Geez - Psalms - 140

140:1  እግዚኦ ፡ ጸራኅኩ ፡ ኀቤከ ፡ ስምዐኒ ፤ ወአፅምእ ፡ ቃለ ፡ ስእለትየ ፡ ዘጸራኅኩ ፡ ኀቤከ ።

140:2  ተወከፈኒ ፡ ጸሎትየ ፡ ከመ ፡ ዕጣን ፡ በቅድሜከ ፤ አንሥኦ ፡ እደውየ ፡ መሥዋዕተ ፡ ሰርክ ።

140:3  ሢም ፡ እግዚኦ ፡ ዐቃቤ ፡ ለአፉየ ፤ ወማዕጾ ፡ ዘዐቅም ፡ ለከናፍርየ ።

140:4  ኢትሚጦ ፡ ለልብየ ፡ ውስተ ፡ ነገር ፡ እኩይ ፡ ወአመክንዮ ፡ ምክንያት ፡ ለኃጢአት ፡

140:5  ምስለ ፡ ሰብእ ፡ ገበርተ ፡ ዐመፃ ፤ ወኢይትኀበር ፡ ምስለ ፡ ኅሩያኒሆሙ ።

140:6  ገሥጸኒ ፡ በጽድቅ ፡ ወተዛለፈኒ ፡ በምሕረት ፤ ወቅብአ ፡ ኃጥኣንሰ ፡ ኢይትቀባእ ፡ ርእስየ ።

140:7  እስመ ፡ ዓዲ ፡ ጸሎትየኒ ፡ ከመ ፡ ኢተሣሀሎሙ ፤ ተሰጥሙ ፡ በጥቃ ፡ ኰኵሕ ፡ ጽኑዓኒሆሙ ።

140:8  ሰምዑኒ ፡ ቃልየ ፡ እስመ ፡ ተክህለኒ ። ከመ ፡ ግዝፈ ፡ ምድር ፡ ተሠጥቁ ፡ ዲበ ፡ ምድር ፤

140:9  ወተዘርወ ፡ አዕጽምቲሆሙ ፡ በኀበ ፡ ሲኦል ፡ እስመ ፡ ኀቤከ ፡ እግዚኦ ፡ እግዚኦ ፡ አዕይንትየ ፤ ብከ ፡ ተወከልኩ ፡ ኢታውፅኣ ፡ ለነፍስየ ።

140:10  ዕቀበኒ ፡ አመሥገርት ፡ እንተ ፡ ኀብኡ ፡ ሊተ ፤ ወእማዕቀፎሙ ፡ ለገበርተ ፡ ዐመፃ ።

140:11  ለይደቁ ፡ ውስተ ፡ መሥገርቶሙ ፡ ኃጥኣን ፤ እስመ ፡ አኀልፍ ፡ አነ ፡ ባሕቲትየ ።