CSlElizabeth - Deuteronomy - 33

33:1  И сие благословение, имже благослови Моисей человек Божий сыны Израилевы прежде скончания своего,

33:2  и рече: Господь от Синаи прииде, и явися от Сиира нам, и приспе от горы Фарани, и прииде со тмами святых, одесную Его ангели с ним,

33:3  и пощаде люди Своя: и вси освященнии под руками Твоими, и сии под Тобою суть.

33:4  И прия от словес Его закон, егоже заповеда нам Моисей, наследие сонму Иаковлю:

33:5  и будет в Возлюбленнем князь, собравшымся князем людским купно с племены Израилевыми.

33:6  Да живет Рувим, и да не умрет, и Симеон да будет мног числом.

33:7  И сие Иуде: услыши, Господи, глас Иудин и в люди его вниди: руце его поборют по нем, и помощник на враги его да будеши.

33:8  И Левию рече: дадите Левию явленная Его, и истину Его мужу преподобну, егоже искусиша Искушением, укориша его у воды Пререкания:

33:9  глаголяй отцу своему и матери своей: не видех тебе: и братии своея не позна, и сынов своих не уведе: сохрани словеса Твоя и завет Твой соблюде:

33:10  явят оправдания Твоя Иакову и закон Твой Израилю: возложат фимиам во гневе Твоем всегда на олтарь Твой:

33:11  благослови, Господи, крепость его и дела руку его приими: порази чресла воставших на него врагов его, и ненавидящии его да не востанут.

33:12  И Вениамину рече: возлюбленный Господем уповаяй вселится (в Нем), и Бог осеняет его во вся дни, и посреде рамен Его почи.

33:13  И Иосифови рече: от благословения Господня земля его, от красот небесных и росы, и от бездн источников низу,

33:14  и во время плодов солнечных обращений, и от схождений месячных,

33:15  и от верха гор начала, и от верха холмов вечных,

33:16  и по времени земли исполнения: и приятная Явившемуся в купине, да приидут на главу Иосифу, и на версе прославивыйся в братии.

33:17  Первородный юнца доброта его, рози единорога рози его: ими языки избодет вкупе даже до края земли: сия тмы Ефремовы, и сия тысящи Манассиины.

33:18  И Завулону рече: возвеселися, Завулоне, во исходе твоем, и Иссахаре в селениих твоих:

33:19  языки потребят: и призовете тамо, и пожрете тамо жертву правды: яко богатство морское воздоит тя, и купли от язык при мори живущих.

33:20  И Гаду рече: благословен разширяяй Гада: яко лев почи, сокрушивый мышцу и князя:

33:21  и виде начатки своя, яко тамо разделися земля, князей собранных вкупе с началники людскими: правду Господь сотвори и суд Свой со Израилем.

33:22  И Дану рече: Дан, скимен львов, и изскочит от Васана.

33:23  И Неффалиму рече: Неффалиму насыщение приятных, и да насытится благословением от Господа: море и юг наследит.

33:24  И Асиру рече: благословен от чад Асир, и будет приятен братии своей: омочит в елей ногу свою:

33:25  железо и медь сапог его будет, и аки дни твоя крепость твоя.

33:26  Несть якоже Бог Возлюбленнаго: восходяй на небо помощник твой, и великолепый в тверди:

33:27  и покрыет тя Божие начало, и под крепостию мышцей вечных: и отженет от лица твоего врага, глаголя: да погибнеши:

33:28  и вселится Израиль уповая един на земли Иаковли в вине и пшенице: и небо ему облачно росою.

33:29  Блажен еси, Израилю: кто подобен тебе, людие спасаемии от Господа? Защитит помощник твой, и мечь хвала твоя: и солжут тебе врази твои, и ты на выю их наступиши.