TpiKJPB - I Timothy - 4

4:1  ¶ Nau Spirit i toktok klia, long ol taim bihain sampela bai lusim bilip tru, taim ol i givim ia long ol spirit bilong grisim, na ol skul bilong ol spirit nogut,

4:2  Taim ol i toktok long ol giaman wantaim pasin bilong tupela bel, taim mausbel bilong ol ol i kukim wantaim ain i hatpela,

4:3  Taim ol i tambuim marit, na tok strong long ol man long ol i mas putim tambu long ol abus, dispela God i bin kamapim long nating bilong ol husat i bilip na save long tok tru i ken kisim wantaim tok tenkyu.

4:4  Long wanem, olgeta wan wan animal bilong God em i gutpela, na man i no ken tok nogat long wanpela samting, sapos em i kisim dispela wantaim tok tenkyu.

4:5  Long wanem, dispela i kamap holi long tok bilong God na prea.

4:6  ¶ Sapos yu mekim ol brata long holim tingting long ol dispela samting, yu bai stap wanpela gutpela wokman bilong Jisas Kraist, na kamap strong insait long ol toktok bilong bilip tru na gutpela skul bilong Baibel, we yu bin kamap long en pinis.

4:7  Tasol tok nogat long ol olpela giaman stori nating i no holi bilong ol maritmeri, na mobeta yu hatwokim yu yet long pasin bilong bihainim God.

4:8  Long wanem, hatwok bilong bodi i helpim liklik. Tasol pasin bilong bihainim God em i gutpela long helpim long olgeta samting, taim yu gat ol promis bilong dispela laip i stap nau, na bilong dispela samting long kamap bihain.

4:9  Dispela em i wanpela tok yu inap bilip long en na i gat namba inap long yu ken kisim olgeta.

4:10  Long wanem, olsem na yumi bin hatwok na karim sem wantaim, bilong wanem, yumi putim bilip long God i stap laip, husat i Man Bilong Kisim Bek bilong olgeta man, na moa yet bilong ol dispela husat i bilip.

4:11  Mekim strongpela tok na skulim ol man long ol dispela samting.

4:12  No ken larim wanpela man i tingim olsem taim yangpela bilong yu em i samting nating. Tasol yu mas stap wanpela piksa bilong ol bilipman, long tok, long pasin, long pasin bilong laikim tru, long spirit, long bilip tru, long klinpela pasin.

4:13  Inap long mi kam, givim tingting olgeta long ritim, long toktok bilong strongim bel, long skul bilong Baibel.

4:14  No ken slek long lukautim dispela presen i stap insait long yu, dispela God i givim yu long wok bilong autim tok profet, wantaim taim ol hetman i slipim ol han antap long yu.

4:15  Tingting strong long ol dispela samting. Givim yu yet olgeta long ol, inap long helpim bilong yu i ken kamap ples klia long olgeta.

4:16  Was gut long yu yet, na long skul bilong Baibel. Stap yet insait long ol. Long wanem, taim yu mekim dispela yu bai kisim bek yu yet, na ol husat i harim yu wantaim.