Kapingamarangi - Esther - 4

4:1  Di madagoaa Mordecai ne-iloo-ia nia mee ala ne-hai, gei mee ga-hahaahi ono goloo i-lodo dono dee-hiihai. Nomuli ga-ulu di gahu manawa-gee, gaa-gahu dono libogo gi-nia lehu, ga-heehee laa-lodo di guongo mo-di wolowolo mo-di dangidangi gi-nua-loo,

4:2  gaa-dau-adu-loo gi-di ngudu di bontai di hale di king. Mee digi hana gi-lodo, idimaa deai tangada e-mee di-ulu gi-lodo di hale di king e-ulu di gahu manawa-gee ai.

4:3  I-lodo nia waa-henua hagatau, nia madagoaa ala gu-hagamodongoohia di hagailoo di king, digau o Jew gu-manawa-gee huoloo. Digaula guu-noho hagaonge, tangitangi, hagahaa, gei togologo digaula gu-ulu nia gahu manawa-gee mo-di kii i-lodo nia lehu.

4:4  Di madagoaa nia hege-ahina mono hege-daane a Esther ne-hagi-anga gi mee di hai Mordecai ne-hai, mee gu-lodo-huaidu huoloo. Mee gaa-kae ana gahu gi Mordecai gi-ulu-ai gi-liagia ono gahu manawa-gee, gei Mordecai e-de-hiihai di-ulu nia maa.

4:5  Esther ga-gahi-mai a Hathach, taane-‘eunuch’ o-di hale dela ne-dongo go di king bolo e-hai ana hegau gi Esther, ga-hagi-anga gi mee gii-hana gi Mordecai gi-iloo mai baahi o mee be ma di-aha ne-hai, gei ne-aha?

4:6  Hathach gaa-hana gi Mordecai i-lodo di gowaa dela e-heheetugi nia daangada i-di ngudu di bontai di hale di king.

4:7  Mordecai gu-hagi-anga huogodoo nia mee ala ne-hai ang-gi deia mo nia bahihadu e-hia Haman ne-hagababa bolo e-wanga gi-lodo di gowaa benebene bahihadu di king maa digau o Jew huogodoo ga-daaligi gii-mmade.

4:8  Gei mee gaa-wanga dana lau beebaa dela guu-hihi ginai di hagailoo dela gu-duwweduwwe i-lodo Susa, e-haga-noho bolo gi-daaligi gii-mmade digau o Jew. Mordecai ga-helekai gi mee gi-kaina di beebaa gi Esther, mo-di hagamodongoohia-ina gi mee nia mee ala guu-hai, gi-heia a-mee gii-hana gi-baahi di king gi-dangi ang-gi mee gi-aloho i ono daangada.

4:9  Gei Hathach gu-haga-gila-aga di-maa.

4:10  Esther gaa-wanga gi mee di haga-iloo gi-kaina gi-muli gi Mordecai:

4:11  “Maa dahi dangada, taane be-di ahina, ga-ulu i-di gowaa dabu bolo e-mmada gi-di king, gei mee digi hagagahi go di king, tangada deelaa le e-daaligi gii-made. Deelaa taganoho gu-iloo digau huogodoo, mai digau hagamaamaa di king, gaa-dau-loo gi-nia daangada huogodoo ala i-lodo nia waa-henua di king. Di ala hua e-dahi dela e-mee di-ulu gi-lodo, hagalee daaligi gii-made: Maa di king ga-dahi-aga dana dogodogo goolo gi tangada, gei tangada deelaa ga-mouli. Malaa, di king digi gahi au i-lodo di malama e-dahi.”

4:12  Di madagoaa Mordecai ne-dau dana hagailoo mai baahi Esther,

4:13  gei mee ga-hagau dana hagailoo hagalliga gi mee: “Goe hudee maanadu bolo goe guu-noho i-di aumaalia i-daha mo digau o Jew, dela bolo goe guu-noho i-lodo di hale di king.

4:14  Maa nei bolo goe gaa-noho deemuu i-nia madagoaa beenei, di hagamaamaa ga-hanimoi i-di langi ang-gi digau o Jew, gei digaula gaa-noho i-di aumaalia, gei goe gaa-made, gei di madahaanau do damana ga-hagaodi ga-hagalee. Gei goai e-iloo-ia: holongo ma go-di hai deenei dela ne-hidi-ai-iei goe ne-hai di queen!”

4:15  Esther ga-hagau gi Mordecai telekai deenei:

4:16  “Hana, gahi-aga huogodoo digau o Jew ala i-lodo Susa gi-di gowaa e-dahi. Hagaonge mo-di dalodalo i-di-au. Hudee miami be e-inu i-lodo nia laangi e-dolu be nia boo e-dolu. Dagu ahina hai-hegau mo au gaa-hai gadoo beelaa. No-muli, gei au gaa-hana gi-di king, ma e-aha maa e-hai-baahi gi taganoho. Maa au ga-daaligi gii-made i-di mee deenei e-hai ko-au, malaa, au gaa-made.”

4:17  Mordecai guu-hana guu-hai nia mee huogodoo Esther ne-hai bolo gi-heia.