Kapingamarangi - Ecclesiastes - 6

6:1  Au gu-gidee bolo i-lodo henuailala di mee hagalee donu guu-hai:

6:2  God gaa-wanga gi tangada di maluagina, di hagalaamua, nia gowaa, nia mee huogodoo ala e-hiihai ginai ia, malaa Mee e-hagalee dumaalia ang-gi mee gii-tene ginai. Tangada hua-gee gaa-pono dono lohongo ga-tenetene i-nia maa. Di mee deenei le e-maa gi-daha gei e-hagalee donu.

6:3  Tangada e-mee di-hai-mee gi-nia dama dogologo e-llau, mo e-mouli duainau, malaa, maa mee e-hagalee tene gi ono hagahumalia i-di waalooloo o dono mouli, ge hagalee benebene hagahumalia i-di madagoaa ma-gaa-made-ai, au e-helekai bolo di tama dela ga-haanau-mai made la-koia e-humalia i tangada deelaa.

6:4  Di haanau o tama deelaa la dono hadinga ai, mee ga-hagangala-ia gi-lodo di bouli, gei dono ingoo e-de-langahia i-lodo di bouli deelaa.

6:5  Tama deelaa hagalee gidee di maalama o-di laangi, ge de-iloo di mouli le e-hai behee, dono hagamolooloo-hua dela ne-gidee-ia.

6:6  E-koia e-humalia i tangada dela digi gidee-ia dono haga-tenetene, ma e-aha maa mee e-mouli i-nia ngadau e-lua-mana. I-di hagaodi meemaa dogolua e-hula gi-di gowaa e-dahi.

6:7  Gidaadou e-ngalua gii-mee gidaadou di-miami, malaa e-dee dohu.

6:8  Dehee di hai o digau kabemee e-humalia i digau dadaulia? Di hagahumalia behee e-gila-mai i-baahi digau hagaloale maa digaula ga-iloo di hagadau benebene ginaadou?

6:9  Ma e-maa gi-daha. Ma e-hai be-di waluwalu di madangi. Ma e-koia e-humalia ma-gaa-dohu anga-hua gi au mee ala e-hai-mee ginai, i-di hiihai gi nia mee ala i-golo i-nia madagoaa huogodoo.

6:10  Nia mee huogodoo ala e-gila-aga la-guu-lawa di-haganoho mai i-mua-loo, gei gidaadou huogodoo gu-iloo bolo tangada e-deemee di-lagamaaloo gi dahi dangada dela e-maaloo i-deia.

6:11  Di logo-mai o au helehelekai, e-haga-hogoohi-mai nia hadinga o au helekai. Dono humalia adu gi-di-goe ai.

6:12  Dehee di hai o dahi dangada i gidaadou e-iloo di mee kaedahi e-humalia mai gi gidaadou i-lodo tadau mouli bodobodo-nei dela e-maa gi-daha, di mouli dela e-menege be-di malu? Dehee tadau hai e-iloo-gidaadou nia mee ala ga gila-aga i-lodo o henuailala i-muli tadau mmade?