CSlElizabeth - Deuteronomy - 34

34:1  И взыде Моисей от аравофа Моавля на гору Навав, на верх Фазга, яже есть прямо Иерихону: и показа ему Господь всю землю Галаадску даже до Дана,

34:2  и всю землю Неффалимлю, и всю землю Ефремову и Манассиину, и всю землю Иудину даже до моря последняго,

34:3  и пустыню и окрестная (села) Иерихона, град Фиников даже до Сигора,

34:4  и рече Господь к Моисею: сия земля, еюже кляхся Аврааму и Исааку и Иакову, глаголя: семени вашему дам ю: и показах ю очесем твоим, и тамо не внидеши.

34:5  И скончася тамо Моисей раб Господень в земли Моавли словом Господним.

34:6  И погребоша его в земли Моавли близ дому Фогорова. И не уведа никтоже погребения его даже до дне сего.

34:7  Моисею же бе сто и двадесять лет, егда скончася: не отемнесте очи его, ни истлеста устне его.

34:8  И плакашася сынове Израилевы Моисеа во Аравофе Моавли у Иордана близ Иерихона тридесять дний. И скончашася дние плача сетования о Моисей.

34:9  И Иисус сын Навин наполнися духа разума: возложи бо Моисей руце свои на него. И послушаша его сынове Израилевы, и сотвориша якоже заповеда Господь Моисею.

34:10  И не воста ктому пророк во Израили якоже Моисей, егоже позна Господь лицем к лицу,

34:11  во всех знамениих и чудесех, егоже посла Господь сотворити я в земли Египетстей фараону и рабом его и всей земли его,

34:12  дивная великая, и руку крепкую (и мышцу высокую), яже сотвори Моисей пред всем Израилем.