Kapingamarangi - Ecclesiastes - 5

5:1  Gii-pula i doo hana gi-di Hale Daumaha. E-hana e-kabe la-koia e-humalia i-di hai-tigidaumaha o digau dadaulia ala e-de-iloo di tonu mo-di hai-gee.

5:2  Hagabaubau i-mua i dau helekai, hudee hai hagababa hagalellele balumee gi God. Mee e-noho i-di langi i-nua, gei goe e-noho i henuailala, malaa, hudee helekai gi nonua i au helekai belee helekai-ai.

5:3  Mai do hagabaubau e-logo, goe ga-midimidi nia midi huaidu, mai do helehelekai e-logo, goe ga-helekai nnelekai dadaulia.

5:4  Malaa, do madagoaa ma-gaa-hai dau hagababa ang-gi God, hagalimalima hai-hegau-ai. Mee e-hagalee hiihai e-haga-hai-hegau tangada dadaulia. Haga-gila-ina dau mee ne-hagababa.

5:5  Di hagalee hagababa la-koia e-humalia i-di hagababa dela e-hagalee haga-gila.

5:6  Hudee dumaalia gi au helekai gi-dagi-ina goe gi-lodo di huaidu, ga-hidi-mai-iei goe ga-helekai gi tangada hai-mee-dabu a God bolo goe digi hagamaanadu-ina bolo ma-gaa-hai beelaa. Goe e-hai a God gi hagawelewele-adu gi-di-goe eiaha? Goe e-hai a-Mee gi-oho-ina gi-daha au mee ne-ngalua ginai eiaha?

5:7  Ma e-aha maa goe e-midimidi haga-logowaahee, be e-leelee logo; nia maa e-maa gi-daha, malaa, hagaamu-ina a God.

5:8  Hudee homouli gi-di gidee di oobidi e-hagaduadua digau hagaloale, e-hagabalumee nadau donu. Tangada oobidi e-benebene go tangada dela i ono nua, gei meemaa dogolua le e-benebene go tangada dela nogo i-nua meemaa.

5:9  Di king hogi e-goweinga i-di hagi o-nia huwa-laagau.

5:10  Maa goe e-hiihai gi-nia bahihadu, goe e-deemee di-dohu-anga. Maa goe e-hiihai gi-di maluagina, goe e-deemee di-hai-mee gi-nia mee huogodoo ala e-hiihai ginai goe. Ma e-maa gi-daha.

5:11  Do maluagina gi-nonua, di logo mai nia ngudu e-haangai kooe. Di mee hua dela e-wiini-adu gi-di-goe la-go di iloo hua bolo goe e-maluagina.

5:12  Digau ngalua la-iai nadau meegai e-dohu be e-dee-dohu di-gai, malaa, digaula e-mee-hua di-kii i-di boo. Digau maluagina e-dee-kii i-di boo, e-logo nadau mee e-mamaanadu-ai.

5:13  Deenei dahi mee huaidu ne-gidee-au i henuailala: Nia daangada e-benebene nadau bahihadu gi-di madagoaa haingadaa.

5:14  I-di madagoaa digaula gaa-tale gi-di hagahinihini huaidu o-di hai-hegau gi-nia bahihadu, nadau bahihadu la-ga-odi, nadau dama gi-muli ga-deai nadau meegai-ai.

5:15  Gidaadou e-hagatanga gi-daha mo henuailala, gadoo be tadau hai ne-ulu-mai, e-deai tadau mee ai. Ma e-aha maa gidaadou e-ngalua, gei gidaadou e-deai tadau mee e-kae dalia gidaadou ai.

5:16  Ma e-hagalee donu! Gidaadou e-hula i-di ala ne-lloomoi-ai gidaadou. Gidaadou e-ngalua duadua, e-waluwalu di madangi, e-kumi tadau-aha?

5:17  Gidaadou e-mouli di mouli o-di bouli, manawa-gee, manawa-logo, hagawelewele, ge e-magimagi.

5:18  Deenei dagu mee humalia ne-gidee-au: Di mee kaedahi e-humalia e-hai go gidaadou, gidaadou gi-miamiami, inuinu, gi-tenetene ang-gi nia mee ala ne-ngalua ginai gidaadou i-di mouli bodobodo a God ne-dugu-mai gi gidaadou. Deenei tadau duhongo.

5:19  Maa God e-haga-tenetene gidaadou gi ono maluagina, gidaadou belee danggee gi Mee mo-di tenetene gi tadau mee ala ne-ngalua ginai. Deenei di kisakis mai baahi o God.

5:20  Idimaa God gu-haga-tenetene gidaadou, gidaadou e-hagalee mamaanadu e-logo i-di bodobodo o tadau mouli.