Kapingamarangi - Ecclesiastes - 1

1:1  Aanei nnelekai tangada hagabaubau, tama-daane David, dela nogo king i Jerusalem.

1:2  Tangada hagabaubau e-helekai, “Ma e-maa gi-daha! Ma e-maa gi-daha! Di mouli le e-maa gi-daha! Nia mee huogodoo e-maa gi-daha!”

1:3  Dehee tahidamee di-ngalua hagamahi gi do mouli?

1:4  Nia adu-daangada e-hagadau gi-muli, gei henuailala le e-hai-hua be di-maa.

1:5  Di laa le e-hobo hua igolo, gei di-maa e-ulu hua igolo, e-duadua e-hana gi-muli gi-di gowaa e-daamada labelaa.

1:6  Di madangi e-gono gi-lala, di madangi e-gono gi-nua, e-haganiganiga ga-daamada labelaa.

1:7  Nia monowai huogodoo e-mmidi gi-lodo di tai, gei di tai e-deemee di-honu. Nia wai e-hula gi-muli gi-di gowaa ne-daamada-ai nia monowai, e-daamada labelaa.

1:8  Nia mee huogodoo e-haga-maanuhia dangada. Di haga-maanuhia dangada e-damanaiee gi-nia helekai. Tadau golomada e-deemee di-mmada gi-dohu-anga. Tadau dalinga e-deemee di-longono gi-dohu-anga.

1:9  Nia mee ala ne-gila-aga i-mua ga-gila-aga labelaa. Nia mee ala ne-hai i-mua gaa-hai labelaa. Deai di mee hoou i-lodo henuailala ai.

1:10  Digaula e-helekai, “Mmada, deenei di mee hoou!” Gei e-deeai, nia mee huogodoo gu-gila-aga i-mua-loo, i-mua di madagoaa ne-haanau-ai gidaadou.

1:11  Deai tangada e-langahia-eia nia mee ne-gila-aga i-mua ai, gei tangada e-gila-mai maalia ai dela e-langahia-eia nia mee ala e-gila-aga dolomeenei mo maalia.

1:12  Au go tangada hagabaubau, nogo hai di king o Israel i Jerusalem.

1:13  Au gu-hagamaanadu bolo au ga-halahala gi-iloo, mo-di hagamaumau nia mee huogodoo ala e-hai i-hongo henuailala. God ne-dugu-mai gi gidaadou tegau damana daamaha!

1:14  Au gu-gidee nia mee huogodoo ne-hai i-hongo henuailala, gei au e-hagi-adu gi-di-goe bolo nia maa huogodoo le e-maa gi-daha. Ma e-hai be-di mee e-waluwalu di madangi.

1:15  Goe e-deemee di haga-huudonu di mee dela guu-biga. Goe e-deemee di dau nia mee ala e-hagalee.

1:16  Au ga-hagamaanadu-mai gi-di-au, “Au guu-hai tangada aamua, e-koia e-iloo i-nia daangada huogodoo ala nogo dagi Jerusalem mai i ogu mua. Au e-modongoohia di iloo mo-di kabemee la ni-aha.”

1:17  Au gu-hagamaanadu bolo au e-kabe di hai-geegee i-mehanga di kabemee mo tadaulia, di iloo mo-di boiboi. Malaa, au gu-gidee bolo au e-waluwalu hua igolo di madangi.

1:18  Di damana-mai o do kabemee, e-haga-damana-mai do de-nnoomaalia. Di damana-mai o do iloo, e-haga-damana-mai do mmaemmae adu gi-di-goe.