Geez - Genesis - 16

16:1  ወሶራስ ፡ ብእሲቱ ፡ ለአብራም ፡ ኢወለደት ፡ ሎቱ ፡ ወባቲ ፡ አመተ ፡ [ግብጻዊተ ፡] እንተ ፡ ስማ ፡ አጋር ።

16:2  ወትቤሎ ፡ ሶራ ፡ ለአብራም ፡ በምድረ ፡ ከናአን ፡ ናሁ ፡ ዐጸወኒ ፡ አምላክ ፡ እግዚአብሔር ፡ ወኢይወልድ ፡ ሑር ፡ ወባእ ፡ እንከሰ ፡ ኀበ ፡ አመትየ ፡ ከመ ፡ ትለድ ፡ እምኔሃ ፡ ወሰምዐ ፡ አብራም ፡ ቃላ ፡ ለሶራ ።

16:3  ወነሥአታ ፡ ሶራ ፡ ለአጋር ፡ አመታ ፡ ግብጻዊት ፡ እምድኅረ ፡ ዐሠርቱ ፡ ዓመት ፡ ዘኀደረ ፡ አብራም ፡ ውስተ ፡ ምድረ ፡ ከናአን ፡ [ወወሀበቶ ፡ ለአብራም ፡ ትኩኖ ፡ ብእሲተ ።]

16:4  ወቦአ ፡ ኀበ ፡ አጋር ፡ አብራም ፡ ወፀንሰት ፡ ወሶበ ፡ ርእየት ፡ ከመ ፡ ፀንሰት ፡ ኀደገት ፡ አክብሮታ ፡ ለእግዝእታ ።

16:5  ወትቤሎ ፡ ሶራ ፡ ለአብራም ፡ እትገፋዕ ፡ አንሰ ፡ እምኔከ ፡ አነኒ ፡ ወሀብኩከ ፡ አመትየ ፡ ውስተ ፡ ሕፅንከ ፡ ወሶበ ፡ ርእየት ፡ ከመ ፡ ፀንሰት ፡ ኀደገት ፡ አክብሮትየ ፡ ለይፍታሕ ፡ ለተ ፡ እግዚአብሔር ፡ ማእከሌየ ፡ ወማእከሌከ ።

16:6  ወይቤላ ፡ አብራም ፡ ለሶራ ፡ ብእሲቱ ፡ አመትኪ ፡ ውስተ ፡ አዴኪ ፡ ግበርያ ፡ ዘከመ ፡ ይደልወኪ ፡ ወሣቀየታ ፡ ሶራ ፡ ለአጋር ፡ ወትኀጥአት ፡ እምኔሃ ።

16:7  ወረከባ ፡ መልአከ ፡ እግዚአብሔር ፡ በኀበ ፡ ዐዘቅተ ፡ ማይ ፡ በገዳመ ፡ [ሱ]ር ፡ በፍኖት ።

16:8  ወይቤላ ፡ መልአከ ፡ እግዚአብሔር ፡ አጋር ፡ አመተ ፡ ሶራ ፡ እምአይቴ ፡ መጻእኪ ፡ ወአይቴ ፡ ተሐውሪ ፡ ወትቤሎ ፡ እምነ ፡ ገጸ ፡ ሶራ ፡ እግዝእትየ ፡ እትኅጣእ ፡ አንሰ ።

16:9  ወይቤላ ፡ መልአከ ፡ እግዚአብሔር ፡ ግብኢ ፡ ኀበ ፡ እግዝእትኪ ፡ ወአትሕቲ ፡ ርእሰኪ ፡ ታሕተ ፡ እዴሃ ።

16:10  ወይቤላ ፡ መልአከ ፡ እግዚአብሔር ፡ አብዝኆ ፡ ኣበዝኆ ፡ ለዘርእኪ ፡ እስከ ፡ ኢይትኈለቍ ፡ እምነ ፡ ብዝኁ ።

16:11  ወይቤላ ፡ መልአከ ፡ እግዚአብሔር ፡ ናሁ ፡ ፅንስት ፡ አንቲ ፡ ወትወልዲ ፡ ወልደ ፡ ወትሰምይ[ዮ] ፡ ስሞ ፡ ይስማኤል ፡ እስመ ፡ ሰምዐ ፡ እግዚአብሔር ፡ ለሥቃይኪ ።

16:12  ወይከውን ፡ ብእሴ ፡ ሐቅል ፡ ወእደዊሁ ፡ ላዕለ ፡ ኵሉ ፡ ወእደወ ፡ ኵሉ ፡ ላዕሌሁ ፡ ወየኀድር ፡ ቅድመ ፡ አኀዊሁ ።

16:13  ወጸውዐት ፡ አጋር ፡ ስመ ፡ እግዚአብሔር ፡ ዘተናገራ ፡ ወትቤ ፡ አንተ ፡ እግዚኦ ፡ ዘምሕከኒ ፡ እስመ ፡ ቅድሜየ ፡ ርኢክዎ ፡ ለዘአስተርአየኒ ።

16:14  ወበእንተ ፡ ዝንቱ ፡ ሰመየቶ ፡ ስሞ ፡ ለውእቱ ፡ ዐዘቅት ፡ ዐዘቅት ፡ ዘቅድሜየ ፡ አስተርአየኒ ፡ ማእከለ ፡ ቃዴስ ፡ ወማእከለ ፡ [ባ]ሬድ ፡ (ወገብአት ፡ አጋር ።)

16:15  ወእምድኅረዝ ፡ ወለደት ፡ ሎቱ ፡ አጋር ፡ ለአብራም ፡ ወሰመዮ ፡ አብራም ፡ ለውእቱ ፡ ሕፃን ፡ ዘወለደት ፡ ሎቱ ፡ አጋር ፡ ይስማኤል ።

16:16  ወ፹ወ[፯]ዓመቱ ፡ ለአብራም ፡ አመ ፡ ወለደት ፡ ሎቱ ፡ አጋር ፡ ይስማኤልሃ ።