LinVB - Zechariah - 9

9:1  Liloba lya Yawe likatisi ekolo ya o Kadrak mpe likomi o Damasko, zambi Yawe azali nkolo wa ekolo Aram, se lokola wa mabota manso ma Israel.

9:2  Azali mpe mokonzi wa Amat, o ndelo ya mokili mwa biso, mpe wa Tiro na Sidoni, bingumba bya bato ba bwanya.

9:3  Bato ba Tiro batongi ebombamelo enene, bakongoli mosolo ebele lokola zelo, mpe wolo ebele lokola potopoto ya balabala.

9:4  Tala, sikawa Yawe akoya kobotolo yango, akobwaka yango o mbu, engumba mobimba ekotumbama.

9:5  Ntango Askelon akomono yango, akobanga, bato ba Gaza mpe bakolenga, bato ba Ekron bakobulangana. Bato ba Gaza bakozanga mokonzi, o Askelon bato bakozala lisusu te.

9:6  Bauta bakoya kofanda o Asdod ; nakosilisa lolendo la ba-Filisti,

9:7  nakolongola makila o minoko mya bango, na mpe biloko bya nsomo o kati ya mino ma bango ; baye bakotikala bakokoma bato ba Nzambe wa biso, bakozala libota lyoko o ekolo ya Yuda ; Ekron akokoma lokola bato ba Yebus.

9:8  Nakopika nganda o boso bwa bato ba ngai, nakokenge baye bakokende mpe bakozonga. Moto moko akonyokolo bango lisusu te, zambi ngai moko nakotala bango malamu.

9:9  Bato ba Sion, boyoka nsai ! Bato ba Yeruzalem, boganga na esengo ! Solo, Mokonzi wa bino azali koya epai ya bino, mokonzi wa bosembo oyo akolongaka banguna. Ye moto wa bosawa abuteli mpu­nda, afandeli mwana wa mpunda mwasi.

9:10  Akobebisa makalo manso ma Efraim na farasa ya Yeruzalem. Akobuka matimbo manso ma bitumba, akoyela bato ba bikolo binso boboto. Epai na epai bokonzi bwa ye bokokoma kin’o mbu, banda ebale Efrate kin’o nsuka ya mokili.

9:11  Mpo ya bondeko tokataki na makila, nalongoli bato ba yo bakangemi o mabulu maye makauka mai.

9:12  Bino baombo baye bobwaki eli­kya te, bozonga o ebombamelo ya sika. Lelomei nayebisi bino : Nakozongisela bino malamu mba­la ibale.

9:13  Natandi litimbo lya ngai, lyango nde Yuda ; nakembisi litimbo na likula, lyango nde Efraim. Nakolendisa bato ba yo, Sion, bakende kobundisa bato ba yo, Yavan, nakokomisa yo lokola mopanga mwa elombe.

9:14  O mikolo mina Yawe akobimela bango, likula lya ye likobete lokola mi­nkalali. Mokonzi Yawe akolelisa mondule, ut’o Sudi akoya o ekumbaki.

9:15  Yawe wa bokasi bonso akobatela bango, bakolonga, bakonyata mabanga ma bilingongo, bakomele makila lokola vino, lokola mai o mbeki ya bonyakeli, lokola makila masopani o matumu ma altare.

9:16  Mokolo mona Yawe Nzambe wa bango akobikisa bango, mpata ya etonga ya ye ; lokola mabanga ma motuya ma enkoti ya bokonzi mangengi o mokili mwa ye.

9:17  Bakozala kitoko mpe na esengo ! Mampa makolendisa bilenge babali, vino ekosepelisa bangondo.