Pohnpeian - Zechariah - 2

2:1  Nan pil ehu kaudiahl, I kilangada ohl emen me kolokol sahl en sosohng pwoat.

2:2  Ngehi eri kalelapak reh, “Komw pahn ket ia?” E ahpw sapengki, “I pahn kolahng sohng Serusalem, pwe I en ese uwen reirei oh tehlap.”

2:3  Ngehi eri pil kilangada tohnleng me koasoakoasoiong ieo eh keidahla, oh pil emen tohnleng pil pwarodo reh.

2:4  Tohnleng keieuo ahpw mahsanihong meteio, “Tangala mahs oh padahkihong mwahnakapw me weuwa mehn sosohngo me aramas oh mahn pahn ngederla nan Serusalem me kahrehda e pahn nohn kalaimwun pwe en mie kele.

2:5  KAUN-O ketin inoukidahr me pein ih pahn wia kehl kisiniei ehu kapilpene kahnimwo pwehn sinsile oh e pahn ketiket wasao ni sapwellime lingan unsek.”

2:6  KAUN-O ketin mahsanihong sapwellime aramas akan, “I kamwarangkumwailseli wasa koaros. Ahpw met, kumwail me kalipilipala kan, kumwail pitsang Papilonia oh pwurodo Serusalem.

2:7  KAUN-O ketin mahsanihong sapwellime aramas akan, “I kamwarangkumwailseli wasa koaros. Ahpw met, kumwail me kalipilipala kan, kumwail pitsang Papilonia oh pwurodo Serusalem.

2:8  Mehmen me pahn sair kumwail pahn sair mehkot me keieu kesempwal rehi.” Eri, KAUN-O, Wasa Lapalap, ketin poaroneiehdo iangahki mahsen wet ong wehi kan me kauwelahr sapwellime aramas akan:

2:9  “Pein KAUN-O pahn ketin uhwong kumwail, oh aramas akan me kin uhpah kumwail mahs pahn uhd kauweikumwailla.” Ni met eh pahn pweida, aramas koaros pahn esehla me KAUN-O, Wasa Lapalap, me ketin poaroneiehdo.

2:10  KAUN-O ketin mahsanih, “Kumwail mehn Serusalem kan, kumwail kokoulki amwail peren! Pwe I pahn ketido pwe I en ieiang kumwail!”

2:11  Ni ahnsowo wehi tohto pahn patohdo rehn KAUN-O oh wiahla sapwellime aramas. E pahn ketiket nanpwungamwail, oh kumwail pahn esehla me iei ih me ketin poaroneiehdo rehmwail.

2:12  Suda pahn pwurehng wiahla sapwellimen KAUN-O wasa kesempwal nan sahpw sarawio, oh Serusalem pahn wiahla kahnimw me e pahn ketin loalloale sang kahnimw koaros.

2:13  Kumwail koaros, kumwail nennenla mwohn silangin KAUN-O, pwe e ketiket kohdo sang nan mwoale.