Pohnpeian - Zechariah - 10

10:1  Kumwail peki rehn KAUN-O en ketikihdo keteu ni ahnsou mwahu en nan pahr. Iei ih KAUN-O me kin ketikihdo depwek en keteu, me kin kahrehda mwaht akan en kin molomolla ong aramas koaros.

10:2  Aramas akan kin rapahki kaweid sang rehn dikedik en eni kan oh sounkosetipw kan, ahpw pasapeng me kin kohieng irail me likamw oh sohte audepe. Ekei kin kawehwehda ouraman akan, ahpw ihte re kin kaweidsuwedihkumwailla; kaloalamwahu me re kin wiahiong kumwail sohte katepe. Eri, aramas akan ahpw kin sansalongseli duwehte sihpw me salongalahr. Re milahr nan apwal pwe sohte ar kaun.

10:3  KAUN-O ketin mahsanih, “I engieng pahn mehn liki pwuko me kaunda nei aramas akan, oh I pahn kaloke irail. Mehn Suda kan iei nei, oh ngehi, KAUN-O, Wasa Lapalap, pahn apwalih irail. Re pahn wia tehnwerei oahs en mahwen kehlail.

10:4  E pahn pwarada sang rehrail kaun ekei, me lapalap ekei, oh kaunen sounpei kei me pahn apwalih nei aramas akan.

10:5  Mehn Suda pahn ahneki manaman en powehdi rasehng sounpei me kin tiakedi ar imwintihti kan nan pwelmatak en nanial akan. Re pahn mahwen pwe KAUN-O ieiang irail, oh re pahn pil kalowehdi imwintihti me kin dak oahs akan.

10:6  “I pahn kakehlehda mehn Suda kan; I pahn kapitala mehn Israel. I pahn poakohng irail oh kapwurehdo irail koaros nan uhdakarail. E pahn duwehte ma I sohte keseirailla. Ngehi me KAUN-O, ar Koht; I pahn sapeng ar kapakap akan.

10:7  Mehn Israel kan pahn kehlail duwehte sounpei kan, pereperen duwehte ohl emen me kin niminim wain. Kadaudokarail kan pahn tamatamante manaman en powehdi wet oh nsenamwahu pwehki me KAUN-O ketin wiadahr.

10:8  “I pahn malipe nei aramas akan oh kapokoneirailpene. I pahn kapitirailla oh kupwurehda pwe re en ngederla duwehte mahs.

10:9  Mehnda ma I kamwarakiraillahng nanpwungen wehi kan ahpw re pahn tamataman ie nan wasa doh pwuko. Irail oh neirail seri kan pahn mourla oh pwurodohng nan uhdakarail.

10:10  I pahn kapwureiraildo sang Isip oh Asiria oh koasoaneiraildi nan uhdahn sapwarail. I pahn pil koasoaneiraildi nan Kilead oh Lepanon; sahpwo pwon pahn direkihla aramas.

10:11  Ni ar pahn kotehla ar sehd en kahpwalo, ngehi, KAUN-O, pahn poakih iloak kan, oh kepin Nail pahn madada. Aklapalap en Asiria pahn tikitikla, oh manaman en Isip pahn sohrala.

10:12  I pahn kakehlahda nei aramas akan; re pahn pwongih ie oh peikiong ie.” KAUN-O me mahmahsen.