Kapingamarangi - Esther - 8

8:1  Di laangi deelaa, di King Xerxes guu-wanga gi Queen Esther nia mee huogodoo ala nogo hai-mee ginai Haman, tangada hai-baahi gi digau o Jew. Gei Esther ga-helekai gi-di king bolo Mordecai la tangada ni-oono, gei daamada i-di madagoaa deelaa, Mordecai guu-mee di-hanimoi gi-mua di king.

8:2  Gei di king ga-daa gi-daha dono buulei dela iai di maaga dono gili (dela ne-daa go mee i Haman) gaa-wanga gi Mordecai. Esther gaa-wanga nia mee ala nogo hai-mee ginai Haman gi Mordecai.

8:3  Gaa-lawa, gei Esther ga-dogoduli gi-lala gi-nia wae o-di king, gaa-dangi gi mee gi-heia di mee e-dugu di taaligi dela ne-daamada go Haman, tangada ni-di madawaawa Agag, ang-gi digau o Jew.

8:4  Gei di king ga-daahi-adu togodogo goolo gi mee, gei Esther ga-du-gi-nua ga-helekai,

8:5  “Dogu dagi aamua, maa goe e-dumaalia-mai gi dagu dangidangi, gei e-aloho i-di-au, goe gi-hagadele-ina di hagailoo gi tenua gi-dugua nia haganoho o Haman ala guu-dele gi-lodo o guongo hagatau, go-nia haganoho tama-daane a Hammedatha, tangada i-di madawaawa Agag, ne-hihi ala bolo digau o Jew huogodoo le e-daaligi gi-daha mo do guongo.

8:6  Dehee dagu hai e-hai, maa di mee deenei gaa-gila i-hongo agu daangada, gei ogu gau donu ga-daaligi gii-mmade?”

8:7  Di King Xerxes ga-helekai gi Esther mo Mordecai, tangada o Jew, “Mmada, au gu-daudau Haman gi-nua i mee dela e-hai-baahi gi digau o Jew, gei au guu-wanga gi Esther nia mee a-maa huogodoo ala nogo hai-mee ginai.

8:8  Malaa, nia haganoho huogodoo ala guu-hihi i-di ingoo di king, ge guu-maaga gi-di maaga di king, le e-deemee di-huli. Goolua e-mee di-hihi nia mee huogodoo ala e-hiihai ginai goolua gi digau o Jew, gei goolua gaa-hihi di-maa i dogu ingoo gaa-togo ginai di maaga di king gi nonua.”

8:9  Di mee deenei ne-hai i-di madalua maa-dolu laangi o-di tolu malama, go-di malama go Sivan. Mordecai ga-gahi-mai nia daangada hihi huogodoo di king, bolo gi-hihia nia lede ang-gi nia gobinaa, digau hagamaamaa, digau oobidi o-nia guongo e-lau mada-lua maa-hidu-(127) mai i India gaa-tugi i Ethiopia. Nia lede le e-wanga gi-nia guongo i nadau helekai mo labelaa gi digau o Jew i nadau helekai.

8:10  Mordecai ne-hai digaula gi-hihi nia lede aanei i-di ingoo o-di King Xerxes, gaa-togo ginai di maaga di king. Nia lede aanei e-daamada e-duwwe go nia daane e-lellele i-hongo nia hoodo llele huoloo mai i-nia hale-hoodo di king.

8:11  Nia lede aanei e-hagamodongoohia bolo di king gu-haga-mahuge ang-gi digau o Jew i-lodo nia guongo huogodoo di-nadau hai e-duuli-ai ginaadou. Maa nia daane-dauwa mai i-lodo nia guongo huogodoo ala ga-lloomoi ga-daaligi nia daane o Jew, mo nadau dama, be go nadau ahina, gei digau o Jew guu-mee-hua di-heebagi gi-muli e-daaligi digau aanei, gei e-mee di-daaligi digaula huogodoo gii-odi, gaa-kae nia mee nogo hai-mee ginai digaula.

8:12  Taganoho deenei le e-mogobuna i-hongo nia guongo Persia i-di laangi dela guu-dugu bolo e-daaligi digau o Jew, di madangaholu maa-dolu laangi o Adar, di madangaholu maa-lua malama.

8:13  E-hai-loo gi-haga-waalanga be taganoho, ge e-hai gi-iloo nia daangada o-nia guongo huogodoo bolo digau o Jew gi-togomaalia e-hai-baahi gi nadau hagadaumee i-di madagoaa di laangi deelaa ga-dau-mai.

8:14  Di king gu-haganoho bolo digau ala e-llele nia hoodo di king la-gii-llele hagalimalima. Gei di mee deenei guu-dele labelaa i-lodo di guongo go Susa, go di waahale dagi.

8:15  Mordecai ga-ulu gi-daha mo-di hale di king, e-ulu nia gahu aamua e-halatee mo kene, di gahu halatee luuli e-dagi mai muli, mo e-ulu di goobai goolo. Gei digau Susa guu-wwaa gi-nua-loo mo-di tenetene.

8:16  Gei digau o Jew ala i-golo gu-tenetene, gu-dadaahili mo-di tenetene, ge gu-hagalongo-ia bolo ginaadou gu-aali.

8:17  I-lodo nia guongo mo nia waahale huogodoo ala guu-dau ginai di hagailoo di king dela ne-duwwe, nia daangada huogodoo o Jew gu-tenetene ge guu-hai nadau hagamiami. Gei e-donu, nia daangada dogologo guu-hai nia daangada dau gi Jew, idimaa digaula gu-mmaadagu i digaula.