Site uses cookies to provide basic functionality.

OK
ZECHARIAH
1 2 3 4 5 6 7 8 9 10 11 12 13 14
Prev Up Next
Chapter 7
Zech Aleppo 7:1  ויהי בשנת ארבע לדריוש המלך היה דבר יהוה אל זכריה בארבעה לחדש התשעי—בכסלו
Zech Aleppo 7:2  וישלח בית אל שראצר ורגם מלך ואנשיו—לחלות את פני יהוה
Zech Aleppo 7:3  לאמר אל הכהנים אשר לבית יהוה צבאות ואל הנביאים לאמר  האבכה בחדש החמשי—הנזר כאשר עשיתי זה כמה שנים  {פ}
Zech Aleppo 7:4  ויהי דבר יהוה צבאות אלי לאמר
Zech Aleppo 7:5  אמר אל כל עם הארץ ואל הכהנים לאמר  כי צמתם וספוד בחמישי ובשביעי וזה שבעים שנה—הצום צמתני אני
Zech Aleppo 7:6  וכי תאכלו וכי תשתו—הלוא אתם האכלים ואתם השתים
Zech Aleppo 7:7  הלוא את הדברים אשר קרא יהוה ביד הנביאים הראשנים בהיות ירושלם ישבת ושלוה ועריה סביבתיה והנגב והשפלה ישב  {פ}
Zech Aleppo 7:8  ויהי דבר יהוה אל זכריה לאמר
Zech Aleppo 7:9  כה אמר יהוה צבאות לאמר  משפט אמת שפטו וחסד ורחמים עשו איש את אחיו
Zech Aleppo 7:10  ואלמנה ויתום גר ועני אל תעשקו ורעת איש אחיו אל תחשבו בלבבכם
Zech Aleppo 7:11  וימאנו להקשיב ויתנו כתף סררת ואזניהם הכבידו משמוע
Zech Aleppo 7:12  ולבם שמו שמיר משמוע את התורה ואת הדברים אשר שלח יהוה צבאות ברוחו ביד הנביאים הראשנים ויהי קצף גדול מאת יהוה צבאות
Zech Aleppo 7:13  ויהי כאשר קרא ולא שמעו  כן יקראו ולא אשמע אמר יהוה צבאות
Zech Aleppo 7:14  ואסערם על כל הגוים אשר לא ידעום והארץ נשמה אחריהם מעבר ומשב וישימו ארץ חמדה לשמה  {פ}