Site uses cookies to provide basic functionality.

OK
JEREMIAH
Prev Up Next
Chapter 39
Jere Aleppo 39:1  בשנה התשעית לצדקיהו מלך יהודה בחדש העשרי בא נבוכדראצר מלך בבל וכל חילו אל ירושלם ויצרו עליה
Jere Aleppo 39:2  בעשתי עשרה שנה לצדקיהו בחדש הרביעי בתשעה לחדש הבקעה העיר
Jere Aleppo 39:3  ויבאו כל שרי מלך בבל וישבו בשער התוך—נרגל שראצר סמגר נבו שר סכים רב סריס נרגל שראצר רב מג וכל שארית שרי מלך בבל
Jere Aleppo 39:4  ויהי כאשר ראם צדקיהו מלך יהודה וכל אנשי המלחמה ויברחו ויצאו לילה מן העיר דרך גן המלך בשער בין החמתים ויצא דרך הערבה
Jere Aleppo 39:5  וירדפו חיל כשדים אחריהם וישגו את צדקיהו בערבות ירחו ויקחו אותו ויעלהו אל נבוכדראצר מלך בבל רבלתה בארץ חמת וידבר אתו משפטים
Jere Aleppo 39:6  וישחט מלך בבל את בני צדקיהו ברבלה—לעיניו ואת כל חרי יהודה שחט מלך בבל
Jere Aleppo 39:7  ואת עיני צדקיהו עור ויאסרהו בנחשתים לביא אתו בבלה
Jere Aleppo 39:8  ואת בית המלך ואת בית העם שרפו הכשדים באש ואת חמות ירושלם נתצו
Jere Aleppo 39:9  ואת יתר העם הנשארים בעיר ואת הנפלים אשר נפלו עליו ואת יתר העם הנשארים—הגלה נבוזראדן רב טבחים בבל
Jere Aleppo 39:10  ומן העם הדלים אשר אין להם מאומה השאיר נבוזראדן רב טבחים בארץ יהודה ויתן להם כרמים ויגבים ביום ההוא
Jere Aleppo 39:11  ויצו נבוכדראצר מלך בבל על ירמיהו ביד נבוזראדן רב טבחים לאמר
Jere Aleppo 39:12  קחנו ועיניך שים עליו ואל תעש לו מאומה רע  כי אם (  ) כאשר ידבר אליך—כן עשה עמו
Jere Aleppo 39:13  וישלח נבוזראדן רב טבחים ונבושזבן רב סריס ונרגל שראצר רב מג—וכל רבי מלך בבל
Jere Aleppo 39:14  וישלחו ויקחו את ירמיהו מחצר המטרה ויתנו אתו אל גדליהו בן אחיקם בן שפן להוצאהו אל הבית וישב בתוך העם  {ס}
Jere Aleppo 39:15  ואל ירמיהו היה דבר יהוה בהיתו עצור בחצר המטרה לאמר
Jere Aleppo 39:16  הלוך ואמרת לעבד מלך הכושי לאמר כה אמר יהוה צבאות אלהי ישראל הנני מבי את דברי אל העיר הזאת לרעה ולא לטובה והיו לפניך ביום ההוא
Jere Aleppo 39:17  והצלתיך ביום ההוא נאם יהוה ולא תנתן ביד האנשים אשר אתה יגור מפניהם
Jere Aleppo 39:18  כי מלט אמלטך ובחרב לא תפל והיתה לך נפשך לשלל כי בטחת בי נאם יהוה  {פ}