LinVB - Zechariah - 5

5:1  Nafungoli lisusu miso mpe namoni limoni ; namoni monka­nda mozalaki kopimbwa.

5:2  Anzelu atuni ngai : « Omoni nini ? » Nayanoli : « Namoni monkanda mopi­mbwi, mokoki na bolai maboko ntuku ibale, na bonene maboko zomi. »

5:3  Ye alobi : « Yango elakisi bobe bokokwela ekolo mobimba ; bakobengana bayibi banso awa, na mpe bato banso balayi ndai ya lokuta na nkombo ya ngai. »

5:4  Yawe wa bokasi bonso alobi : « Ngai moko nakotombela ndako ya moyibi mpe ya moto wa lokuta bobe ; bobe bo­kwela ndako ya ye mobimba, bosilisa ndako ya ye, mabasa na maba­nga. »

5:5  Anzelu oyo azalaki koloba na ngai abelemi, alobi : « Fungola miso, tala eloko nini ezali kotambola wana. »

5:6  Natuni ye : « Yango eloko nini ? » Ayanoli : « Ezali kopo ya koteke biloko ezali kotambola. » Abakisi : « Bato banso o ekolo eye bakosalaka lisumu na yango. »

5:7  Talaka ezipeli ezito ya kopo etombwami. Mwasi moko afandi o kopo.

5:8  Anzelu alobi : « Tala elembo ya mabe ma­nso bato bakosalaka. » Bongo azo­ngisi mwasi o kati ya kopo, azipi kopo na ezipeli ezito.

5:9  Nátala lisusu, namoni limoni lisusu : Basi babale bazalaki kokende. Mompepe mopepi mpe mofungoli mapapu ma bango, mazalaki lokola mapapu ma nkongi. Basi batomboli kopo.

5:10  Natuni anzelu oyo azalaki koloba na ngai : « Basi bakei na kopo epai wapi ? »

5:11  Ayanoli : « Bakei o mokili mwa Sinear. Bakotongela kopo nda­ko kuna ; bakobongisela yango esika, ekozala kuna seko, ekolo­ngwa lisusu te. »