko oh kapilpene wasa re koukousoan ie.

78:29  Aramas ako eri tungoale oh medkihla; Koht ketikihong irail dahme irail anahne.

78:30  Ahpw ni ar saikinte itarki dahme re anahne oh nindokon ar tungutungoal,

78:31  Koht ketin engiengda pahrail oh kemehla nair ohl kehlail ko, me pwulopwul kaselel ko en Israel.

78:32  Mehnda ma e ketin wiahda mepwukat, ahpw aramas akan uselahte wiewia dihp; mehnda ma re uduhdiahl sapwellime manaman akan, ahpw re sohte mwahn kin likih.

78:33  Ih eri ketin kasohrehla ar mour rasehng esingek ehu oh mwadang lupukala ar mour kan ni paisuwed.

78:34  Ni eh ketin kemehla ekei irail, luhwe ko kin sohpeiong; re koluhla oh ngidingidki ar kapakapohng.

78:35  Re kin tamanda me Koht iei soundoareparail, duwen Wasa Lapalap eh kin ketin sewese irail.

78:36  Ahpw ar koasoi kan koaros kin likamw; sohte mehkot me re kin nda kin mehlel.

78:37  Re sohte kin loalopwoatohng; re sohte kin loalopwoatohng ar inou ong ih.

78:38  Ahpw Koht me inenen kalahngan ong sapwellime aramas akan. E ketin mahkikihong irail diparail kan oh sohte ketin kamwomwirailla. Pak tohto e ketin koledi sapwellime engieng oh pein katokehdi engieng en nan kupwure.

78:39  E ketin tamataman me irail ahneki luwet en aramas, rasehng kisinieng me kin ipidohte oh sohrala.

78:40  Ia uwen tohtohn ar kin kahngohdiong nan sapwtehn; ia uwen tohtohn ar kansensuwedihada!

78:41  Re pwurupwurehngete kasongosonge Koht oh katoutouwihala nan kupwuren Koht Sarawien Israel.

78:42  Re manokehla sapwellime manaman lapalap oh rahn me e ketin kapitirailla sang ar imwintihti kan

78:43  oh ketin wiahda sapwellime wiewia kan oh manaman lapalap akan nan wasa patapat en Soan nan wehin Isip.

78:44  E ketin wekidohng ni nta pillap akan, mehn Isip kan ahpw sohla kak nimpil.

78:45  E ketin kadarpeseng loahng pwehn kaloke irail, oh kairu pwehn kauwehla sapwarail.

78:46  E ketin kamwarakpeseng loukust pwehn kangala wahnsapwarail kan oh kamwomwala poadokapw en sapwarail kan.

78:47  E ketin kemehkihla keteu aihs takai arail mwetin wain kan oh arail tuhke en pik kan.

78:48  E ketin kemehkihla nair kou kan melimel en keteu aihs takai oh nair pelinmen teikan lioal.

78:49  E kupwurehda paisuwed laud en lelohng irail ni e ketin kauwohng irail engieng mwuledek, me rasehng meninkeder en mehla.

78:50  E sohte ketin katokehdi sapwellime engieng de komourirailla, ahpw e ketin kemehkinirailla soumwahu lusulus.

78:51  E ketin kemehla pwutak mesenih en peneinei koaros en Isip.

78:52  E ahpw ketin kahluwa sapwellime ko rasehng silepen sihpw men oh ketin kaukauweid irail nan sapwtehno.

78:53  E ketin kahluwa irail ni meleilei oh onepek, oh re sohte kin masak mehkot; a arail imwintihti ko e ketin kakihrala nansed.

78:54  E ahpw ketikidohng irail nan sapweiso sahpw sarawio, pohn nahna me pein ih ketin kalowehdi.

78:55  E ketin kausasang tohn sahpwo nindokon sapwellime ko ar mwekimwekid kohla; e ketin nehkpeseng sapwarailo ong kadaudok en Israel ko oh imwarail kan e ketikihong sapwellime aramas akan.

78:56  Re ahpw kahngohdiong Koht Wasa Lapalap, oh kasongosonge. Re sohte kapwaiada sapwellime kosonned akan,

78:57  ahpw re kahngohdiong oh soaloalopwoat duwehte ar pahpa kahlap ako, re rasehngala arep me pireklahr.

78:58  Re kahngiangihkidahr ar wasahn kaudok en aramas rotorot kan, iangahki neirail dikedik en eni kan.

78:59  Koht ketin engiengda ni eh mahsanihada soahng wet, iei me e ketin soingkihla douluhl sapwellime aramas akan.

78:60  E ketiketla sang nan mwoale nan Sailo, wasa e ketiket ie rehtail mahso.

78:61  E ketin mweidala pwe Kohpwahn Inowo en lohdiong pahn atail imwintihti kan, kohpwao me wia kilel en sapwellime manaman oh lingan.

78:62  E ketin engiengda pahn sapwellime aramas ako oh ketin mweidala pwe re en kamakamala pahn arail imwintihti ko.

78:63  Mwahnakapw akan kin mehla nan mahwen, eri peinakapw akan sohte kin diar me re en pwoudiki.

78:64  Samworo kan kin mehkihla mehla eikek, oh ar liohdi kan sohte mweimweiong re en mwahieikin irail.

78:65  Ni imwilah, Kaun-o ahpw ketida duwehte e ketin ohpala wasa; e duwehte ohl kommwad emen me ket pahn litopw en wain.

78:66  E ketin katangapeseng sapwellime imwintihti kan re ahpw sarohdi oh namenekla kowahlap.

78:67  Ahpw e ketin soikala kadaudok en Sosep kan; e sohte ketin pilada kadaudok en Epraim.

78:68  Pwe kadaudok en Suda me e ketin pilada oh Nahna Saion me e kin ketin poakohng mehlel.

78:69  Wasao me e ketin kauwada ie Tehnpese duwehte mwoale me mi nanleng; e ketin katengehdi duwehte sampah pwehn tengeteng kohkohlahte.

78:70  E ketin pilada sapwellime ladu Depit; e ketikihsang nan sapwen sihpw kan,

78:71  wasa me Depit kin apwahpwalih ie nah pelin sihpw, oh ketin kasapwiladahng en wiahla nanmwarkien Israel, pwehn wiahla silepen sapwellimen Koht aramas akan.

78:72  Depit eri patohwan apwahpwalih irail ni keneinei mehlel oh kin kakaun irail ni koahiek unsek.