Kapingamarangi - Ecclesiastes - 2

2:1  Au gu-hagamaanadu bolo au e-haga-tenetene dogu manawa, gi-iloo be-di tenetene la di-aha. Malaa, au gu-gidee bolo di mee deenei le e-maa gi-daha labelaa.

2:2  Au gu-gidee bolo di gadagada le e-dadaulia, di manawa tenetene le e-hagalee humalia adu gi-di-goe.

2:3  Agu hagamaanadu e-hiihai gi-iloo nia mee, gei au gu-hagamaanadu bolo au ga-haga-tenetene au gi-nia waini. Au gu-hagabaubau bolo holongo deenei di ala e-kaedahi e-humalia nia daangada e-mouli-ai i-di mouli bodobodo i henuailala.

2:4  Au gu-hagaduu-aga agu mee llauehe, guu-hau agu hale, guu-dogi agu hadagee-waini.

2:5  Au guu-dogi agu hadagee, guu-hai agu gowaa dogi laagau meegai. Nia hagadilinga laagau meegai huogodoo gu-i-golo.

2:6  Au guu-geli agu monowai belee hagatiutiu nia maa.

2:7  Au guu-hui agu daangada hege dogologo, gei nia hege i-golo ala ne-haanau i dogu hale. Dogu hai-mee gi-nia manu haangai lodo-henua la-koia e-logo i-nia manu o tei dangada nogo noho mai mua i Jerusalem.

2:8  Au gu-hagabudu-mai labelaa nia silber mo nia goolo mai nia maluagina o-nia king o-nia henua nogo dagi ko-au. Nia daane mo nia ahina e-dadaahili e-hagatenetene au, gei au gu-hai-mee gi-nia ahina huogodoo a taane e-hiihai e-hai-mee ginai.

2:9  Uaa, au nogo aamua, e-koia e-aamua i tei dangada aamua nogo noho mai mua i Jerusalem, gei dogu kabemee digi hagahala-ina au.

2:10  Au guu-kae nia mee huogodoo e-hiihai ginai au. Au digi hagakono-ina ogu tenetene. Au gu-hagaamu i agu mee huogodoo ne-ngalua ginai, nia mee aanei huogodoo la-go dogu hui.

2:11  Au gu-hagamaanadu i agu mee huogodoo ne-hai, di haingadaa i dagu hai nia maa, gei au gu-gidee bolo ma e-maa gi-daha. Ma nogo hai be-di waluwalu di madangi, dono hadinga ai.

2:12  I-di hagaodi, di king e-mee-hua di-hai nia mee nogo haihai go nia king mai mua. Gei au ga-daamada ga-hagabaubau be dehee tadinga o-di kabemee, tee-buni, be dadaulia.

2:13  Au e-iloo, “Di kabemee la-koia e-humalia i tadaulia, gadoo be-di maalama e-humalia i-di bouli.

2:14  Tangada e-kabemee, e-gidee dono gowaa dela e-hana ginai, gei digau dadaulia e-de-gidee.” Malaa, au gu-iloo labelaa bolo di made la-hua dela e-talitali gidaadou huogodoo.

2:15  Au gu-hagamaanadu bolo nia mee ne-hai ang-gi digau dadaulia la-ga-hai-mai gi-di-au labelaa. Malaa, di hagahumalia-aha ne-kae ko-au mai di iloo? Au gu-helekai, “Huogodoo e-maa gi-daha.”

2:16  Deai tangada e-langahia digau e-kabemee ai, deai tangada e-langahia digau dadaulia ai. Deai tangada e-langahia gidaadou ai i-lodo nia laangi ga-lloomoi. Gidaadou huogodoo e-hai gii-mmade, digau kabemee mo digau e-dadaulia e-mmade-hua be-di mee e-dahi.

2:17  Malaa, mai gi-di-au, di mouli la-gu-hagalee di mee, idimaa nia mee huogodoo ala guu-hai ko-au i-di mouli-nei la-gu-gila-mai nia haingadaa la-hua. Nia mee huogodoo e-maa gi-daha, au nogo waluwalu-hua di madangi.

2:18  Nia mee ne-ngalua ginai au ga-hagahumalia au, e-balumee mai gi-di-au, idimaa au gu-iloo bolo nia mee aanei le e-wanga ko-au gi tangada i ogu muli.

2:19  Koai e-iloo bolo mee gaa-hai tangada e-iloo nia mee, be tangada e-de-iloo nia mee? Gei di-maa go mee dela ga-hai-mee gi-nia mee huogodoo ala ne-ngalua ginai au, nia mee huogodoo dogu kabemee ne-hagahumalia au i henuailala. Huogodoo e-maa gi-daha.

2:20  Gei au gu-tilikai-hua-laa gi-di-au dela gu-ngalua kono.

2:21  Goe ne-ngalua gi-di mee mai do iloo mo do kabemee mo o hagamaanadu huogodoo, gaa-dugu di-maa gi tangada digi ngalua ginai di-maa. Ma e-maa gi-daha ge hagalee donu!

2:22  Goe e-ngalua, e-mamaanadu e-logo i doo ala e-mouli-iei goe, gei dehee dono dahidamee?

2:23  Do madagoaa e-mouli-iei goe, nia mee huogodoo e-hai kooe e-hagalee haga-humalia goe, dela-hua e-hai goe gi-hagamamaanadu e-logo, e-haga-mmaemmae do libogo. Do libogo e-deemee di-molooloo i-di boo. Huogodoo e-maa gi-daha.

2:24  Di mee kaedahi e-humalia e-mee di-hai go gidaadou la go di miamiami mo-di inuinu, mo-di manawa tenetene gi-nia mee ala ne-hai-mee ginai gidaadou. Malaa, au gu-modongoohia bolo di mee deenei le e-hanimoi labelaa i-baahi o God.

2:25  Dehee dau hai i-golo e-mee di-hai-mee gi-nia meegai mo-di manawa tenetene?

2:26  God e-wanga di iloo, di kabemee, mo-di manawa tenetene ang-gi digau ala e-haga-manawa lamalia Ia, gei Mee e-hai digau huaidu gi-ngalua, gi-hai-mee mo-di benebene nadau hagahumalia, gii-mee di-wanga nadau hagahumalia gi digau ala e-hagamanawa lamalia a-Mee. Huogodoo e-maa gi-daha, ma e-hai-hua be-di waluwalu di madangi.