Geez - Deuteronomy - 25

25:1  ወለእመ ፡ ኮነ ፡ ተስናን ፡ ማእከለ ፡ ሰብእ ፡ ወመጽኡ ፡ ውስተ ፡ አውድ ፡ ወተሳነኑ ፡ ወአርትዑ ፡ ለዘ ፡ ይረትዕ ፡ ወሰአሉ ፡ ለዘ ፡ ይጸውግ ፤

25:2  ወለእመ ፡ ኮነ ፡ ለተቀሥፎ ፡ ወያነብርዎ ፡ ቅድመ ፡ ዐውድ ፡ ለዝክቱ ፡ ዘይጸወግ ፡ ወይቀሥፍዎ ፡ በቅድሜሆሙ ፡ በአምጣነ ፡ አበሳሁ ።

25:3  አርብዓ ፡ ይቀሥፍዎ ፡ በኍልቍ ፡ ወኢያብዝኁ ፡ እምኔተ ፡ ወለእመ ፡ አብዝኁ ፡ ቀሢፎቶ ፡ እምዝንቱ ፡ አስተኀፈርከ ፡ እኁከ ፡ በቅድሜከ ።

25:4  ወኢትፈፅም ፡ አፉሁ ፡ ለላህምኒ ፡ ዘያከይድ ።

25:5  ወእመቦ ፡ አኀው ፡ እለ ፡ ይነብሩ ፡ ኅቡረ ፡ ብእሲ ፡ ምስለ ፡ እኁሁ ፡ ወሞተ ፡ አሐዱ ፡ እምኔሆሙ ፡ ወአልቦ ፡ ውሉደ ፡ ኢታውስብ ፡ ብእሲቱ ፡ ነኪረ ፡ ብእሴ ፡ ዘኢኮነ ፡ ቅሩቡ ፤ እኁሁ ፡ ለምታ ፡ ያውስባ ፡ ወውእቱ ፡ ለይባእ ፡ ኀቤሃ ፡ ወሎቱ ፡ ትኩኖ ፡ ብእሲቶ ፡ ወይንበር ፡ ምስሌሃ ።

25:6  ወሕፃን ፡ ዘተወልደ ፡ ይኩን ፡ ለዘ ፡ ሞተ ፡ ወይሰመይ ፡ በስሙ ፡ ወኢይደምሰስ ፡ ስሙ ፡ እምነ ፡ እስራኤል ።

25:7  ወለእመ ፡ ኢፈቀደ ፡ ውእቱ ፡ ብእሲ ፡ ያውስበ ፡ ለብእሲተ ፡ እኁሁ ፡ ወተዐርግ ፡ ይእቲ ፡ ብእሲተ ፡ ኀበ ፡ ሊቃናት ፡ ወኀበ ፡ አንቀጽ ፡ ወትብል ፡ ኢይፈቅድ ፡ እኁሁ ፡ ለምትየ ፡ ያቅም ፡ ስመ ፡ እኁሁ ፡ ውስተ ፡ እስራኤል ፤

25:8  ወይጼውዕዎ ፡ ሊቃናተ ፡ ሀገሩ ፡ ወይብልዎ ፡ ኢትፈቅድኑ ፡ ታቅም ፡ ዘርአ ፡ ለእኁከ ፡ ውስተ ፡ እስራኤል ፡ ወይብል ፡ ቀዊሞ ፡ ኢይፈቅድ ፡ አውስባ ፤

25:9  ወትመጽእ ፡ ይእቲ ፡ ብእሲት ፡ ቅድመ ፡ (እግዚአብሔር ፡ ወቅድመ ፡) ሊቃናተ ፡ ይእቲ ፡ ሀገር ፡ ወትፈትሕ ፡ ሣእኖ ፡ ዘአሐቲ ፡ እግሩ ፡ ወትተፍእ ፡ ውስተ ፡ ገጹ ፡ ወትብል ፡ ከመዝ ፡ ይገብርዎ ፡ ለብእሲ ፡ ዘኢየሐንጽ ፡ ቤተ ፡ እኁሁ ።

25:10  ወይሰመይ ፡ ስሙ ፡ በውስተ ፡ እስራኤል ፡ ቤተ ፡ ፍቱሐ ፡ ሣእን ።

25:11  ወለእመ ፡ ተባአሱ ፡ ክልኤቱ ፡ ዕደው ፡ ኅቡረ ፡ ብእሲ ፡ ምስለ ፡ ካልኡ ፡ ወመጽአት ፡ ብእሲቱ ፡ ለአሐዱ ፡ እምኔሆሙ ፡ ከመ ፡ ታኅድጎ ፡ ለምታ ፡ እምእደ ፡ ዘባጢሁ ፡ ወአልዐለት ፡ እዴሃ ፡ ወአኀዘቶ ፡ በክልኤሆን ፡ አሰክቲሁ ፤

25:12  ለይምትሩ ፡ እደዊሃ ፡ ወኢትምሐካ ፡ ዐይንከ ።

25:13  ወኢታንብር ፡ ለከ ፡ መዳልወ ፡ ንኡሰ ፡ ወዐቢየ ።

25:14  ወኢትግበር ፡ ለከ ፡ ውስተ ፡ ቤትከ ፡ መስፈርተ ፡ ዐቢየ ፡ ወመስፈርተ ፡ ንኡሰ ።

25:15  ወመዳልዊከኒ ፡ ርቱዐ ፡ ወጽዱቀ ፡ ይኩን ፡ ከመ ፡ ታብዝኅ ፡ መዋዕለ ፡ [በምድር ፡] እንተ ፡ ይሁበከ ፡ እግዚአብሔር ፡ አምላክከ ፡ መክፈልተከ ።

25:16  እስመ ፡ ርኩስ ፡ ውእቱ ፡ በኀበ ፡ እግዚአብሔር ፡ አምላክከ ፡ ኵሉ ፡ ዘይገብሮ ፡ ለዝንቱ ፡ ወኵሉ ፡ ዘይገብር ፡ ዐመፃ ።

25:17  ወተዘከር ፡ ኵሎ ፡ ዘገብረ ፡ ለከ ፡ ዐማሌቅ ፡ በፍኖት ፡ አመ ፡ ወፃእከ ፡ እምነ ፡ ምድረ ፡ ግብጽ ፤

25:18  እፎ ፡ ተቃወመከ ፡ በፍኖት ፡ ወአምተረከ ፡ ገዐዘከ ፡ እለ ፡ ይጻምው ፡ በድኅሬከ ፡ ወአንትሰ ፡ ርኅብከ ፡ ወደከምከ ፡ ወኢፈራህካሁ ፡ ለእግዚአብሔር ።

25:19  ወአመ ፡ ያዐርፈከ ፡ እግዚአብሔር ፡ አምላክከ ፡ እምነ ፡ ኵሉ ፡ ፀርከ ፡ እለ ፡ ዐውድከ ፡ ውስተ ፡ ምድር ፡ እንተ ፡ ይሁበከ ፡ እግዚአብሔር ፡ አምላክከ ፡ ትትወረሳ ፡ መክፈልተከ ፡ ትደመስሶ ፡ ለዐማሌቅ ፡ እምታሕተ ፡ ሰማይ ፡ ወኢትርስዖ ።