LinVB - Zechariah - 13

13:1  Mokolo mona bato ba libota lya Davidi mpe ba Yeruzalem bakozwa liziba mpo ’te balongola masumu mpe mbindo ya ba­ngo.

13:2  Yawe wa bokasi bonso alobi : Mokolo mona nakolongola nko­mbo ya bikeko binso o mokili ; bato bakotanga nkombo ya bikeko lisusu te. Se bongo nakobengana baprofeta, mpe nakosilisa mayele ma mbindo o mokili.

13:3  Soko moto alingi lisusu koloba lokola profeta, tata na mama wa ye baye baboti ye bakoloba na ye : « Okotikala na bomoi te, mpo ozali kosakola makambo ma lokuta o nkombo ya Yawe. » Bongo tata na mama wa ye baboti ye bakotubola ye, ntango azali kosakola.

13:4  Mokolo mona baprofeta bakoyoka limoni lya bango nsoni, bobele o ntangomei bakosakola lyango. Bakolata molato mwa nsuki ya mpata lisusu te mpo ya kokosabato.

13:5  Kasi bakoloba : « Nazali profeta te, ngai nazali moto wa bilanga ; banda bomwana nazali na mabelé ma ngai. »

13:6  Na nsima bakotuna ye : « Mpota o ntolo ya yo euti wapi ? » Akoyanola : « Nazoki mpota iye o ndako ya bali­ngami ba ngai. »

13:7  Yawe wa bokasi bonso alobi : E mopanga, banda etumba na mokengeli wa ngai, bundisa moninga wa ngai. Bete mokengeli, mpata ipanzana. Nakoya kobete bato batau lokola.

13:8  Yoka maloba ma Yawe : Mokolo mona ndambo ibale ya bato bakokufa, ndambo ya isato bakotikala na bomoi.

13:9  Nakokotisa ndambo eye ya isato o móto, nakonyangwisa bango lokola bakopetolaka palata, nakopetola bango lokola bakopetolaka wolo. Bango bakobondela ngai, mpe ngai nakondimela bango. Nakoloba : « Bazali bato ba ekolo ya ngai ! », bango bakoloba : « Yawe azali Nza­mbe wa biso ! »