Kapingamarangi - Ecclesiastes - 11

11:1  Haga-tomo-ina au bahihadu i-lodo nnegau huihui-mee, gei tei laangi hua gei goe gaa-kumi dau wiini.

11:2  Haga-tomo-ina au bahihadu i-nia gowaa e-logo, idimaa, goe e-de-iloo be nia maa nia haadanga-balua behee ala ga-tale-adu gi-di-goe i henuailala-nei.

11:3  Tei gowaa hua be-di laagau le e-hinga gi-hee, gei di-maa ga-moe-hua i-di gowaa dela ne-hinga ginai. Di madagoaa o-nia gololangi ma-gaa-honu nia wai, di uwa gaa-doo.

11:4  Maa goe ga-tali-loo di ahiaalangi gi-humalia-loo gi-di dogi nia mee, gaa-dogi-laa au meegai, goe au meegai e-hadi ai.

11:5  God ne-hai nia mee huogodoo, gei goe e-de-iloo dana hai dela ne-hai nia mee, gadoo be goe dela e-de-iloo di ala o-di madangi, be go di tomo o-di tama i-lodo tinae o tinana.

11:6  Dogia au laagau i-baahi gi-di luada, mo i-baahi gi-di hiahi. Goe e-de-iloo be nia maa gaa-tomo huogodoo, be hunu maa ga-mmademmade.

11:7  E-humalia ma-ga-tenetene i-di hai-mee gi-di madamada o-di maalama o-di laangi.

11:8  Heia dau di-mee-bolo-mee i-nia ngadau huogodoo ala e-mouli-iei goe. Gi-langahia bolo nia laangi o-di made le e-waalooloo. Nia mee huogodoo ala e-lloomoi le e-maa gi-daha.

11:9  Nia daangada lligi, goodou gi-tenetene i-di godou madagoaa e-lligi. Goodou gii-tene i-di madagoaa e-lligi-iei goodou. Heia nia mee ala e-hiihai ginai goodou, daudalia nia hiihai o godou manawa. Malaa, goodou gi-langahia bolo God le e-gabunga godou mee huogodoo ala e-hai.

11:10  Hudee heia dahi mee gi-heia goe gi hagabaubau e-logo, be gi-haga-mmaemmae goe. Goe e-hagalee waalooloo doo noho dama-daane be dama-ahina.