CSlElizabeth - Deuteronomy - 32

32:1  Вонми, небо, и возглаголю, и да слышит земля глаголы уст моих,

32:2  да чается яко дождь вещание мое, и да снидут яко роса глаголи мои, яко туча на троскот и яко иней на сено:

32:3  яко имя Господне призвах, дадите величие Богу нашему.

32:4  Бог, истинна дела Его, и вси путие Его суд: Бог верен, и несть неправды в Нем: праведен и преподобен Господь.

32:5  Согрешиша, не Того чада порочная: роде строптивый и развращенный,

32:6  сия ли Господеви воздаете, сии людие буии и не мудри? Не Сам ли сей Отец твой стяжа тя, и сотвори тя, и созда тя?

32:7  Помяните дни вечныя, разумейте лета рода родов: вопроси отца твоего, и возвестит тебе, старцы твоя, и рекут тебе.

32:8  Егда разделяюще Вышний языки, яко разсея сыны Адамовы, постави пределы языков по числу ангел Божиих,

32:9  и бысть часть Господня, людие Его Иаков, уже наследия Его Израиль:

32:10  удовли его в пустыни, в жажди зноя в безводне: обыде его и наказа его, и сохрани его яко зеницу ока:

32:11  яко орел покры гнездо свое, и на птенцы своя возжеле: простер криле свои и прият их, и подят их на раму своею.

32:12  Господь един вождаше их, и не бе с ними бог чуждь:

32:13  возведе я на силу земли, насыти их жит селных: ссаша мед из камене и елей от тверда камене,

32:14  масло кравие и млеко овчее с туком агнчим и овним сынов юнчих и козлих, с туком пшеничным, и кровь гроздову пияху вино.

32:15  И яде Иаков и насытися, и отвержеся возлюбленный: уты, утолсте, разшире: и остави Бога сотворшаго его, и отступи от Бога спаса своего.

32:16  Прогневаша Мя о чуждих, и в мерзостех своих преогорчиша Мя.

32:17  Пожроша бесовом, а не Богу, богом, ихже не ведеша: нови и секрати приидоша, ихже не ведеша отцы их.

32:18  Бога рождшаго тя оставил еси и забыл еси Бога питающаго тя.

32:19  И виде Господь, и возревнова, и раздражися за гнев сынов их и дщерей,

32:20  и рече: отвращу лице Мое от них и покажу, что будет им напоследок, яко род развращен есть, сынове, имже несть веры в них:

32:21  тии раздражиша Мя не от бозе, прогневаша Мя во идолех своих: и Аз раздражу их не о языце, от языце же неразумливе прогневаю их:

32:22  яко огнь возгорится от ярости Моея, разжжется до ада преисподняго, снест землю и жита ея, попалит основания гор:

32:23  соберу на них злая, и стрелы Моя скончаю в них:

32:24  тающе гладом и снедию птиц, и горб неисцелен: зубы зверий послю в на, с яростию пресмыкающихся по земли:

32:25  отвне обезчадит их мечь, и от храмов их страх: юноша с девою, ссущее с совершенным старцем.

32:26  Рех: разсею их, уставлю же от человек память их:

32:27  токмо за гнев врагов, да не долголетствуют, и да не налягут супостати, да не рекут: рука наша высока, и не Господь сотвори сия вся:

32:28  яко язык погубивый совет есть, и несть в них художества, не смыслиша разумети:

32:29  сия вся да приимут во грядущее лето.

32:30  Како поженет един тысящы, и два двигнета тмы, аще не Бог отдаде их, и Господь предаде их?

32:31  Не суть бо бози их, яко Бог наш: врази же наши неразумливи.

32:32  От виноградов бо Содомских виноград их, и розга их от Гоморры: грозд их грозд желчи, грозд горести их:

32:33  ярость змиев вино их, и ярость аспидов неисцельна.

32:34  Не сия ли вся собрашася у Мене и запечатлешася в сокровищах Моих?

32:35  В день отмщения воздам, во время егда соблазнится нога их: яко близ день погибели их, и предстоят готовая вам:

32:36  яко судити имать Господь людем Своим, и о рабех Своих умолен будет: виде бо их разслабленны и истаявшя во время и изнемогшя.

32:37  И рече Господь: где суть бози их, на нихже уповаша,

32:38  ихже тук жертв их ядясте, и пиясте вино треб их? Да воскреснут и помогут вам, и будут вам покровители.

32:39  Видите, видите, яко Аз есмь, и несть Бог разве Мене: Аз убию и жити сотворю: поражу и Аз исцелю, и несть иже измет от руку Моею:

32:40  яко воздвигну на небо руку Мою, и кленуся десницею Моею, и реку: живу Аз во веки:

32:41  яко поострю якоже молнию мечь Мой, и приимет суд рука Моя, и воздам месть врагом и ненавидящым Мя воздам:

32:42  упою стрелы Моя от крове, и мечь Мой снест мяса от крове язвеных и пленения, от глав князей языческих.

32:43  Возвеселитеся, небеса, купно с Ним, и да поклонятся Ему вси Ангели Божии: возвеселитеся, языцы, с людьми Его, и да укрепятся ему вси сынове Божии: яко кровь сынов Своих отмщает и отмстит, и воздаст месть врагом и ненавидящым Его воздаст: и очестит Господь землю людий Своих.

32:44  И написа Моисей песнь сию в той день, и научи ей сыны Израилевы: и вниде Моисей к людем и глагола вся словеса закона сего во ушы людем, сам и Иисус Навин.

32:45  И сконча Моисей глаголя словеса сия вся всему Израилю,

32:46  и рече к ним: внемлите сердцем вашим вся словеса сия, яже аз засвидетелствую вам днесь, яже да заповесте сыном вашым, хранити и творити вся словеса закона сего,

32:47  яко не тщетно слово сие вам, зане сия жизнь ваша, и ради слова сего долги дни будете на земли, на нюже вы преходите Иордан тамо наследити ю.

32:48  И рече Господь к Моисею в день сей, глаголя:

32:49  взыди на гору Аварим, сия гора Навав, яже есть в земли Моавли прямо Иерихону, и виждь землю Ханааню, юже аз даю сыном Израилевым во обдержание:

32:50  и скончайся тамо на горе, на нюже восходиши, и приложися к людем твоим, якоже умре Аарон брат твой на горе Ор и приложися к людем своим:

32:51  понеже не покористеся словеси Моему в сынех Израилевых у воды Пререкания Кадис в пустыни Син, понеже не освятисте Мене в сынех Израилевых:

32:52  яко прямо узриши землю, и тамо не внидеши, юже даю сыном Израилевым.