LinVB - Zechariah - 8

8:1  Yawe Mokonzi wa bokasi bonso alobi na ngai maloba maye :

8:2  Yoka maloba ma Yawe wa bokasi bonso : Nakolingaka Sion mingi mpenza, nakolakisaka ye bolamu bwa ngai.

8:3  Yawe alobi : Nakozonga o Sion, nalingi kofanda o Yeruzalem. Bakotanga Yeruzalem ‘Engumba ya Lobokó’ mpe ngomba ya Yawe wa bokasi bonso ‘Ngomba Esantu’.

8:4  Yawe wa bokasi bonso alobi : Babange, babali na basi, bakopema o milolo mya Yeruzalem, moto na moto lingenda o maboko mpo ya bonuna.

8:5  Bana, babali na basi, bakotonda o mabanda ma engumba mpe bakosakana o bisika bina.

8:6  Yawe wa bokasi bonso alobi : Soko bato ba ekolo eye bakotikala wana o mikolo mina bakokamwa na yango, ngai nakokamwa te. Maloba ma Yawe wa bokasi bo­nso.

8:7  Yawe wa bokasi bonso alobi : Nakobikisa bato ba ngai ut’o ekolo ya Esti mpe ekolo ya Westi.

8:8  Nakozongisa bango mpo ’te bafanda o Yeruzalem. Bakozala bato ba ngai mpe ngai nakozala Nzambe wa bango, na lobokó mpe na bosembo !

8:9  Yawe wa bokasi bonso alobi : Bolendisa maboko, bino bato bokoyokaka maloba ma baprofeta ut’o mikolo miye batiaki mabanga ma liboso ma ndako ya Yawe wa bokasi bonso mpo ya kotonga Te­mpelo lisusu.

8:10  Liboso lya mikolo miye bato bazalaki kozwa lifuta te. Nyama ya bango izalaki kopesa litomba lyoko te. Bato balingaki kokende mpe kozonga bazalaki kobanga banguna o nzela. Ngai moko natikaki bato batombokelana.

8:11  Kasi na bato batikali o mokili moye nakosala lisusu te lokola nasalaki o ntango ena. Maloba ma Yawe wa bokasi bonso.

8:12  Sikawa bato bakolona na motema mpio ; nzete ya vino ekobota mbuma, mabelé makobotisa mbuma ilamu ; mampata ma­kotangisa mamio. Nakopesa bato batikali o ekolo eye malamu maye manso.

8:13  Lokola mabe maye bato­mbeli bino makwelaki bino o bikolo bisusu, libota lya Yuda mpe lya Israel, se bongo nakobikisa bino mpe nakobenisa bino. Bobanga te mpe bolendisa maboko !

8:14  Yawe wa bokasi bonso alobi boye : Lokola nakanaki kosala bino mabe, mpo bankoko ba bino bayokisaki ngai nkanda - maloba ma Yawe wa bokasi bonso - mpe nakitisaki motema te,

8:15  se bongo nakolanda makanisi masusu : nakani kosala Yeruzalem mpe libota lya Yuda malamu. Bobanga te !

8:16  Boyoka nini bosengeli kosala : Moto na moto aloba se makambo ma bosolo na moninga wa ye ; bokata makambo na bosembo mpo ’te boboto bozonga.

8:17  Bokanelana o mitema te, bolaya ndai ya lokuta te : nayini makambo maye manso. Maloba ma Yawe.

8:18  Yawe wa bokasi bonso ayebisi ngai maloba maye :

8:19  Yawe wa bokasi bonso alobi boye : « Mikolo mya kolala nzala o sanza ya inei, ya nsambo mpe ya zomi, mikozala mikolo mya esengo mya bato ba Yuda, mikolo mya kosepela lokola ntango ya eyenga. Kasi boluka bosolo mpe boboto ! »

8:20  Yawe wa bokasi bonso alobi boye : Bato ba bikolo bisusu na bato ba bingumba binene bakoya awa.

8:21  Bato ba engumba yoko bakokende koyebisa bato ba engu­mba esusu : « Tokende kobondela Yawe, toluka Yawe wa bokasi bo­nso ; biso mpe tokende. »

8:22  Bato baike bakoya, bato balongwi o bikolo binene bakoya koluka Yawe wa bokasi bonso o Yeruzalem mpe bakobondela ye.

8:23  Yawe wa bokasi bonso alobi boye : O mikolo mina bato zomi ba bikolo mpe ba nkota ndenge na ndenge, bakokanga mo-Yuda moko o nsonge ya elamba ya ye, bakoloba : « Biso mpe tolingi kokende na yo, zambi toyoki ’te Nzambe azali na yo. »