LinVB - Zechariah - 3

3:1  Yawe amonisi ngai nganga mokonzi Yozue. Atelemi o boso bwa anzelu wa Yawe. Satana atelemi o loboko la ye la mobali mpo ya kofunda ye.

3:2  Anzelu wa Yawe alobi na Satana : « Yawe akangisa yo monoko, Satana ! Yawe asukisa yo, ye moto aponi Yeruzalem. Ye wana azali lokoni babendi o libanda lya móto te ? »

3:3  Yozue alati bilamba bosoto ntango atelemi o boso bwa anzelu.

3:4  Anzelu alobi na baye batelemi o boso bwa ye : « Bolongola ye bilamba bya bosoto, mpe bolatisa ye bilamba bya eyenga. » Na nsima alobi na Yozue : « Tala, nalongoli lisumu lya yo.

3:5  Botia ye ngabuni kitoko o motó. » Bongo batii ye ngabuni kitoko o motó, mpe balatisi ye bilamba bya eyenga o miso ma anze­lu wa Yawe.

3:6  Anzelu wa Yawe alobi na Yozue :

3:7  « Yawe wa bokasi bonso alobi boye : Soko otamboli o nzela ya ngai, soko otosi mibeko mya ngai, yo moto okoyangela libota lya ngai, okokengele lopango la ngai mpe nakokotisa yo o molongo mwa baye bazali awa. »

3:8  Yo nganga mokonzi Yozue, na baninga ba yo bafandi pene na yo, boyoka ! Bino bato bokoyoka makambo makoya nsima. Nakotinda mosaleli wa ngai « Ebo­to ya sika. »

3:9  Tala libanga nakotia liboso lya Yozue, lizali na miso nsambo ; ngai moko nakokoma nkombo o libanga ; na mokolo moko nakolongola o mokili moye makambo mazangi bosembo. Yawe wa bokasi bonso alobi bo­ngo.

3:10  Mokolo mona bokobyanga bani­nga mpo ya kolia limpati o nse ya nzete ya vino to ya oliva. Maloba ma Yawe wa bokasi bonso.