Kapingamarangi - Ecclesiastes - 9

9:1  Au gu-hagabaubau gi-iloo nia mee aanei, gei au gu-gidee bolo ma go God dela e-dagi nia hangahaihai o digau e-iloo-mee mo e-donu, mo nadau aloho mo nadau dee-hiihai labelaa. Tangada i-golo ai e-iloo nia mee ala e-kila-aga maalia.

9:2  Ma e-hagalee hai-geegee. Di haga-odi hua e-dahi dela e-tale ang-gi digau ala e-donu mo digau hala, digau humalia mo digau huaidu, digau daumaha mo digau tuadimee, digau hai-tigidaumaha mo digau hagalee hai-tigidaumaha. Di mee e-dahi hua e-tale ang-gi tangada humalia mo tangada hai-hala, tangada dowangi mo tangada dela e-hagalee dowangi.

9:3  Di haga-odi e-dahi e-tale ang-gi nia daangada huogodoo be-di mee e-dahi, deenei e-hai-gee gadoo be di-ingoo-hua di mee dela e-gila-aga i henuailala. I-di waalooloo o-di mouli o-nia daangada, nadau hagabaubau e-honu i-nia hagamaanadu huaidu mo-di hagawelewele, ga-nomuli digaula e-mmade ngoohia.

9:4  Nia daangada mouli o henuailala la iai nadau hagadagadagagee i-golo. Di paana mouli la-koia e-humalia i-di laion made!

9:5  Uaa, digau mouli e-iloo-ginaadou bolo ginaadou gaa-mmade, gei digau mmade e-de-iloo nia mee. Digaula nadau hui nomuli ai, digaula gu-haga-de-iloo hagatau.

9:6  Nadau aloho, nadau dee-hiihai, nadau hiihai la-guu-mmade huogodoo dalia ginaadou. Digaula ga-deemee labelaa di-dau i-nia mee ala e-gila-aga i-hongo o henuailala.

9:7  Miami, geina au meegai gi-manawa lamalia goe. Inumia au waini gi-tenetene goe. Nia mee aanei le e-humalia-hua i-baahi o God.

9:8  Manawa-lamalia mo-di tenetene i-nia madagoaa huogodoo.

9:9  Mouli tenetene i-baahi di ahina dela e-aloho-iei goe i-di waalooloo o do mouli dela e-maa gi-daha, dela ne-dugu-adu go God gi-di-goe belee mouli-iei goe i-hongo o henuailala. Tenetene i-nia laangi huogodoo ala e-maa gi-daha, idimaa, deenei hua do humalia dela e-kumi kooe.

9:10  Ngalua hagamahi gi au mee huogodoo ala ma-gaa-hai, idimaa, i-lodo tenua digau mmade, deai di mee e-hai ai, nia hagabaubau e-hai ai, nia iloo ai, nia kabemee ai. Tenua digau mmade, la deelaa di gowaa e-hana ginai goe.

9:11  Au gu-gidee di mee i-golo i-lodo o henuailala-nei: nia daangada ala e-koia e-llele hagamahi hagalee e-aali i-nia hoiaa huogodoo, nia daangada ala e-manawa-maaloo hagalee mada-maaloo i-nia dauwa i-nia madagoaa huogodoo. Nia daangada hai-maanadu hagalee kumi nadau meegai i-nia madagoaa huogodoo, nia daangada kabemee hagalee maluagina i-nia madagoaa huogodoo, mo digau ala e-mee, ginaadou hagalee mmaanege gi-nia moomee llauehe i-nia madagoaa huogodoo. Di haadanga-balua e-tale gi-nia daangada huogodoo.

9:12  Goe e-de-iloo do madagoaa haingadaa e-dau-adu-ai. E-hai gadoo be nia manu ma-gaa-too gi-lodo di hele manu, ge e-hai gadoo be-di iga ma-ga-bulou gi-lodo di gubenge. Gidaadou gaa-poo go di haingadaa i-di madagoaa dela e-de-iloo-gidaadou.

9:13  Di mee e-dahi labelaa ne-gidee-au, dela go-di ala-mee humalia i-di hai o-di kabemee e-hagamaanadu-ai i henuailala nei.

9:14  Dahi waahale i-golo, e-hagalee dogologo ono daangada. Di king maaloo ne-heebagi gi-di waahale deenei. Mee gu-haganiga di-maa, gu-togomaalia bolo ia gaa-oho di abaaba.

9:15  Dahi dangada hagaloale e-noho i-golo, e-iloo dana benebene di waahale deelaa gi-dee-oho go digau dauwa aalaa. Malaa, nomuli, deai tangada ne-hagamaanadu a-mee ai.

9:16  I-nia madagoaa huogodoo gei au e-helehelekai bolo di kabemee la-koia e-humalia i-di maaloo, malaa tangada i-golo ai e-hagamaanadu bolo digau hagaloale le e-iloo nia mee, be e-hagalongo gi nadau helekai.

9:17  E-koia e-humalia ma-ga-hagalongo gi nnelekai hagamoolee o tangada kabemee i-di hagalongo gi-nia hagahohooho o tagi o digau dadaulia.

9:18  Di kabemee le e-hai ana mee humalia e-logo i-nia goloo heebagi, malaa, tangada hai-hala e-dahi e-mee di-oho nia mee humalia e-logo.