CSlElizabeth - Deuteronomy - 29

29:1  Сия словеса завета, яже завеща Господь Моисею уставити сыном Израилевым в земли Моавли, кроме завета, егоже завеща им в Хориве.

29:2  И призва Моисей вся сыны Израилевы и рече к ним: вы видесте вся, елика сотвори Господь в земли Египетстей пред вами фараону и всем слугам его и всей земли его,

29:3  искушения великая, яже видеста очи твои, знамения и чудеса великая оная, руку крепкую и мышцу высокую:

29:4  и не даде Господь Бог вам сердца разумети и очес видети и ушес слышати, даже до дне сего:

29:5  и водил вас четыредесять лет по пустыни: не обетшаша ризы вашя, и сапози ваши не сотрошася на ногах ваших:

29:6  хлеба не ядосте, вина и сикера не писте, да познаете, яко Сей Господь Бог ваш:

29:7  и приидосте до сего места: и изыде Сион царь Есевонский и Ог царь Васанский во сретение нам на брань,

29:8  и поразихом их на брани, и прияхом землю их: и дах ю во жребий Рувиму и Гаду и полуплемени Манассиину.

29:9  И сохраните творити вся словеса завета сего творити я, да разумеете вся, елика сотворите.

29:10  Вы стасте вси днесь пред Господем Богом вашим, племеноначалницы ваши и старейшины ваши, и судии ваши и писмовводители ваши, всяк муж Израилтеск,

29:11  и жены вашя и чада ваша, пришлец иже посреде полка вашего, от древосечца вашего даже до водоносца вашего,

29:12  еже прейти в завет Господа Бога вашего и в клятвы Его, елика завещает Господь Бог твой к тебе днесь:

29:13  да поставит тя Себе в люди, и Той будет тебе Бог, якоже тебе рече и якоже клятся отцем твоим, Аврааму и Исааку и Иакову.

29:14  И не вам единем аз завет сей и клятву сию завещаваю,

29:15  но и зде сущым с вами днесь, пред Господем Богом вашим, и не сущым с вами зде днесь.

29:16  Яко вы весте, како жихом в земли Египетстей и како проидохом посреде языков, ихже преидосте,

29:17  и видесте мерзости их и кумиры их, древо и камение, сребро и злато, яже суть у них.

29:18  Еда кто есть в вас муж или жена, или отечество или племя, егоже сердце уклонися от Господа Бога вашего, ити еже служити богом языков оных? Еда кий есть в вас корень горе прорастающь в желчи и горести?

29:19  И будет аще услышит словеса клятвы сея и похвалится в сердцы своем, глаголя: преподобно мне да будет, яко в прельщении сердца моего пойду, да не погубит грешник безгрешнаго (с собою):

29:20  не восхощет Бог милостив быти ему, но тогда разгорится гнев Господень и ревность Его на человека того: и прилепятся ему вся клятвы завета сего, писанныя в книзе закона сего: и потребит Господь имя его от поднебесныя,

29:21  и отлучит его Господь на злая от всех сынов Израилевых, по всем клятвам завета написаннаго в книзе закона сего.

29:22  И речет род ин, сынове ваши, иже востанут по вас, и чуждый иже приидет от земли далекия, и узрят язвы земли оныя и недуги ея, яже посла Господь на ню,

29:23  жупел и соль сожженную: вся земля ея не насеется, ни прозябнет, ниже возникнет на ней всяк злак: якоже опровержеся Содом и Гоморр, Адама и Севоим, яже опроверже Господь в ярости и гневе Своем.

29:24  И рекут вси языцы: почто сотвори Господь сице земли сей? Кая ярость гнева великая сия?

29:25  И рекут: яко оставиша завет Господа Бога отец своих, егоже завеща отцем их, егда изведе их от земли Египетския,

29:26  и шедше послужиша богом иным, и поклонишася им, ихже не ведяху, и не даде им ничтоже ни един:

29:27  и разгневася яростию Господь на землю ту, еже навести на ню по всем клятвам завета, писанным в книгах закона сего:

29:28  и изят их Господь от земли их яростию и гневом, и прогневанием великим зело, и изверже их в землю ину якоже ныне.

29:29  Тайная Господеви Богу нашему, нам же явленная и чадом нашым во веки, творити вся словеса закона сего.