Geez - Psalms - 5

5:1  ቃልየ ፡ አፅምእ ፡ እግዚኦ ፡ ወለቡ ፡ ጽራኅየ ።

5:2  ወአፅምአኒ ፡ ቃለ ፡ ስእለትየ ፤ ንጉሥየኒ ፡ ወአምላክየኒ ።

5:3  እስመ ፡ ኀቤከ ፡ እጼሊ ። እግዚኦ ፡ በጽባሕ ፡ ስምዐኒ ፡ ቃልየ ።

5:4  በጽባሕ ፡እቀውም ፡ ቅድሜከ ፡ ወኣስተርኢ ፡ ለከ ።

5:5  እስመ ፡ ኢኮንከ ፡ አምላከ ፡ ዘዐመፃ ፡ ያፈቅር ፡ ወኢየኀድሩ ፡ እኩያን ፡ ምስሌከ ።

5:6  ወኢይነብሩ ፡ ዐማፅያን ፡ ቅድመ ፡ አዕይንቲከ ፡ ጸላእከ ፡ እግዚኦ ፡ ኵሎሙ ፡ ገበርተ ፡ ዐመፃ ፤ ወትገድፎሙ ፡ ለኵሎሙ ፡ እለ ፡ ይነቡ ፡ ሐሰተ ።

5:7  ብእሴ ፡ ደም ፡ ወጕሕላዌ ፡ ይስቆርር ፡ እግዚአብሔር ።

5:8  ወአንሰ ፡ በብዝኀ ፡ ምሕረትከ ፡ እበውእ ፡ ቤተከ ፤ ወእሰግድ ፡ ውስተ ፡ ጽርሐ ፡ መቅደስከ ፡ በፍሪሆትከ ።

5:9  እግዚኦ ፡ ምርሐኒ ፡ በጽድቅከ ፤ ወበእንተ ፡ ጸላእትየ ፡ አርትዕ ፡ ፍኖትየ ፡ ቅድሜከ ።

5:10  እስመ ፡ አልቦ ፡ ጽድቀ ፡ ውስተ ፡ አፉሆሙ ፤ ወልቦሙኒ ፡ ከንቱ ።

5:11  ከመ ፡ መቃብር ፡ ክሡት ፡ ጐራዒቶሙ ፤ ወጸልሕዉ ፡ በልሳናቲሆሙ ።

5:12  ኰንኖሙ ፡ እግዚኦ ፡ ወይደቁ ፡ በውዴቶሙ ፤ ወበከመ ፡ ብዝኀ ፡ ሕብሎሙ ፡ ስድዶሙ ፤ እስመ ፡ አምረሩከ ፡ እግዚኦ ። ወይትፌሥሑ ፡ ብከ ፡ ኵሎሙ ፡ እለ ፡ ይትዌከሉከ ፡ ለዓለም ፡ ይትሐሠዩ ፡ ወተኀድር ፡ ላዕሌሆሙ ። ወይትሜክሑ ፡ ብከ ፡ ኵሎሙ ፡ እለ ፡ ያፈቅሩ ፡ ስመከ ። እስመ ፡ አንተ ፡ ትባርኮ ፡ ለጻድቅ ፤ እግዚኦ ፡ ከመ ፡ ወልታ ፡ ሥሙር ፡ ከለልከነ ።