Pohnpeian - Psalms - 119

119:1  Meid pai irail kan me ar mour mwakelekel, me kin momour nin duwen kosonned en KAUN-O.

119:2  Meid pai irail kan me kin kapwaiada sapwellime kosonned kan, oh kin peikiong ni kapehd unsek.

119:3  Re sohte mwahn kin wia me sapwung; re kin weweid nan elen KAUN-O.

119:4  Maing KAUN, komw ketikidohngkihtehr sapwellimomwi kosonned kan oh mahsanihong kiht se en peikiong ni loalopwoat.

119:5  Ia uwen ei koapworopworki me I pahn loalopwoat en kolokol sapwellimomwi kaweid kan!

119:6  I sohte pahn namenekla ma I pahn tehk mwahu sapwellimomwi kosonned kan koaros.

119:7  I pahn kapinga komwi ni mohngiong mwakelekel ni ei pahn esehla pwung en sapwellimomwi koasoandi kan.

119:8  I pahn kapwaiada sapwellimomwi kosonned kan; komw dehr ketin likidmelieiehla!

119:9  Ia duwen mwahnakapw men eh kak dadaur eh mour mwakelekel? Eh pahn kin kapwaiada sapwellimomwi kosonned kan.

119:10  I kin song en papah komwi ni mohngiong unsek; komw dehr ketin mweidohng I en kauwehla sapwellimomwi kosonned kan.

119:11  I kin kolokol sapwellimomwi kosonned nan mohngiongi pwe I en dehr wia dihp ong komwi.

119:12  Maing KAUN, I kin kapinga komwi; komw ketin padahkihong ie sapwellimomwi ahl akan.

119:13  Sang ni aweiet I pahn pwurehng lohki kosonned koaros me komw ketikidohr.

119:14  I kin perenki idawehn sapwellimomwi kosonned kan sang ei pahn ahneki dipwisou tohto.

119:15  I kin medemedewe sapwellimomwi kaweid kan, oh kasakasawih sapwellimomwi padahk kan.

119:16  I kin perenki sapwellimomwi kosonned kan; I sohte pahn manokehla sapwellimomwi mahsen kan.

119:17  Komw ketin kupwure ie, sapwellimomwi ladu menet, pwe I en kin momour oh kapwaiada sapwellimomwi padahk kan.

119:18  Komw ketin kapehdpeseng pwoaren mesei kat, pwe I en kak udiahl soahng kapwuriamwei kan nan sapwellimomwi kosonnedo.

119:19  I pahn patopato nin sampah ahnsoute kis; komw dehr ekihsang ie sapwellimomwi kosonned kan.

119:20  Mohngiongi tihwokilahr; ei men ese sapwellimomwi kadeik kan ahnsou koaros.

119:21  Komw ketin angiangih me aklapalap akan; me sohte kin kapwaiada sapwellimomwi mahsen kan kin riahla.

119:22  Komw ketin kasaledekihiehla sang arail kepweikeng oh mwamwahlikin ie, pwe I kapwaiadahr sapwellimomwi kosonned kan.

119:23  Me lapalap akan kin ehupene oh wia ar koasoandi en uhwong ie, a I pahn medemedewehte sapwellimomwi padahk kan.

119:24  Sapwellimomwi kaweid kan me wia kaperenpei oh kaweidpei.

119:25  I lohdier oh wonohnehr nanpwel; komw ketin kakehleiehda nin duwen omwi ketin inoukidahr.

119:26  I wehkadahng komwi mehkoaros me I wiadahr, oh komw ketin sapengieier; komw ketin padahkihong ie sapwellimomwi ahl akan.

119:27  Komw ketin sewese ie pwe I en wehwehki sapwellimomwi kosonned kan, oh I pahn medemedewe duwen sapwellimomwi padahk kupwuriamwei kan.

119:28  I toutoukilahr nsensuwed; komw ketin kakehleiehda nin duwen omwi ketin inoukidahr.

119:29  Komw dehr mweidohng I en weid nan ahl sapwung, komw padahkihong ie sapwellimomwi kosonnedo ni kupwurkalahngan.

119:30  I patohwan piladahr pwe I en peikiong komwi; I tehk mwahwiher sapwellimomwi kadeik kan.

119:31  Maing KAUN, I patohwan dadaurete sapwellimomwi kaweid kan, komw dehr ketin mweidohng I en namenekla.

119:32  I pahn ngoangki peikiong sapwellimomwi mahsen kan, pwehki komw pahn ketin kalaudehla ei loalokong.

119:33  Maing KAUN, komw ketin padahkihong ie wehwehn sapwellimomwi kosonned kan, I ahpw pahn kapwaiada ahnsou koaros.

119:34  Komw ketin kawehwehiong ie sapwellimomwi kosonned kan, oh I pahn kapwaiada; I pahn kapwaiada ni mohngiongi unsek.

119:35  Komw ketin kahluwa ie nan ahl en sapwellimomwi kosonned kan pwe iei met me I kin diarki ei nsenamwahu.

119:36  Komw ketikihong ie ineng en kapwaiada sapwellimomwi kosonned kan, a kaidehk I en kepwehpwehla.

119:37  Komw kupure ie, pwe I en dehr ngoangki dipwisou mwahl akan; komw kupwure ie, nin duwen me komwi ketin inoukidahr.

119:38  Komw ketin kapwaiada sapwellimomwi inou ong ie, sapwellimomwi ladu menet-% inowo me komwi ketin wiawihong irail kan me peikiong komwi.

119:39  Komw ketin doareiesang kepweikeng kan me I kin masak; ia uwen kupwuriamwei en sapwellimomwi kadeik kan!

119:40  I men kapwaiada sapwellimomwi mahsen kan; komw ketikidohng ie mour kapw, pwe komwi me pwung.

119:41  Maing KAUN, komw ketin kasalehiong ie duwen omwi kupwur limpoak ong ie, oh doareiehla nin duwen me komwi ketin inoukidahr.

119:42  Eri I ahpw pahn kak sapeng irail kan me kin kepweikengih ie pwehki ei koapworopworki sapwellimomwi mahsen.

119:43  Komw kupwure ie pwe I en kin lokaia mehlel ahnsou koaros, pwehki ei koapworopwor mihmi ni sapwellimomwi kadeik kan.

119:44  I pahn kapwaiada sapwellimomwi kosonned ahnsou koaros, met oh pil kohkohlahte.

119:45  I pahn weweidwei nan mour saledek, pwehki ei kin nantihong kapwaiada sapwellimomwi padahk kan.

119:46  I pahn lohkihda sapwellimomwi koasoandi kan mwohn nanmwarki kan, oh I sohte pahn namenengki.

119:47  I kin diar peren ni ei kin kapwaiada sapwellimomwi mahsen kan, pwehki ei kin kesempwalki.

119:48  I kin wauneki oh kesempwalki sapwellimomwi kosonned kan; I pahn medemedewe sapwellimomwi kaweid kan.

119:49  Komw ketin tamanda inowo me komw ketin wiahiong ie, sapwellimomwi ladu menet; e kahrehiong ie koapworopwor laud.

119:50  Mehnda ma I mi nan lokolok ahpw I nsenamwahu pwehki sapwellimomwi inowo kakehleiedahr.

119:51  Me aklapalap akan kin mwamwahlikin ie, ahpw I sohte kin sohpeisang sapwellimomwi kosonned.

119:52  Maing KAUN, I kin tamanda sapwellimomwi kadeik en mahs ako, eri ihme kin kansenamwahwihiehla.

119:53  I kin lingeringerkihda kowahlap, ei kin kilang aramas suwed akan ar kin kauwehla sapwellimomwi kosonned.

119:54  Sapwellimomwi mahsen kan wia audepen ei koul kan nan ei mour mwotomwot nan sampah wet.

119:55  Maing KAUN, I kin tamankomwihda nipwong, oh I kin medemedewe duwen sapwellimomwi kosonnedo.

119:56  I kin diar ei nsenamwahu pwehki ei kapwaiada sapwellimomwi mahsen kan.

119:57  Maing KAUN, komwihte me I kin anahne; I inoukihda me I pahn peikiong sapwellimomwi kosonned kan.

119:58  I patohwan peki rehmwi sang nan kapehdi unsek komwi ketin kupwure ie, nin duwen me komwi ketin inoukidahr!

119:59  I medemedewe duwen iren ei mour, I ahpw inoukihda me I pahn idawehn sapwellimomwi kaweid kan.

119:60  I sohte pahn pwand, ahpw I pahn mwadang kapwaiada sapwellimomwi mahsen kan.

119:61  Aramas suwed akan wiadahr arail mehn lidipih ie, ahpw I sohte manokehla sapwellimomwi kosonnedo.

119:62  I kin pwourda nin lukepen pwong pwe I en kin kapingahkin komwi sapwellimomwi kadeik pwung kan.

119:63  I kin kompoakepahniki irail koaros me kin papah komwi, irail koaros me kin peikiong sapwellimomwi kosonned kan.

119:64  Maing KAUN, sampah direkihla sapwellimomwi limpoak poatopoat; komw ketin padahkihong ie sapwellimomwi kosonned kan.

119:65  Maing KAUN, komw ketin kapwaiadahr sapwellimomwi inou, oh kin ketin kupwur mwahu ong ie, sapwellimomwi ladu menet.

119:66  Komw ketikihong ie loalokong oh erpit, pwe I kin likih sapwellimomwi mahsen kan.

119:67  I kin sapwungala mwohn omwi ketin kaloke ie, a met I kin peikiong sapwellimomwi mahsen.

119:68  Ia uwen omwi kupwur mwahu, ia uwen omwi kupwur kadek! Komw ketin padahkihong ie sapwellimomwi kosonned kan.

119:69  Aramas aklapalap akan wiadahr likamw ekei duwen ngehi, ahpw sang nan mohngiongiet unsek I kin peikiong sapwellimomwi kaweid kan.

119:70  Aramas pwukat sohte wehwehki, ahpw I kin diar kansenamwahupei nan sapwellimomwi kosonnedo.

119:71  Ei lokolok kan me mwahu ong ie, pwe e kamarainihiehda ni padahkpen sapwellimomwi kosonned kan.

119:72  I kesempwalki kosonnedo me komwi ketikihdo sang mwohni en sampah koaros.

119:73  Komwi me ketin wiaiehda, oh nekinekid ie mwahu; komw ketikihong ie loalokong, pwe I en esehla sapwellimomwi kosonned kan.

119:74  Irail kan me kin waunekin komwi pahn nsenamwahu ni ar pahn kilang ie; pwehki ei likih sapwellimomwi inou.

119:75  Maing KAUN, I patohwan ese me sapwellimomwi kadeik kan me pwung; oh komwi ketin kaloke ie pwehki omwi loalopwoat.

119:76  Eri sapwellimomwi limpoak poatopoat en kansenamwahwihiehla, nin duwen inowo me komw ketin wiahiong ie, sapwellimomwi ladu menet.

119:77  Komw ketin kupwurkalahngan ong ie, I ahpw pahn mourla pwehki sapwellimomwi kosonned iei me kaperenpei.

119:78  Me akalapalap akan en namenekla, pwehki ar karaun likamw ong ie; a ngehi, I pahn kin medemedewe sapwellimomwi kaweid kan.

119:79  Irail kan me kin waunekin komwi, re en sohpeidohng ie-% irail kan me ese sapwellimomwi mahsen kan.

119:80  Komw kupwure pwe I en kapwaiada sapwellimomwi kosonned kan ni unsek oh I en dehr namenengkihla ei lohdi.

119:81  Maing KAUN, I weikengkilahr awiawih komwi en komouriehla; I likih mehlel sapwellimomwi mahsen.

119:82  Pwoaren mesei kat sohla kilangki wasa ei kasikasik sapwellimomwi inowo, I ahpw kin idek, “Iahd me komw pahn ketin sewese ie?”

119:83  I rasehngehr ehd kilin mahn mering me pahn lekdekla; ahpw I sohte patohwan manokehla sapwellimomwi mahsen kan.

119:84  Ia erein ahnsou me I pahn awiawih? Iahd me komw pahn ketin kaloke irail kan me pwakipwahkih ie?

119:85  Me aklapalap akan, me sohte kin kapwaiada sapwellimomwi kosonned, weiradahr pwoahr kei pwe re en lidipihkin ie.

119:86  Sapwellimomwi kosonned koaros me loalopwoat; aramas akan kin kalokehkin ie koasoi likamw-komw ketin sewese ie!

119:87  Kerenieng re pahn kemeiehla, ahpw I sohte sohpeisang sapwellimomwi kosonned kan.

119:88  Komw ketin kupwurehkin ie sapwellimomwi limpoak poatopoat, pwe I en kapwaiada sapwellimomwi kosonned kan.

119:89  Maing KAUN, sapwellimomwi mahsen pahn tengeteng kohkohlahte; e kin poatopoat nanleng.

119:90  Sapwellimomwi loalopwoat pil kin poatopoat erein dih koaros; komw ketin koasoanehdi sampah nan dewe, oh e kin mihmihte.

119:91  Mehkoaros kin mihmihte lel rahnwet pwehki sapwellimomwi kosonned kan, pwehki mehkoaros kin uhpah komwi.

119:92  Ma ei peren sohte pwilisang ni sapwellimomwi kosonnedo, eri, I mehkilahr ei lokolok kan.

119:93  I sohte pahn manokehla sapwellimomwi kaweid kan, pwehki kaweid pwukat me komwi ketin kolokolki ei mour.

119:94  Sapwellimomwi ngehi-komw ketin doareiehla! I kin nantihong kapwaiada sapwellimomwi kosonned kan.

119:95  Aramas suwed kan kin awiawih pwe re en kemeiehla, ahpw I pahn kin medemedewe duwen sapwellimomwi kosonned kan.

119:96  I patohwan eseier duwen mehkoaros ar sohte unsek; ahpw sohte irepen sapwellimomwi kosonnedo!

119:97  Ia uwen ei poakohng sapwellimomwi kosonnedo! I kin medemedewe sang nimenseng lel nipwong.

119:98  Sapwellimomwi kosonnedo kin ieiang ie ahnsou koaros oh kin kahrehda ei loalokong sang ei imwintihti.

119:99  I loalokong sang ei sounpadahk kan koaros, pwehki ei kin medemedwe sapwellimomwi kaweid kan.

119:100  I koahiek sang me mah kan, pwehki ei kin kapwaiada sapwellimomwi kosonned kan.

119:101  I kin kadohwansang ie soangen tiahk suwed koaros, pwehki ei kin ngoangki peikiong sapwellimomwi mahsen.

119:102  I sohte seukautihong sapwellimomwi kaweid kan, pwehki pein komwi me ketin padahkihong ie.

119:103  Ia uwen mem en sapwellimomwi kaweid kan-% e mem sang sukehn loangalap.

119:104  I kin loalokongkihla sapwellimomwi kosonned kan, ihme I kin kailongkihki soangen tiahk suwed koaros.

119:105  Sapwellimomwi mahsen, iei serepei, mehn kaweid ie, oh kamarainpen elei kan.

119:106  I pahn kapwaiada ei inou me I pahn kin peikiong sapwellimomwi kaweid pwung kan.

119:107  Maing KAUN, ei lokolok kan me mwuledek; komw ketin kolokol ei mour, nin duwen me komwi ketin inoukidahr.

119:108  Maing KAUN, komw ketin kupwure ei kapakap en kapingkalahngan, oh ketin padahkihong ie sapwellimomwi kosonned kan.

119:109  I kin men tounmeteikihla ei mour; I saikinte manokehla sapwellimomwi kosonnedo.

119:110  Aramas suwed kan kin lidipih ie, ahpw I sohte sapeikiong sapwellimomwi kosonnedo.

119:111  I pahn kolokol sapwellimomwi kosonned kan kohkohlahte; pwe iei kaperenpen mohngiongi.

119:112  I patohwan koasoanedier nan kapehdi me I pahn peikiong sapwellimomwi kosonned kan lao lel rahn me I pahn mehla.

119:113  I kin kailongki irail kan me kin soaloalopwoatohng komwi, ahpw I wauneki sapwellimomwi kosonnedo.

119:114  Komwi me doarepei oh silepei, I kin koapworopworki sapwellimomwi inou.

119:115  Kumwail me dipan akan, kumwail kohkohweisang ie. I pahn kapwaiada kosonned kan en ei Koht.

119:116  Komwi ketin kakehleiehda, nin duwen omwi ketin inoukidahr, I ahpw pahn mourla; komwi dehr ketin mweidohng I en namenekla nan ei koapworopwor.

119:117  Komwi ketin kolokol ie, I ahpw pahn nekinek mwahu, oh tehk mwahu sapwellimomwi kosonned kan ahnsou koaros.

119:118  Komwi kin ketin soikala irail koaros me sohte kin kapwaiada sapwellimomwi kosonned kan, pwe ar lamalam likamw akan sohte katepe.

119:119  Komwi kin ketin wiahki kihd aramas suwed koaros, ihme I kesempwalkihki sapwellimomwi kaweid kan.

119:120  I masepwehk pwehki komwi, I masepwehk kowahlap pwehki sapwellimomwi kopwung.

119:121  I wiadahr dahme mwahu oh pwung; komwi dehr ketin keseiehla pahn manaman en ei imwintihti kan!

119:122  Komwi ketin inoukihda me komwi pahn ketin sewese sapwellimomwi ladu; komwi dehr ketin mweidohng me aklapalap akan en kaloke ie!

119:123  Pwoaren mesei kat sohla kilangki wasa ei kasikasik sapwellimomwi sawas en komour, komouro me komwi ketin inoukidahr.

119:124  Komw ketin mahsendohng ie nin duwen sapwellimomwi limpoak poatopoat, oh ketin padahkihong ie sapwellimomwi kosonned kan.

119:125  Sapwellimomwi ladu ngehi; komwi ketin kamarainih ie, pwe I en dehdehkihla sapwellimomwi padahk kan.

119:126  Maing KAUN, ih ahnsou en sapwellimomwi mwekid met, pwehki aramas akan kauwelahr sapwellimomwi kosonned.

119:127  I kesempwalki sapwellimomwi kosonned kan sang kohl, sang kohl me keieu kaselel.

119:128  Ihme kahrehda I idawehn sapwellimomwi kaweid kan koaros, oh kailongki ahl sapwung koaros.

119:129  Sapwellimomwi padahk kan me inenen kaselel; I kin kapwaiada nan mohngiongi unsek.

119:130  Kawehwehpen sapwellimomwi padahk kan kin kahrehda marain oh kin ketikihdo erpit ong me soaloaloakong kan.

119:131  Nan ei inengiong sapwellimomwi mahsen kan eweiet kin sarapeseng oh wie esiesingek dondod.

119:132  Komwi ketin sohpeidohng ie oh kupwurkalahngan ong ie nin duwen me komwi kin ketin wiahiong irail kan koaros me kin poakohng komwi.

119:133  Nin duwen me komwi ketin inoukidahr, komw ketin kolokol ie pwe I en dehr pwupwudi; komwi dehr ketin mweidohng suwed en kaloweiehdi.

119:134  Komw ketin kapitiehla sang irail kan me kalokaloke ie, pwe I en kak kapwaiada sapwellimomwi kosonned kan.

119:135  Komwi ketin kupwuramwahwihkin ie omwi pahn ketin ieiang ie oh ketin padahkihong ie sapwellimomwi kosonned kan.

119:136  Pilen mesei kin keredi duwehte pillap ehu, pwehki aramas akan ar sohte kin kapwaiada sapwellimomwi kosonnedo.

119:137  Maing KAUN, komwi me pwung, oh sapwellimomwi kosonned kan me pwung.

119:138  Kosonned kan me komwi ketikihdo me uhdahn pahrek oh pwung.

119:139  Ei lingeringer kin lullul loalei duwehte kisiniei, pwehki ei imwintihti kan ar mwamwahliki sapwellimomwi kosonned kan.

119:140  Ia uwen dehde en sapwellimomwi inowo! Ia uwen ei kin poakohng!

119:141  Paliwereiet sohte kesempwal oh me samin, ahpw I sohte kin sohpeisang sapwellimomwi padahk kan.

119:142  Sapwellimomwi pwung pahn poatopoat kohkohlahte, oh sapwellimomwi kosonnedo kin pwung ahnsou koaros.

119:143  I direkilahr apwal oh pwunod, ahpw sapwellimomwi kosonned kan kin kahrehiong ie peren.

119:144  Sapwellimomwi kaweid kan kin pwung ahnsou koaros; komwi ketikidohng ie wehwe, I ahpw pahn kak momour.

119:145  Sang nan mohngiongi unsek I kin likweriong komwi; maing KAUN, komwi ketin sapeng ie oh I pahn kapwaiada sapwellimomwi mahsen kan.

119:146  I patohwan likweriong komwi; komwi ketin doareiehla I ahpw pahn kapwaiada sapwellimomwi kosonned kan.

119:147  Mwohn dakadahn ketipin I kin patohwan peki sawas sang rehmwi; I kin koapworopworki sapwellimomwi inou.

119:148  I kin pepehd pwohng ehu pwon, pwe I en medemedewe sapwellimomwi kaweid kan.

119:149  Maing KAUN, komwi ketin karonge ie, pwehki sapwellimomwi limpoak me poatopoat, komwi ketin kasalehiong ie sapwellimomwi kalahngan, oh ketin komouriehla!

119:150  Aramas lemei kan me kin pwakipwakih ie kerendohr, irail kan me sohte mwahn kin kapwaiada sapwellimomwi kosonned.

119:151  Ahpw maing KAUN, komwi ketiket limwahi, oh sapwellimomwi mahsen koaros me poatopoat.

119:152  Sangete mahs I dehdehki duwen sapwellimomwi kaweid kan; komwi ketin kupwuredahr en kin poatopoat kohkohlahte.

119:153  Komwi ketin mahsanih ei lokolok, oh ketin doareiehla, pwehki ei sohte mwahn kin sohpeisang sapwellimomwi kosonnedo.

119:154  Komwi ketin uhpalihki ei pwung, oh ketin kasaledekihiehla; komwi ketin doareiehla, nin duwen me komwi ketin inoukidahr.

119:155  Aramas suwed kan sohte pahn mourla, pwehki ar sohte peikiong sapwellimomwi kosonned kan.

119:156  Ahpw maing KAUN, sapwellimomwi limpoak me lapalap; komwi ketin kasalehda omwi kupwurkalahngan oh ketin doareiehla!

119:157  Ei imwintihti oh me kin kalokaloke ie me ngeder, ahpw I sohte sohpeisang sapwellimomwi kosonned kan.

119:158  Ni ei kin kilang sounpang aramas pwukat, I kin direkihla nsensuwed, pwehki ar sohte kin kapwaiada sapwellimomwi kosonned kan.

119:159  Maing KAUN, komw ketin mahsanih uwen ei kin poakohng sapwellimomwi kaweid kan. Sapwellimomwi limpoak sohte kin wekidekla, eri, komw ketin doareiehla!

119:160  Poahsoan en sapwellimomwi kosonned iei mehlel, oh sapwellimomwi kopwung kan me poatopoat.

119:161  Me lapalap akan kin uhwong ie ni sohte kahrepe, ahpw I kin wauneki sapwellimomwi kosonned.

119:162  Ia uwen ei peren pwehki sapwellimomwi inou kan-% peren duwehte aramas me kin diar kepwe kesempwal.

119:163  I kin kailongki oh tatki lokaia likamw koaros, ahpw I kin kesempwalki sapwellimomwi kosonned.

119:164  I kin kapingkalahngan ong komwi pak isuh nan rahn ehu pwehki pwung en sapwellimomwi kopwung kan.

119:165  Irail kan me kin kesempwalki sapwellimomwi kosonned kin ahneki saledek sang apwal, oh sohte mehkot me kak kahrehiong arail pahn pwupwudi.

119:166  Maing KAUN, I kasikasik sapwellimomwi komour, oh I kin kapwaiada dahme komwi kin ketin mahsanih.

119:167  I kin kapwaiada saapwellimomwi padahk kan; I kin poakohng ni mohngiong unsek.

119:168  I kin peikiong sapwellimomwi kosonned kan oh sapwellimomwi kaweid kan; komwi kin ketin mahsanih mehkoaros me I kin patohwan wia.

119:169  Maing KAUN, ei likwer en pek sawas en leldawohng rehmwi! Komwi ketikidohng ie dehdehki, nin duwen me komwi ketin inoukidahr.

119:170  Komwi ketin karonge ei kapakap, oh ketin doareiehla nin duwen sapwellimomwi inowo!

119:171  I pahn kin kapikapinga komwi ahnsou koaros, pwehki omwi ketin padahkihong ie sapwellimomwi kosoned kan.

119:172  I pahn koulki duwen sapwellimomwi kosonnedo, pwehki sapwellimomwi kosonned kan me pwung.

119:173  Komwi kin ketin onopada ahnsou koaros pwe komwi en ketin sewese ie, pwehki ei kin idawehn sapwellimomwi kosonned kan.

119:174  Maing KAUN, ia uwen ei kin anahne sapwellimomwi sawas en komour! I kin diar nsenamwahu nan sapwellimomwi kosonned.

119:175  Komwi ketikidohng ie mour, pwe I en kak kapingahkin komwi; sapwellimomwi kaweid kan en sewese ie.

119:176  I kin sansalongseli duwehte sihpw men me salongalahr; eri, komwi ketido rapahkin ie, sapwellimomwi ladu, pwehki ei sohte kin sohpeisang sapwellimomwi kosonned kan.